Read Yupik Zechariah 13 Bible Online

Zechariah 13 - Yupik bible

Zechariah 13

¹ATANEQ Artuqailnguq qanertuq, “Pillerkaq tauna tekiskan ulvelria ikirciiquq menuirutkaat David-aam kinguvrin, Jerusalem-aam-llu yuin assiilnguitnek agayutnguanun-llu agayulallratnek.

²Taum nalliini agayutnguat atrit au͡g'arciqanka nunamek, kia-llu umyuaqenqiggngaunaki. Au͡g'arciqaqa kina imna prophet-aarunilria agayutnguanun-llu agayulallrat piyuumiirutelluku.

³Iliit-llu ciumuaqan prophet-aaruyugluni, nakmiin atiin aaniin-llu qanruciiqaak tuqutnaqniluku, tua-i-wa qanran qanerniluni ATANREM qaneryaraanek, tau͡gken iqluurutnek qalarrluni. Prophet-aam caliaranek calikan, nakmiin atiin aaniin-llu kapluku tuquciiqaak.

⁴Pillerkaq tauna tekiskan, prophet-aam caliani tun'e'ryaguciiqaa wall'u prophet-arunguarluni wall'u prophet-aam maqarcetellriamek aturaanek asngaunani ukvertengnaqnaluki yuut.

⁵Tau͡gaam qanerciquq, ‘Wiinga prophet-aarunritua. Nauceciiyurten͞guunga, yuurqaanemnek nauceciiyurten͞guama.’

⁶Tua-llu iliita apeskani, ‘Caugat tamakut kilinret qat'garpeni?’ kiuciquq, ‘Kilirtulqanka yugnikestem̄a eniini.’”

⁷ATANEQ Artuqailnguq qanertuq, “Tupagluten, nuussirpaak, curukarru qusngiliurta[8] calisteka! Tuqusgu, qusngit cekavvniartut. Curugciqanka yuunka

⁸nunami-llu tamiini yuut pingasuirtellrit malruin tuquciqut, pingasuirtellrit tau͡gken atauciq unguvaarkauluteng.

⁹Taukut-llu atauciq pingasuirnerat unguvalriit pitassiarciqanka menuircarluki qerrirlimek menuircarilauciicetun kenerkun. Pitassiarciqanka suulutaam pitassiarumalauciatun. Nutaan piicagciqut wangnun, wiinga-llu kiuciqanka. Qanruciiqanka wangnun yukniluki, ellait-llu nallunairciqut ellaita Agayuteknilua.”