Read Yupik Zephaniah 2 Bible Online

Zephaniah 2 - Yupik bible

Zephaniah 2

¹Elpet kasnguilngurmi atanruvigmi, ellangcaa

²ayagcecimavailegpet carangllugtun anuqem tengeskiitun, uuqnarqellria eq'uqertii ATANREM tupailgan elpenun, erneq ciullegluku ATANREM eq'uqertellerminek nasvagillerkaa.

³ATANEQ cauciu, yugni nunam pivakenritellriarini, niisngastaini alerquutain. Piciulria aturciu, elpecen̄ek pivakenrirluci ciuqerrani ATANREM. Aipaagni anagciquten anucimirqecetaarutmek tuani ATANREM eq'uqertellni nasvakaku.

⁴Gaza-mi yugmek unegtellriartangqerrngaituq. Ashkelon-aaq-llu yuiruciiqluni. Ashdod-aam-llu yui ancimaciqut erenrem avgani, Ekron-aam-llu cali yui ancimaciqut nunarpameggnek.

⁵Nakleng elpeci Philistine-ani, imarpiim caniani nunalegni. ATANREM pinarqelriaruniluci piaci. Piunrirciqaaci, atauciunger'mi-llu ilasi uitacimangaituq.

⁶Nunasi imarpiim cen̄iini carr'ilqaurciiquq, tua-i tau͡gaam qusngiliurtet uqisngaviita qusngit-llu casguita uitalleqsagulluku.

⁷Imarpiim cen̄ii piksaguciiqaat piunrirpek'nateng unegtellret Judah-m yuin. Tamana qusngiliurvikciqaat qavarvikaqluki-llu enet Ashkelon-aam enai. ATANREM Agayutiita nayurciqai tukuurtelluki-llu ataam.

⁸ATANEQ Artuqailnguq qanertuq, “Niitellruanka yuk'ek Moab-ankuk Ammon-aaq-llu caunrilkuurillratni yumnek eqcirluki tuaten, ucuryaggluteng-llu nuniit teguciqniluku.

⁹Tau͡gaam wiinga unguvalua Atanrucimtun, Israel-aam Agayutii, ukvernarcariunga Moab-ankuk Ammon-aaq-llu piunriumaciquk Sodom-aatun Gomorrah-tun-llu. Nunakek teq'alleqsaguciiqaak taryum imumirpak-llu uitavigkarniiciiquk, naunerrluut-llu naulukek. Yum'a piunrinritellret uayarciqagket nunautiik-llu teguluku.”

¹⁰Tuaten Moab-am Ammon-aam-llu yuk'ek anucimirqecetaarumaciqut ellmeggnek pivakellrat pitekluku ucuryagtellrat-llu caunrilkuullrit-llu ATANREM Artuqailnguum yui pitekluku.

¹¹ATANREM cakneq alingevkarciqai. Agayutnguat-llu nunami caunrirciqai, nutaan-llu atanruviit tamarmeng agayularciqut elliinun, tamarmeng nakmiin nunameggni.

¹²Cali-llu ATANREM yui Ethiopia-m tuqurqeciqai.

¹³ATANREM pinini aturluku Assyria piunrirciqaa. Nunarpak-llu Nineveh yuirulluku imenrurtelluku, kinertellriarurtelluku mer'unani.

¹⁴Katngat ayuqenrilnguut-llu ungungssiaraat qungelravikelarciqaat. Iggiayulit imenrini uitalarciqut egalerni qalriagaqluteng. Tulukaruut-llu qalrialarciqut ikirtuqat mayuryaraitni. Murakegtaar-llu cedar-aaq enenek au͡g'arqumaluni.

¹⁵Tuaten pimaciquq tauna nunarpak ucuryagutekilria elliin piniminek umyuarteqluni-llu camun pingaicukluni. Yui umyuartequt nunarpagteng ucurnarqenruyukluku allani ellarpagmi. Watqapik nunakarniiruciiquq, yuilqum ungungssiin igteksagulluku. Kitulriit-llu tamaaggun ulurmialarciqaat alikluku.