Read Yupik Nahum 2 Bible Online

Nahum 2 - Yupik bible

Nahum 2

¹Nineveh, anguyiit curugaatgen! Pinilria ciqumtestekan tekituq. Nunarpiim ingluliurutestekai upciki! Tumyaraq nayurcirluku! Upten anguyallerkarpenun!

²(ATANREM Israel-aam ucurnarqucia ataam piksagucetqataraa, ciungani ayuqucillratun inglukestain uayarpailgatgu.)

³Inglukestain anguyagtait tegumiartut kavirlinek capkutanek kavirlinek-llu aturarluteng. Curukatarluteng uptut! Ekumassuutait akalrialget kenerpallaraluteng! Horse-aarit qecgaurluteng!

⁴Ekumassuutet akalrialget ayakaraut nunat tumyaraitgun, utertaarluteng nunat akuliitgun. Tanqigpallaraut kenurqutatun wavirtaarluteng-llu kalluum kenratun.

⁵Anguyagtet atanerruarit taisqait; paallagyarpiaraluteng ciumurtut. Curulriit curugaat qacarnermun capkucirluku-llu ikirtuqat navgurcuutekaat.

⁶Ikirtuqat kuigem canianelnguut alqunaq iki'irtut; angayuqam eniini nanikuagut tamarmeng.

⁷Angayuqam nulirra teguaqaat; pistai nepuagut yaqulegtun kanguruacuartun qat'gateng-llu tengluarluki angniinateng.

⁸Mertun qurrlullalriatun capkuciumallni navgaqan, yuut anuraut Nineveh-mek! Qayagpagayaaqait, “Arulairci! Arulairci!”— tau͡gaam kina atauciunge'rmi utertenrituq.

⁹Tegularciki qerrirlit! Tegularciki suulutaat! Nunarpak muirumauq tukuutnek!

¹⁰Nineveh piunriumauq, yuirulluni, nunakarniinani! Ircaqruit alingem qamtai; ciisqu͡rrit uulegtut, piniarulluteng; kegginait qak'iqraluteng.

¹¹Nauwa-mi wani-wa imna nunarpak yugtutulit igtiicetun ayuqelleq, imna piyagaita yugtutulit nereqvik'lallrat, yugtutulim arnacaluni-llu uitavikelallrak, piyagakek-llu alingniuyuunateng uitavikelallrat?

¹²Yugtutulim tuquqaarluku pitani allgularaa neqkiurluki arnacaluni piyagani-llu; imirluku igten̄i allguumalrianek kemegnek.

¹³“Wiinga inglukestekarpenga!” qanertuq ATANEQ Artuqailnguq. “Ekumassuuteci akalrialget ekuavkarciqanka. Anguyagteten anguyagkun tuqurqumaciqut, tegulalten-llu yugnek allanek wiinga teguciqanka tamalkuita. Ayagcetarpet arenqiirturtet piyullrit niicimanqiggngaituq.”