Read Yupik Zechariah 1 Bible Online

Zechariah 1 - Yupik bible

Zechariah 1

¹Iralut pingayunelgatni allrakum aipani Darius-aaq angayuqruluku Persia-mi, ATANREM uumek qanerkamek cikiraa prophet-aaq Zechariah, Berechiah-m qetunraa Iddo-m tutgarii, qanerluni,

²“ATANREM qenrutellrui cakneq ciuliaci.

³Tau͡gaam watua qanruski, ‘Uterci wangnun, wiinga-llu elpecen̄un uterrniartua.

⁴Ciuliarpecetun ayuqenrici. Ak'a tamaani prophet-aatgun qanrucimallruyaaqut assiilnginermek taqesqelluki. Tau͡gaam niicunritaatnga.

⁵Tamakut-llu ciuliaci prophet-aat-llu maa-i unguvanrirluteng.

⁶Pistemkun prophet-aatgun ciuliaci alerquutnek cikillruanka aarcirtuutnek-llu, tau͡gaam tamakut catkellrunritait taumek ellaita pikiurarteng atullrukiit. Tua-i-llu umyualinqigtellruut nallunairluteng-llu qanerluteng, Wangnun ATANERMUN Artuqailngurmun, anucimirqecetaallrucirteng pinarquciat aturluku piarkaurtellemtun-llu.’”

⁷Allrakum aipani Darius-aam atanrullran, qula ataucimek cipluku iraluq ernengqerluku yuinaq cetamanek (24) cipluku (Shebat-aam iralua), ATANREM unugmi qanerkamnek cikiraanga.

⁸Tangertua yugmek ekumaluni kavirlimi horse-aami. Arulairluni-llu myrtle-aat napat akuliitnun kuignayugmi, kingunra cali allanek horse-aanek pitarluni—kavirlimek, kukupalegmek, qatellriamek-llu.

⁹Wiinga-llu aptaqa, “Camek makut horse-aat kangingqertat?” Kiugaanga, “Nasvagciqaqa elpenun camek kangingqeruciat.

¹⁰ATANREM ayagcetelqai nuna yuvriisqelluku.”

¹¹Taukut-llu an'gilaq qanrutaat, “Ellarpagmun tamiinun ayagallruukut tangrrarput-llu ellarpak tamarmi casciiganani cirlakumaluni.”

¹²An'gilaq-llu qanertuq, “Artuqailnguq ATANEQ, qenrucimakten-tang Jerusalem-aaq, Judah-m-llu nunarpai allrakuni yuinarni pingayuni qulnek cipluku (70). Qaillun cali pitalria pellugciqaa takumcuyagupailegpeki?”

¹³ATANREM-llu an'gilaq tauna qalarutesteka qaruyutnek kiugaa,

¹⁴an'gilam-llu qanrutaanga qalarutkesqelluki ATANREM Artuqailnguum qanellri: “Kenkaqa cakneq umyuarniurutekluku-llu Jerusalem-aaq, tanqilria nunarpaka,

¹⁵qenrutanka-llu cakneq atanruviit elluiluteng uitalriit. Yuunka qenrutengramki caksailnginanemni, tamakut atanruviit yum'a nangteqellrat arcarivkallruatgu.

¹⁶Taumek utertellruunga Jerusalem-aamun nasvagnaluku takumcuyugtaciqa nunarpagmek. Agayuvigpaka nutarcimaciquq, nunarpak-llu ataam naucimaciquq.”

¹⁷An'gilam cali waten qanresqaanga: “ATANEQ Artuqailnguq qanertuq nunarpani ataam tukuurciiqniluki ataam-llu Jerusalem-aaq ikayurciqniluku elliin-llu piksagulluku nunarpak.”

¹⁸Allamek cali tangrruallemni tangertua cetamanek cirunernek.

¹⁹Aptaqa tauna an'gilaq qalarutesteka, “Cirunret ukut camek kangingqertat?” Kiugaanga, “Ukut kangingqertut ellarpagmi pinilrianek cekavcestellritnek yuita Judah-m, Israel-aam, Jerusalem-aam-llu.”

²⁰Tua-llu ATANREM nasvitaanga cetamanek calisten̄ek mulut'uulegnek.

²¹Aptaqa, “Ukut camek caliyarturluteng taigat?” Kiugaanga, “Taigut alingniurcecarturluki cirlaksarturluki-llu atanruviit passitestellri Judah-m nuniin cekavvluki-llu yui.”