Read Yupik Micah 7 Bible Online

Micah 7 - Yupik bible

Micah 7

¹Neryuniurucetaituq! Yugtun kailriatun ayuqua nataqutenrilngurtun atsamek uitaqallermek napani grape-artaunateng-llu wine-arkanek naugitulit.

²Piciulriamek yugmek pitaituq nunam qaingani, kitumek Agayutmun piciulriartaituq. Yuut tamarmeng tuqucillerkameggnek utaqalgiartut. Yuut tamarmeng nakmiin yut'eng pitaqengnaqait.

³Tamarmeng elisngaqapiararaat assiilnguum atullerkaa. Atanerruat cuqcistet-llu aassaqluteng akiliisqelartut. Piuranrita yuut qanrut'larait camek piyullermeggnek, pillgutekluteng-llu assiitellrianek picirkiulartut.

⁴Assinqurraqengraiceteng piciunqurraqengraiceteng-llu cakarniitut canegglugcetun naumalriatun. Erneq tekituq Agayutem anucimirqecetaallerkai yuut, aarcirtuucillmitun murilkestait prophet-aat tumekluki. Wani-wa uum nalliini yuut uunguciitut.

⁵Ukveqsaqunaku elaqliin wall'u yugnikek'ngan cacetuquteksaqunaku. Camek qanellren murilkekiu uikeng'e'rpegu wall'u nulirqeng'e'rpegu.

⁶Makuni ernerni qetunraita atateng usviilngurtun pilarait, paniita-llu aanateng inglulilarait, ayagyuat-llu arnat kiutaarut'lartut cakimeggnek arnanek ingluluteng; nakmiin ilavcen̄ek inglungqertuci.

⁷Tau͡gaam wiinga murilkeciqaqa ATANEQ; utaqalgirciqua nalirugtevkeni Agayutmek, anirturtekamnek. Agayutma niiciiqaanga.

⁸Inglukesteput camek ucuryagutekaitut wangkuta pitekluta. Iqullruukut, tau͡gaam ataam nangerciiqukut. Wanirpak tan'germetukut, tau͡gaam ATANREM tanqigmek cikirciqaakut.

⁹Assiilngillruukut ATANERMUN atalriamek, taumek carrarmi cakviungramta qenertellra aturnarqaput. Tau͡gaam iquani elliin anagyaaquciiqaakut kituggluki-llu assiitellriit wangkutnun tut'ellret. Anuciiqaakut tanqigmun; unguvainanemten̄i tangerciqaput anirtuq'ngellra wangkutnek.

¹⁰Tua-llu inglukestemta tangerciqaat man'a kasnguyugcecimaciqut-llu, imkut caunrilkuurtellemta apluteng, “Nauwa ATANEQ Agayutsi?” Cirlakumallrat tangerciqerput, tutmaumakata marayatun tumyaranelngurtun.

¹¹Jerusalem-aam yuini, napartenqigtellerkait nunarpiim qacarneri agiirtuq. Taum nalliini nunasi anglikanirciquq.

¹²Yuc'i-llu uterciiqut elpecen̄un naken tamiinek, Assyria-mek calaramelngurmek, Egypt-aamek ungalamelngurmek, Kuigem Euphrates-aam nuniinek, yaaqvanelngurnek imarpignek yaaqvanelngurnek-llu ingrinek.

¹³Nuna tau͡gaam kinerciqaa tua-i-wa assiiluciat nunakestain pitekluki.

¹⁴Ciuliqagten͞gu yugpenun, ATANEQ, yugnun taukunun elpet cucukellerpenun. Allakarmeng uitang'e'rmeng yuilqumi, avatiitni nuna naugingilriaruuq. Ayagteski nerniartut neqkaucilriarani Bashan-aam Gilead-aam-llu, ak'a ciuqvani pillrucimegcetun.

¹⁵Irr'inarqelriali wangkutnun, ATANEQ, tamaani pillerpetun Egypt-aamek anutellerpenikut.

¹⁶Atanruvilget man'a tangerciqaat qaillun-llu pillerkaiciiqut pinilegpaunge'rmeng. Tengruirulluteng qanteng mamciiqait ciuceteng-llu patuluki.

¹⁷Ciissirpagtun urr'ami aqsaqumegteggun ayagciqut; taiciqut pengegyailkutaliameggnek, uuleggluteng alingluteng-llu. ATANERMUN Agayutemten̄un tuigciiqut alingluteng.

¹⁸Allamek agayucetaituq elpetun ayuqelriamek, ATANEQ; yut'en unegtauqallret au͡g'aritellruaten assiilnguitnek. Qenertellren akwarpak piyuituq, tau͡gaam nunanik'laran taqsuilnguq kenekvet manimallra wangkutnun.

¹⁹Ataam takumcuyaguciiqavkut. Tutmauciiqaten assiilnguput ayagtelluki-llu imarpiim terr'anun!

²⁰Maniciqan piciucin taqsuilnguq-llu kenka yugpenun, kinguvrinun Abraham-aam Jacob-aam-llu, akqellrucirpetun ciuliaput ak'a tamaani.