Read Yupik Nahum 3 Bible Online

Nahum 3 - Yupik bible

Nahum 3

¹Nau͡gguirviilngurmun picurlagmun tekituq iqlungalria tuqurqiyulria nunarpak, muirumaluni tukuutnek uayaararkanek!

²Kaaka! Piqrutam cingqulallran nepii, kallagtellriit akalriat, kuunit pangalgalriit, migpallarallrat-llu akalrialget ayagassuutet!

³Horse-aarluteng anguyagtet curugtut, nuussirpait qevelpagaut, narulkautait qevliagut! Tuqumalriit temait qalliqluteng qertuluteng, temait tuqumalriit naaquciinateng— anguyagtet tamakunun tuqumalrianun paallacalkaraut!

⁴Nineveh akissuq anucimirqecetaarumauq. Ayarinaqluni tuqunarqelrianek tau͡gaam muirumaluni, atanruviit ungacarluki teguarurtelluki-llu ayaritauciicetun.

⁵ATANEQ Artuqailnguq qanertuq, “Nineveh, anucimirqecetaarciqamken! Matarciiqamken cairluten atanruvignun-llu tangertelluten, kasngunarqucin tangerrniaraat.

⁶Caunrilngurtun wangni ayuqeciquten qain-llu patuciqaqa pellernarqellriamek. Yuut irr'iciqaatgen cakneq ayuqucirpenek assiilqilluteng.

⁷Tangertevvet tamarmeng ulurmiaciqaatgen. Qanerciqut, ‘Nineveh imenrurtuq! Kina takumcuyugta elliinek? Kia-llu-kiq qarucugyartau?’”

⁸Nineveh, utumanruuten-qaa Thebes-aami Egypt-aam atanruviani? Tauna-llu kuingqellruuq cayailkutekluku qacarnertun—Nile-aq cayailkutkellrua.

⁹Ethiopia ataniumallrua Egypt-aaq-llu, pinirtacia engelaunani; Libya-llu ilikluku.

¹⁰Tau͡gken Thebes-aam yui ayaucimallruluteng teguaruluteng. Tamaitni-llu tumyarat kangiraitni irniarit kaugtuarluki tuqutelallruit. Ciuliqagtait-llu kalivnercirluki ayautellruit teguaqestaitnun-llu avveqluki tunturluki.

¹¹Nineveh, elpet-llu taangiqellriatun ayuquciirciiquten! Elpet-llu inglukesteten qimangnaqciqaten.

¹²Tamarmeng asvairqumalriit cayailkuceci ayuqeciqut figs-aat napaicetun atsait qecugnarilriatun: arulaskuvciki napat, atsat igqaqciqut qanerpecen̄un!

¹³Anguyagteci qaillun picirkaitut, nunasi-llu ingluliurutestekaunani inglukestevci ciuqerrani. Kenrem ikirtuqavci canirutait ekuaciqai.

¹⁴Mertarci avatairumallerkarci upyulluku, asvaiqcarluki-llu cayailkutaci! Tutmarluku qikuq teggalqulici, teggalqulissuutet-llu paivvluki!

¹⁵Qaillukuaryaaqeng'e'rpeci, ekualuci tuqucimaciquci wall'u anguyagkun tuqucimaluci. Perriumaciquci naunrartun petgertayulit nerkaicetun. Elpeci petgertayulitun amllerillruuci!

¹⁶Kipusviliurten̄ek amllernek ilangellruuci amllenritnek agyat qilagmi! Tau͡gaam tayima catairutut, petgertayulitun tengluteng ayalriatun.

¹⁷Atanerruaci ayuqut petgertayulirugartun nenglliraqan qacarnermi uitauralriatun. Tua-i-llu akertengan, tengluteng ayagluteng, kia-llu nalluluku natmun ayauciat!

¹⁸Assyria-m Angayuqrani, atanerruaten tuquut, takarnarqellriit-llu ciulirneten qavarluteng tupanqiggngaunateng! Yut'en cekavtut ingrinun, kitumek-llu pitaituq ut'rutestekaatnek kingunratnun.

¹⁹Akngirneten camek iinrukaitut, kilineten-llu qaillun mamtesciiganateng. Tamarmeng niitellriit piunrirniluten unateteng kacguurutait quyaluteng. Kina-qaa taqsuunak nangcillerpenek qimallruuq?