Read Yupik Micah 4 Bible Online

Micah 4 - Yupik bible

Micah 4

¹Ernerni tekitarkani ingriq Agayuvigpiim nangerngavia tamalkuitni quyinqurrauciquq, qemit tamarmeng quliitni uitaluni. Amlleret atanruvillgutkenrilnguut carveciqut tuavet,

²yuit-llu qanerciqut, “Qemimun mayulta ATANREM pianun, Israel-aat Agayutiita Agayuvigpiinun. Elliin elitnaurciqaakut pisqumallminek piyuaciqukut elliin cucukellrikun tumyaratgun. Tua-i-wa ATANREM elitnaurutai tailaata Jerusalem-aamek; elliin qalarut'larai yun'i Zion-aamek.”

³Atanruvillgutkenrilnguut qanemyuugautait elluarciiqai, pinilegpaulriit canimelnguut yaaqvanelnguut-llu. Nuussirpateng mulut'uugluki nunamun itumcissuutngurrluki taqciqait narulkauceteng-llu napanun tangnircarcuutngurrluki. Angayuqauviit watqapik anguyagyartunqiggngaitut, uptenqiggngaunateng anguyallerkameggnun.

⁴Yuut tamarmeng uitanqegciluteng uitaciqut nakmiin wine-anek naucetaarvimeggni atsangtulinek-llu napautmeng akuliitni, kia-llu alingevkarngaunaki. ATANREM Pinilegpaulriim man'a akqutkelqaa.

⁵Atanruvilget piicagvik'larait niisngaluki-llu ellaita nakmiin agayuceteng, tau͡gaam wangkuta piicagvikciqaput niisngaluku-llu ATANEQ Agayutvut akwanun akwarpak-llu.

⁶“Pillerkaq agiirtuq,” qanertuq ATANEQ, “quyurcillerkaqa atauciurrluki yuut anucimirqecetaallrenka, nangteqellret nunameggnek ayagcecimallermeggni.

⁷Piyuasciigatut kingunermeggnek-llu yaaqsigluteng, tau͡gaam nutaramek ayagniuciiqanka unegtauqallret, atanruvigpaurciiqut-llu. Wiinga-llu ataniurciqanka Mount Zion-aamek taumek ernermek ayagnirluki akwarpak.”

⁸Elpet-llu, Jerusalem-aaq, elpeni uitaluni Agayutem yun'i murilkekai, qusngiliurta murilkilauciatun nacessviminek, ataam ciuqliurciiquten angayuqauvigmi ciungani piklerpeni.

⁹Ciin qiasit qastuluten? Ciin nangteqsit arnatun nep'nguskiitun? Wall'u-qaa nunamiungulriamek atanrilavet tuaten piuten, ayuqucirturceten-llu tuqullruata?

¹⁰Qiperrlugluci yuuniaraci, elpeci Jerusalem yuini, arnatun irnilriatun, wanirpak unitarkaungerpeciu nunarpak uitaluci-llu manigcetellriami nunami. Babylon-aamun ayagarkauguci, tau͡gaam tuani ATANREM anirturciqaaci inglukestevcen̄ek.

¹¹Amlleret atanruvilget quyurtellruut curugnaluten. Ellait qanertut, “Jerusalem-aaq piunriumanarquq! Piunriumaluku tangerciqaput!”

¹²Tau͡gaam ukut atanruvillgutkenrilnguut nalluat ATANREM umyugaa. Taringenritaat quyurcimacirteng ataucimun anucimirqecetaarumallerkameggnun mukaarkam itrucimalauciatun aritarkatun.

¹³ATANEQ qanertuq, “Jerusalem-aarmiuni, ayagluci anucimirqecetaarciki inglukesteci! Pinirivkarciqamci angucaluten kuluvagtun tegglinek cirunelegtun punernernek-llu cetumqulegtun. Ciamciiqaci amlleret atanruvilget, tukuucet-llu piksagutellrit calluatekluki wangnun taiciiqaci, Atanranun ellarpiim.”