Read Yupik Zechariah 12 Bible Online

Zechariah 12 - Yupik bible

Zechariah 12

¹Una qaneryaraqaa Israel-aaq piluku ATANREM, ATANREM sagcestellrata qiliit, piliaqestellran ellarpiim, yuk-llu unguvalriarurtelluku. Ellii qanertuq,

²“Jerusalem-aaq saskam imaatun wine-atun ayuqlirivkarciqaqa; atanruviit avaqlii merciqut ayalualuteng-llu taangiqellriatun. Jerusalem-aaq-llu avataiqatgu, Judah-m-llu nunarpai avatairumaciqut.

³Tau͡gaam tauna pillerkaq tekiskan, Jerusalem-aaq teggalqutun uqamailngurtun ayuqlirivkarciqaqa; kina imna angayuqauvik kevengnaqestii akngirciiquq. Tamarmeng nunam angayuqauvii iliksaguciiqut curugnaluku.

⁴Taum nalliini tamalkuita horse-aarit alingmun tuc'eciiqanka ekumastait-llu usviirutelluki. Judah-m yui qaunqeciqanka, tau͡gaam cikmirceciiqanka inglukestaita horse-aarit.

⁵Tua-i Judah-m yui ellmeggnek qanruyuciiqut ‘ATANREM Agayutem Artuqailnguum pinirivkalarai yun'i Jerusalem-aami uitalriit.’

⁶“Taum nalliini Judah-m yui naparugarni kenertun ayuqeciqut, wall'u mukaarkatun avurnarilriatun piunrirciqait tamalkuita avaqliteng atanruviit. Jerusalem-aam yui assirluteng uitaciqut nunarpagmi.

⁷“Wiinga, ATANEQ, cirlakivkarciqanka Judah-m anguyagtai ciumek, takarnarqun tut'arkaq David-aam kinguvrinun Jerusalem-aam-llu yuinun pinrusqevkenaku Judah-m yuin pikaatni.

⁸Taum nalliini ATANREM camun pivkarngaitai Jerusalem-aami uitalriit, pinialkacagait-llu David-aatun pinirtariciqut. David-aam kinguvrin ciuliqagciiqait ATANREM an'gilaatun, Agayucetun.

⁹Taum nalliini piunrirciqanka tamalkuita atanruviit anguyangnaqestai Jerusalem-aam.

¹⁰“David-aam kinguvri allat-llu Jerusalem-aam yui imirciqanka anerneranek takumcukiyaram anerneranek-llu piicagyaram. Tangerciqaat nuussikun kapurluku tuqutellrat, angniilutekciqaat-llu angniilutkelauciatun mikelnguq kiimi irniarulria. Cakneq angniiciiqut, tuquilriatun qetunranguteqarraamegnek.

¹¹Taum nalliini Jerusalem-aami angniitellrat angelriaruciquq angniilutkellracetun Hadad Rimmon-aaq[7] Megiddo-m nuniini.

¹²Ilakuralriit allakarmeng qivruyaraq aturciqaat: ilakuralriit kinguvalriit David-aamek, Nathan-aamek, Levi-amek, Shimei-amek, allanek-llu ilakuralrianek. Ilakuralriit allakarmeng tamana aturciqaat, angutaita-llu ilakuralriit allakarmeng aturluku arnanek ilangqerpek'nateng.”