Read Yupik Micah 5 Bible Online

Micah 5 - Yupik bible

Micah 5

¹Jerusalem-aarmiuni, quyurciki akiurucestekaci! Avatairaitkut! Israel-aat ciuliqagtiit curugaat!

²“Bethlehem Ephrathah, nunarraat Judah-melnguut mikelqukacagaita ilakaatgen, tau͡gaam elpenek taiciiqua atanerruarkaanek Israel-aam, ak'a yuullernek ciulialegmek.”

³Taumek ATANREM uniciiqai yun'i inglukestaitnun arnaq tauna irniarkaulleq qetunrangvianun. Nutaan Israelite-at nunameggnek ayagcecimallret nakmiin ilameggnun utercecimaciqut.

⁴Tekiskuni, yun'i ataniurciqai piningqerrluni ATANERMEK kingunelegmek, takarnarqutengqerrluni-llu ATANREM Agayutem takarnarqutiinek. Elliin yui camek aarniurpek'nateng uitaciqut, tua-i-wa yuut tamarmeng nunam qainganelnguut nallunairciqngatgu elliin angelriarucia.

⁵Ellii-llu taiciiquq uitanqegcitmek. Assyrian-aat itqatgu nunavut navguulluteng-llu pengegyailkutemteggun, wangkuta ayagceciiqaput pininqurrait ciuliqagtemta callugyartuusqelluki.

⁶Anguyagkun cirlakciqaat Assyria-q, Nimrod-am nunii, aviuciiqaitkut-llu Assyrian-aanek nunamten̄un itqata.

⁷Israel-aam yui unegtauqallret ayuqeciqut nutarcilriatun unuakum yukutaatun ATANREM taivkaqiitun amllernun atanruvignun, ellaliaralriatun nauguralrianun naucetaanun. Taukut Agayun cacetuqutekciqaat, yuut cacetuqutekevkenaki.

⁸Unegtaullret atanruvilegni ayuqeciqut yugtutulitun pissulriatun neqkaminek napalilriami wall'u marami: qusnginun ilautelartut, qecengvikaqluki, allgurluki caunrirrluki, tuani neryuniurucetaunani anirtuumallerkamek.

⁹Israel-aam cirlakciqai inglukesten̄i piunrirrluki-llu tamalkuita.

¹⁰ATANEQ qanertuq, “Taum nalliini horse-aaci teguciqanka ayagassuuceci-llu navgurluki.

¹¹Piunrirciqanka nunarpiit nunavcen̄i uitalriit imlluki-llu tamalkuita cayailkuceci.

¹²Piunrirciqanka angalkumirtaarutet atutukci ciunerkarcurtairulluci-llu.

¹³Agayutnguaci piunrirciqanka, qigcikumalriit-llu teggalqut naparyat; piicagvikngairuciiqaci elpecen̄ek pilialci.

¹⁴Imciiqanka agayutnguarpeci Aserah-m ayuqai nunavcen̄i uitalriit, piunrirrluki-llu nunarpaci.

¹⁵Angelriamek qenertellemni akinaurciqanka tamalkuita angayuqauvilget niisngastekenritellrenka.”