Read Yupik Habakkuk 2 Bible Online

Habakkuk 2 - Yupik bible

Habakkuk 2

¹Nayurvimnun mayurlua utaqalgirciqua nallunriryuglua camek ATANERMUN qanresqucirkamnek, camek-llu ellii kiutengqerrarkaucia qanemyuugautemnun.

²ATANREM waten kiugaanga, “Nasvallrenka elpenun kalikarmun taringnariluki igauski, naaqsunariluki cukamek.

³Igaulluku pikiu, piciurtellerkaa cali pinariksailan. Tau͡gaam pillerkaa cukamek agiirtuq, nasvallrenka-llu elpenun piciurciiqut. Piciurtellerkaat pinaciarngaciiqsaaquq, tau͡gaam elpet utaqaurniaran; pinritevkenani piciurciiqngan, pinaciarumangaunani-llu.

⁴Waniwauguq una qanrutkumaarkaq: ‘Assiitellriit unguvangaitut, tau͡gaam ellualriit unguvaarkaugut piciuluteng piameng Agayutmun.’”

⁵Tukuuciq ukvercilartuq. Tukuuyunqellriit ellmeggnek pivakelartut ayagalkartuluteng-llu tuqucetun camircesciigat'lartut. Taumek cirlakilalriit kinguqliqu'urluki atanruvignek pikameggnek.

⁶Cirlakumalriit yuut eqcetaarciqait cirlakesteteng caunrilkicirteng ellaitnek nasvagluku. Waten qanerciqut, “Tegutelartuci pikenrilkevcen̄ek, tau͡gaam aarnarqellriamek ciunerkangqertuci! Qaillun pitalriamek tukuurteqatarceci akilircetaqluci alingcira'arluki elpecen̄un akiilngulget?”

⁷Tau͡gaam alapen'errluci, elpeci ilavcen̄ek cirlakilallerni akiilngurturiciquci, aksang'erpeci-llu akiilngurpeci ilangutaitnek akilirilarciquci. Inglukestevci ullagluci uulegcet'larciqaiceci. Uayarciqaiceci!

⁸Elpeci uayaalallruaci yuit amlleret atanruviit, tau͡gaam maa-i tuqutellrunrilkevci uayarciqaiceci tua-i-wa tuqurqilallerci nangcilallerci-llu ellam yuinek nunarpainek-llu picirluteng.

⁹Ciunerkangqertuci assiitellriamek! Tukuurcetellruaci ilarraci nanglluki yugnek tegulallerpecen̄ek, eneci-llu alingnarqellrianun pivkanritengnaqaqluki!

¹⁰Tau͡gaam elpet picirkiurarpet ilarraten kasngunarivkarai; piunririllerpegun amllernek atanruvignek elpenek tau͡gaam caunrillerkiurtuten.

¹¹Enevet-llu qacarneri teggalqut qanagai-llu nallunairiut elpenek inglukluten.

¹²Ciunerkangqertuci assiitellriamek! Nunarpagmek ayagnirillruuci assiitellria aturluku tuqurqillerpiciuggun-llu naulluku!

¹³Atanruviit cirlakelten taqsuqcillruut ellmeggnek caliluteng caugarkaunrilngurnek, caliaqellrit-llu tamarmeng ekualuteng nangellruut. ATANREM Artuqailnguum tuaten pivkaraa.

¹⁴Tau͡gaam nuna muirumaciquq nallunrillranek ATANREM ucurnarqucia imarpiit mermek imangqerruciicetun.

¹⁵Ciunerkangqertuci assiitellriamek! Aaritlerpegun 'laqliten kasnguyugtesketen kiaresngiatevkarluki; ayaluavkaqten taangiqellriatun kasngunarqellrat tangvagnaluku.

¹⁶Elpet-llu tuaten kasngunarqellriim patuciqaaten takarnairulluten. Elpet-llu merciquten ayalualuten-llu. ATANREM merceciiqaaten tuaken saskamek anucimirqecetaarutkarpenek, takarnarqellren-llu cimirciquq kasngunarqellriarurrluten.

¹⁷Elpet kepullruaten napat nuniini Lebanon-aam; watua tau͡gaam elpet iqucimaciquten. Ungungssiarai tuqurqellrukten; tau͡gaam watua tamakut nanikuavkarciqaatgen. Man'a waten tuciiquq elpenun tuqurqillren pitekluku, yugnek-llu mulngakinritellren nunam yuinek nunarpainek-llu.

¹⁸Agayutnguaq camun atuuga? Cauvkenani piliaqestiin unatmikun piliaqaa cavigmek, ayuqucirturilriaruluni iqluurutnek. Piliaqestii ukvequni taumun catkeciqau, tua-i-gguq agayun, tau͡gken camek qanerciiganani?

¹⁹Ciunerkangqertuci assiitellriamek! Qanlalriaci muragmun (piliamun), “Tupagluten!” wall'u teggalqumun qanerciigalngurmun, “Nangerten!” Agayutnguam-qaa camek nasvicugngaaci? Qalliliumayaaqsartuq qerrirlimek suulutaamek-llu, tau͡gken anernerunani watqapik.

²⁰ATANEQ Agayuvigpamini tanqilriami uitauq; nuna tamarmi nepailli ciuqerrani.