Read Yupik Zephaniah 3 Bible Online

Zephaniah 3 - Yupik bible

Zephaniah 3

¹Nakleng Jerusalem-aaq, assiitqapigtellria, inglulitaaryulria-llu nunarpak nangcilria nakmiin yum'inek.

²Niisnganritaa ATANEQ ciuniurpek'naki-llu alartellmi kitugutai. ATANEQ-llu tusngavikeksaunaku ikayungcarvikeksaunaku-llu.

³Atanerruari yugtutulitun maruaralriatun ayuqut; cuqcistai kailriatun keglunertun ayuqluteng, ilakuiyuunateng unuakutarkameggnek.

⁴Prophet-aari aglumatarluteng murilkevkenateng-llu; agayulirtaita-llu menuurtaqluki kencignarqelriit, alerquutai-llu Agayutem aturaqluki ellaita tau͡gaam piluaqautekameggnun.

⁵Tau͡gaam ATANEQ nunarpagni cali uitauq; piciulria aturrlainalaraa piciunrilngurmek piyuunani. Unuaquaqan pinricuunani, eluaruciq atularaa yum'inun. Tau͡gken elluanrilnguut yuut tuani assiilnguq aturturalaraat kasnguyuyuunateng.

⁶ATANEQ qanertuq, “Atanruviit yuirutellruanka; nunarpait piunrillruanka, nuniita-llu casgua kiarrvii-llu caunrirluki. Nunarpiit yuitut; tumyarait-llu yugtaunateng, atauciungraan yugtaunani.

⁷Umyuarteqellruyaaqua tuani nutaan yumnun takaryagutnayuklua ciuniurluki-llu alartaqata kitugutenka, nalluyagutenritnayukluku-llu elitnaurutkelqa ellaitnun. Tau͡gaam ak'anun pivkenateng ciungani ayuqucillermegcetun ayuqlirillruut.”

⁸ATANEQ qanertuq, “Utaqaciu erneq pinarqelriarurcecillerkaqa atanruvignek. Pillerkiurtua quyurcetnaluki atanruviit angayuqauviit-llu elpekevkarnaluku ellaitnun qenertellma tuknitacia. Nuna tamarmi eq'uqertellma kenrakun piunriumaarkauguq.

⁹“Nutaan yinqigciiqanka atanruviit, kiima-llu piicagvik'larciqaatnga allanun agayutnun pivkenateng. Tamarmeng niisngaciqaatnga.

¹⁰Yaaqsingraan-llu Sudan-amek cekavtellriit yuunka taitelarciqut elliitnek wangnun.

¹¹Taum nalliini elpeci, yumni, kasngukenrirciqerci inglulitaallerci wangnun. Wiinga au͡g'arciqanka ellmeggnek pivakellriit ucuryagtellriit-llu, elpeci-llu inglulitenqiggngaituci wangnun kencignarqellriami qemimni.[1]

¹²Tuavet elliiciqua pivakenrilngurnek ellmikutuulrianek yugnek, tailararkanek wangnun ikayuusqelluteng.

¹³Israel-aam yuin unegtaulriit kina imna iqlutun pingaitaat, iqluularngaitut, ukvercilarngaunateng-llu. Tukuuciqut alingniurpek'nateng-llu, kitumek alikek'ngaunateng.”

¹⁴Aturci qayagpagaci-llu nunaniryugluci, Israel-aam yuini! Jerusalem-aaq, nunaniryua pitacirpetun!

¹⁵ATANREM arulairtellrua anucimirqecetaaruten; aug'allruluki-llu inglukesteten tamalkuita. ATANREM, Israel-aam ATANRAN, nayuraaten; camek alingyunairutaaten.

¹⁶Pillerkaq tekiciiquq waten qanllerkaat Jerusalem-aamun, “Alingenrilu, Zion-aam nunarpiini! Talligken pinialivkaryaqunakek!

¹⁷ATANREM Agayutvet nayuraaten; pinian cirlakivkalaraaten. ATANREM ilukegcitkeciqaaten, kenekmikun-llu nutaramek unguvamek cikirciqaaten. Aturciquq-llu nunaniryuutekluten,

¹⁸nunaniryugluni nerevkariyaram nalliinicetun.” ATANEQ qanertuq, “Aarnarqellria ciunerkarci au͡g'allruaqa kasngunarqellerci-llu cali au͡g'arluku.

¹⁹Pillerkaq agiirtuq! Anucimirqecetaarciqanka nangtesteci; anauciiqanka tamalkuita tussitellriit nunameggnek-llu ayagcecimallret ut'rulluki. Kasngunarqellrat cimirciqaqa takarnarqutmek, ellarpiim-llu tamarmi nanrarciqai.

²⁰Pillerkaq agiirtuq! Ut'ruciiqanka cekavcimalriit yut'en; pivakumavkarciqamken nanrartelluten-llu ellarpagmiunun tukuurtelluten-llu ataam.” ATANEQ qanertuq.