Read Yupik Habakkuk 3 Bible Online

Habakkuk 3 - Yupik bible

Habakkuk 3

¹Una piicalqaa prophet-aam Habakkuk-aam:

²ATANEQ, niitellruanka calialten, irr'ikluki-llu. Kitak ataam maa-i nallemten̄i tamakut angelriit ak'a caliaqelten caliaqiki. Takumcukuten aturru, qenerteng'e'rpet.

³Agayun tainqigteqatartuq Edom-aamek; tanqilria Agayun taiqatartuq qemiinek Paran-aam. Ucurnarqucian qiliit patumai, nuna-llu muirumaluni nanrautainek.

⁴Taiguq tanqigtaluni kalluum kenratun; unatai tanqigpallaraluteng, tuani elliin pinia iirumauq.

⁵Cangerlagnek ciunermikun ayagcecilartuq tuqu-llu alerquraqluku maligtesqelluni.

⁶Arulairaqan, nuna arulalartuq; atanruviit-llu tangrraqateng uulegtaqluteng. Ingrit akwarpak piulriit ciqumcimaut; qemit-llu piunriyuilnguut kill'uteng, qemit ak'a tamaani piyuavik'lallri.

⁷Cushan-aam yui tangrranka alingluteng Midian-aam-llu yui uuleggluteng.

⁸ATANEQ, kuiget-qaa qenngevkallruatgen? Imarpiim-qaa eq'urtevkallruaten? Amirlutgun ayallruuten; ayagassuutekluku ellarayiim amirlua, yugpet cirlakillerkaatnek taitellerpeni.

⁹Urluvren uptan aturnaluku, pitgaqucukaarluki pitegcauteten. Kenerpallarallerpet-llu nuna qupuraa kuilirluku.

¹⁰Ingrit tangrramegteggen uulegtut; meq kuvluni qilagmek. Mer'et nunam acianelnguut ellerrartut, qairit-llu qerturiluteng.

¹¹Kenerpallarallratni cukalriit pitegcauteten kapsuuten-llu qitngirnaqluni qevliallrani, akerta iraluq-llu arulaillruuk.

¹²Nuna piyualuten qerallruan qenerrluten; eq'urrluten-llu tutmaulluki atanruviit.

¹³Ayallruuten anirturyarturluki yut'en, anirturnaluku cucukellren ataneq. Iqutellruan assiitellriit yuut ciuliqagtiit maligtestai-llu piunrirteqapiggluki.

¹⁴Pitegcauteten kaputellruut ciuliqagtiitnun anguyagtain ellarayagtun taillrani cekavvnaluta, ciriteklirluni nallunarcarluteng nangcitulitun arrsaulrianek.

¹⁵Tutmautellruan imarpik horse-aarpegun, merpai-llu qapuurrluteng.

¹⁶Niilluku man'a tamalkuan uulegtua; qerrlugka qiivlutek alingama. Temka unairtuq, paallagyarpiaralua-llu piyuallemni. Nepaunii utaqalgirciqua pillerkam tekitellerkaanek, Agayutem anucimirqecetaarillerkaanek anguyagluteng curukartemten̄ek.

¹⁷Figs-aat napait atsailengraata wine-arkanek-llu naugitulit atsangenrilengraata, olive-aanek naucetaat naunrilengraata, naucetaarviit-llu mukaarkanek naugivkenateng, qusngit tamarmeng tuquangraata kuluviit-llu uitaviit imaunateng,

¹⁸wiinga cali angnirciqua nunaniryuglua-llu, tua-i-wa ATANEQ Agayun anirturtekngamku.

¹⁹Quyinrulriim ATANREM piniliumalaraanga. Tuc'uvkalaraanga tuntutun aarnarqellriamun-llu pivkaqsaunii ingrini.