Read Yupik Micah 3 Bible Online

Micah 3 - Yupik bible

Micah 3

¹Niicugnici, Israel-aam ciuliqagtaini! Elpeci-qaa nallunritnarqenritarci elluaruciq,

²tau͡gken eq'ukluku assilria assiitellria-llu kenekluku. Yuunka amiilaraci unguvatuumaita, enrit-llu kemgirluki.

³Nerlaraci yuunka. Amiilaraci, navgurluki enrit, ingqiluki-llu keni'irkiulriacetun.

⁴Pillerkaq agiirtuq qayagallerkarci ATANERMUN, elliin tau͡gaam kiungaitaaci. Niicugningaitai piicauceci, tua-i-wa assiitellriamek calillruavci.

⁵Prophet-aat iqluurait yuunka, taukut akqelarait uitanqegcitmek akilirceteng, tau͡gaam aniqlaagaqluki anguyagmek akilinrilnguut. Taukut prophet-aat piluki ATANEQ qanertuq,

⁶“Prophet-aani, pillerkarci iquklitqatartuq; akerta teviqatartuq. Yuunka iqlutmurutellruarpeciki, tekitarkanek tangrruarngairutuci, ca-llu tekitarkaq qanrutkesciigaciiqaci.”

⁷Kinkut-llu tekitarkamek qanelriit kasnguyugcecimaciqut piciurtenritellrakun. Tamarmeng kasnguyugciqut tua-i-wa Agayutem kiunrilateng.

⁸Wiinga tau͡gaam, ATANREM imiraanga anerneminek piniminek-llu, cikirlua-llu nallunritlerkaanek elluarucim alingura'arpek'nii-llu qanrutlerkaatnek Israel-aam yuin cauciitnek assiilnguit.

⁹Niicugnicia, Israel-aam atanirturtaini, elpeci elluarucim eq'ukestaini assilria-llu assiitellriamek cimirluku.

¹⁰Nautarci Agayutem nunarpii, Jerusalem-aaq, tusnganirluku yugnek tuqucillerkun elluanrilngurkun-llu.

¹¹Nunarpiim ataniurtai ataniulartut aassaqluteng akilirtelluteng, agayulirten͞gunret-llu qanrutkelaraat Alerquun akilirtelluteng, tau͡gken qanerluteng ATANERMUN nayurniluteng. Qanlartut, “Ca akngirnarqellria taingaituq wangkutnun. ATANREM nayuraakut.”

¹²Taumek tuaten ayuqellerpeci Zion-aaq itumcimavkarciqaa naucetaarvigkam itumcimalauciatun, Jerusalem-aaq navguumaluni qalliryagingaciquq, qemiq-llu Agayuvigpiim uitavia naparrlainaurciiquq.