Read Yupik Micah 6 Bible Online

Micah 6 - Yupik bible

Micah 6

¹Niicugniciu ATANREM pinarqut'liara Israel-aamun. Nangerrluten, ATANEQ, qanrutkiu pinarqut'lian; qanellren niitesgu ingrinun qeminun-llu.

²Ingrini, nangyuilngurni nunam tusnganrini, niicugniciu ATANREM pinarqut'liara! ATANEQ pinarqutmek pingqertuq yum'inun. Ellii paivciqatartuq Israel-aam piciliutiinek.

³ATANEQ qanertuq, “Yumaa, qaillun pillrusia elpecen̄un? Qaillun pilua elpecen̄un caknernarqellriarullrusia?

⁴Egypt-aamek anutellruamci; pisten͞guyaramek anutellruamci; ayagcetellruanka Moses-aaq, Aaron-aaq Miriam-aaq-llu ciuliqagtesqelluci.

⁵Yumaa, atam umyuaqeqe'rciu Moab-am angayuqran Balak-aam picirkiuryaaqellra tungevcen̄un, qaillun-llu Balaam-aam Beor-am qetunraan kiullrucia. Atam-llu umyuaqeqe'rciki cat pillret tumyarami Acacia-mi Gilgal-aamun. Umyuaqeqe'rciki makut nutaan tangerrniarci camek pillrucimnek anirturnaluci.”

⁶Camek taiciiqsia ATANERMUN, qiliim Agayutiinun, piicagviksartuqumku? Kuluvayagaat-qaa assinqukacagiitnek taiskilii ekuagarkamek elliitekluku elliinun?

⁷ATANEQ-qaa ilukegciciquq taiskumni tiissitsaanek qusnginek wall'u nangyuilngurmek qurrlurturalriamek olive-aat uquatnek?

⁸Qang'a, ATANREM qanrutellruakut ca assiucianek. Pisqutii wangkutnun uunguuq: elluaq atuusqelluku, kenka-llu tamiini manimarrlainaasqelluku, yuusqelluta-llu ellmikutuulriakun ilagausngallerkun Agayutemten̄un.

⁹Umyuartunarquq qigcikellra ATANREM. Ellii qayagaurtuq nunarpagnun, “Niicugnici, quyurtelalriani nunarpagmi!

¹⁰Enait assiitellriit yuut tukuutnek pitangqertut unangkengallritnek piciunrilngurkun. Atulartut piciunrilngurnek cuqyutnek, wiinga eq'ukekemnek.

¹¹Qaillun au͡g'aricarcia piciunrilngurnek uspernek uqamaltassiirutnek-llu atulalriit?

¹²Tukuulriartarpeci atularait arrsaulriit pikaniutekameggnun, tamarpeci-llu elpeci iqlungalriaruuci.

¹³Taumek ak'a ayagnillruaqa piunriumallerkarci assiilnguci pitekluki.

¹⁴Nerciquci, tau͡gaam camirrngaituci tua-i cali kaigciquci. Canek ayauciiqsaaquci, tau͡gaam qemagcisciigaciiquci qaku aturkarpecen̄ek; cat qemagtelci piunrirciqanka anguyagmi.

¹⁵Nauceciiciquci mukaarkanek, tau͡gaam quyurrngaunaki naugillrit. Olive-aat passiluki uquirciqaci, tau͡gaam aturngaunaku.

¹⁶Man'a waten piciquq tua-i-wa maligtellruavciki assiitellriit angayuqam Omri-m qetunraan-llu, angayuqam Ahab-am piciryarakek. Piciryarakek ciumuutellruaci, wiinga-llu piunrillerkarpecen̄un tekiuciiqamci, yuut-llu tamarmeng uumikciqaiceci. Yuut tamiini uumikciqaiceci.”