Read Yupik Haggai 2 Bible Online

Haggai 2 - Yupik bible

Haggai 2

¹Ernermi yuinaq ataucimek (21) cipluku iralut malrunelgatni tuani allrakumi, ATANEQ qanenqigtuq prophet-aakun Haggai-akun.

²Elliin qanrutaa Haggai-aq qanresqelluku Zerubbabel-aamun, Judah-mi nunam atanranun, Joshua-mun Agayulirten͞gunermun, yugnun-llu, waten qanresqelluku,

³“Kitumek-qaa akunlevcen̄i pitaituq cali umyuaqestiinek tangnirqetallranek Agayuvigpiim? Qaillun watua tangellra elpecen̄un ayuqa? Caunrilngurtun ayuqsugnarquq.

⁴Tau͡gaam watua tengrunriqertenrilli kina ilasi. Caliarkaq caliaqiciu, tua-i wii nayuamci.

⁵Egypt-aamek anllerpecen̄i, akqellruamci nayurrlainarciqniluci. Cali watua wii nayuramci, taumek alingenrici.

⁶“Ak'anun pivkenii arulaciiqaqa qilak ellarpak-llu, nuna imarpik-llu.

⁷Atanruviit-llu tamalkuita cirliqevkarciqanka, tukuutait-llu taicimaciqut maavet, Agayuvigpak-llu imarturiciquq tukuutnek.

⁸Tamalkuan qerrirliutii suulutaarutii-llu ellarpiim wii pikaqa.

⁹Nutaraq Agayuvigpak tangnirqenruarkauguq ak'allarmi, tuani-llu cikirciqanka yuunka nuuqitenritlerkaatnek uitanqegcillerkaatnek-llu.” ATANEQ Artuqailnguq waten qanertuq.

¹⁰Yuinaq cetamanek ciptellratni (24) erenret qulngunritariitni iralut allrakum aipaani Darius-aaq angayuqrullrani, ATANEQ Artuqailnguq qanenqigtuq prophet-aamun Haggai-amun.

¹¹Qanertuq, “Apeski agayulirtet qaillun uum apyutem picirkaanek:

¹²Piinanermini-mi kina imna teguskuni iliinek qigcignarcaumalriim kemgem elliitem ekuagarkam, ayaulluku-llu imgulluku ulikutami imenranun. Tua-i-llu taum agtuuteskuniu ulikutani kelipamun, neqkamun keniumalriamun, wine-amun, olive-aam uquanun, wall'u ayuqenrilngurnun neqkanun, tuaten-qaa pillran kenciknarivkarciqai-llu tamakut neqkat?” Waten apcimallermeggni agayulirtet kiugut, “Qang'a.”

¹³Tua-llu Haggai aptuq, “Piinanermini-mi kina imna menuureskuni tuqumalriamek agtullni pitekluku. Tua-i-llu agtuquniki iliit makut neqkat, tamakut-llu-qaa menuurciiqut?” Agayulirtet kiugut, “Aa-ang.”

¹⁴Tua-llu Haggai-aq qanertuq, “ATANEQ qanertuq tamana tuaten ayuqniluku yuinun uum atanruviim caliaritnun-llu tamalkuitnun; taumek elliitait tamarmeng ekuavigmun menuulriaruut.”

¹⁵ATANEQ qanertuq, “Tangerciigatarci-qaa qaillun pillrucirci? Agayuvigpak ataam naparpailegpeciu

¹⁶mukaarkanek aqvat'laryaaquci neryuniurluci cuqnernek yuinarnek unangnayukluci, tau͡gaam qulnek kiingan pitarluni. Wine-amek-llu aqvat'laryaaquci yuinaak malruk qulnek cipluku gallon-aanek unangnaluci puckamek, tau͡gken yuinarmek tau͡gaam unangluci.

¹⁷Anuqlircetellruaqa cakneq kiircetellriamek kavcirtelluku-llu assiirutesqelluki tamalkuita nauvkangnaqkengaci, tau͡gaam cali elpeci umyualinqigtenrituci.

¹⁸Unuamek erenret yuinaq cetamanek ciptuq iralut qulngunritariit Agayuvigpiim tusnganrin qaqicimallrat. Tangerqiciki cat piarkat wak'nirnek.

¹⁹Mukaarkat nangengraata, napat-llu wine-arkanek naugitulit, fig-at napait, atsat pomegranate-at, olive-aat-llu napait naugiksailengraata, tau͡gken waken ayaglua atawaqerceciiqamci.”

²⁰Ernermi tuani, iraluq yuinaq cetamanek cipluku ernengqerluku, ATANREM aipiriluku Haggai-aq qanrutaa qanerkaanek

²¹Zerubbabel-aamun, nunam atanranun Judah-mi: “Arulatarkaurtaqa qilak nuna-llu

²²piunrirluki-llu angayuqauviit piningqellrat iquklitelluku. Kitnguciiqanka akalrialget ekumastait-llu; horse-aarit tuquciqut, ekumavikestait-llu tuqurquciiqut.

²³Ernermi tuani teguciqamken, Zerubbabel pistemni, elkarciiqamken-llu atanirturisqelluten atemkun. Elpet wii cucukellruamken.” ATANEQ Artuqailnguq qanertuq.