Read Yupik Haggai 1 Bible Online

Haggai 1 - Yupik bible

Haggai 1

¹Allrakum aipaan nalliini Darius-aaq angayuqrullrani Persia-mi, erenret ciuqliatni arvinelgatni iralut, ATANEQ qanertuq prophet-aakun Haggai-akun. Man'a-llu qanerkaa ciunerluni nunam atanranun Judah-mi, Zerubbabel-aamun qetunraanun Shealtiel-aam, agayulirten͞gunermun-llu, Joshua-mun Jehozadak-aam qetunraanun.

²Artuqailnguq ATANEQ qanertuq Haggai-amun, “Ukut yuut qanertut watua pillerkaunritniluku Agayuvigpiim ataam nautellerkaanun.”

³ATANREM-llu nutaan qanrutai yuut prophet-aakun Haggai-akun:

⁴“Wiinga yumaa, ciin elpeci uitaqatarceci taq'luaqaumalriani eneni Agayuvigpaka tau͡gken imumaluni?

⁵Tangerciigataci-qaa cat elpecen̄un tut'ellriit?

⁶Nauceciillruuci amllernek mukaarkanek, tau͡gken quyurciaqluci ikgelngurnek. Neqkautengqerrsaaquci, tau͡gaam aqsitkauvkenateng. Wine-amek merkangqertuci, tau͡gaam camirrluci merkarpecen̄ek piinaci! Aklungqerrsaaqluci, tau͡gaam urumatkesciiganaki. Calistet-llu akingesciiganateng yuutekameggnek.

⁷Tangerciigatarci-qaa ciin waten picianek?

⁸Watua ayagci qeminun, tuskanek aqvalluci, ataam nauciu Agayuvigpak; nutaan wiinga ilukegciniartua nanraumalua-llu nanraumanarqucimtun.

⁹“Neryuniularyaaquci amllernek quyurcinayukluci naugillerpecen̄ek, tau͡gaam ikgetaqluteng. Quyurtelci-llu ut'rutlerpecen̄i wii tengcetellruanka. Ca pitekluku tuaten pisia? Tua-i-wa Agayuvigpaka imumiin elpeci-wa tamarpeci yagarcetellriaci caliaqluki nakmiin eneci.

¹⁰Taumek ellalliqsailnguq cat-llu nausciiganateng.

¹¹Kinernaq tuc'etaqa nunamun—qemiinun, naucetaarvignun mukaarkanek, wine-arkanek, olive-aat-llu nauciriviitnun— tua-i tamalkuitnun nunami nautulinun, cali-llu yugnun ungungssinun-llu, tamalkuitnun nauceciitukevcen̄un.”

¹²Tua-llu Zerubbabel-aaq Joshua-llu tamarmeng-llu yuut utertellret teguarullermeggnek Babylonia-mi, pillruut ATANREM Agayutem qanrutellranek pisqelluki. Alingameng niitaat prophet-aaq Haggai-aq, ATANREM qanertii.

¹³Tua-llu Haggai-am ATANREM qanellranek qanrutai yuut: “Wii nayurciqamci—tauna wii akqutkaqa.”

¹⁴ATANREM-llu tengruvkarai yuut tamalkuita caliaqellerkaanek Agayuvigpak: Zerubbabel-aaq, Judah-mi nunam atanra; Joshua-wa Agayulirten͞guneq, tamarmeng-llu yuut utertellret teguarullermeggnek. Ayagnirtut caliaqluku Agayuvigpii ATANREM Artuqailnguum, Agayutmeng,

¹⁵erenret yuinaq cetamanek ciptellratni, iralut arvinelgatni allrakum aipaani Darius-aaq angayuqrullrani.