Read Yupik Zechariah 14 Bible Online

Zechariah 14 - Yupik bible

Zechariah 14

¹ATANREM aqumellerkaa qanercetaarvigmun mallgiuq. Tua-llu Jerusalem-aaq uayaumaciquq, tangvagciqaci-llu uayaaqengat averqumakata.

²ATANREM atanruviit taiciiqai anguyaasqelluku Jerusalem-aaq. Nunarpak tegumaciquq, enet-llu uayarciqait, arnat-llu akusrarutekumaciqut. Avgit yuut nunameggnek ayaucimaciqut, tau͡gaam tuanelnguut ayaucimangaitut nunarpagmek.

³Nutaan-llu ATANREM callugyarturciqai tamakut atanruviit, tamatum ciungani pilallmitun.

⁴Taum nalliini nangengqaciquq Olive-aam Ingriani, Jerusalem-aam calaralirnerani. Olive-aam-llu Ingria qupciquq malruirrluni calaramek kanavamun kuignayugpiim caniani. Avga ingrim negetmun ayagluni, avga-llu ungalatmun.

⁵Qimagciquci tamaaggun ingrim malruirrluni avgutiignegun. Elpeci qimagciquci ciuliarpecetun nuna pektellrani Judah-m angayuqran Uzziah-m nalliini. Tuani ATANEQ Agayutka taiciquq, an'gilat tamalkuita malikluki.

⁶Taum-llu nalliini, nengletairuciiquq wall'u kanermek,

⁷cali-llu tan'gertairulluni. Erenrem tanqianek pitangqerrlainarciquq, unuungraan. Tau͡gaam tuaten ellillerkaa ATANREM kiimi nallunritaa.

⁸Tauna erneq tekiskan, meq'egtaar qurrlurciquq Jerusalem-aamek, avga qurrlurluni Dead Sea-mun, avga-llu Mediterranean-aamun. Qurrlurciquq allrakuq kassuggluku, ellalliqsaitellran nalliini ayuqluku ellallillran-llu nalliini.

⁹ATANEQ-llu ataneqciqaa nunam tamarmi; yuut tamarmeng agayuvikelarciqaat Agayutnguluku nalluvkenaku-llu tuaggun atrakun.

¹⁰Nuna tamarmi, Geba-mek neglirnermi ayagluni Rimmon-aaq tekilluku ungalalirnermi, manigcimaciquq. Jerusalem-aaq quyigluni quliinciiquq avatmini nunami; nunarpak-llu angtaciquq Benjamin-aam Amiiganek ayagluni Kangiram Amiiganun tekilluni, tuavet ciungani amigtangqellermun, Hananel-aam-llu Qertulriaranek atanret wine-arkanek atsanek itumcissuutiit tekilluku.

¹¹Yuut tuani uitaciqut camek alingniurpek'nateng, aarniurcecimanrirluteng pillugnarqelriamek.

¹²ATANREM-llu tuknilria cangerlak tuc'eciiqaa tamalkuitnun atanruvignun Jerusalem-aam anguyagtek'lallrinun. Kemgit aruciqut unguvangraata; iingit alungutait-llu aruciqut.

¹³Taum-llu nalliini ATANREM tuuskayagceciiqngateng alingevkarluki-llu yuk caniqliteng teguluki callugnayukluku.

¹⁴Judah-m angutai anguyagciqut teguvkanritengnaqluku Jerusalem-aaq. Atanruviit-llu tamalkuita uayarciqait tukuutaitnek, suulutaamek, qerrirlimek, aturanek-llu amlleriluki.

¹⁵Tuknilriim cangerliim tuciiqai horse-aat, ciulviit, qulugnelget ungungssit, tuciiquq tamalkuitnun ungungssinun inglukestaita uitaviatni uitalrianun.

¹⁶Atanruviit-llu yuit anguyallermeggni Jerusalem-aaq tuqullrunrilnguut tuavet ayalarciqut allrakut tamalkuita agayuyarturluteng ATANERMUN Artuqailngurmun Uqisviit-llu Nerevkaritiit aturnaluku.

¹⁷Naliat imna atanruviit agayuyarturyuumiilkan ATANERMUN Artuqailngurmun, tua-i ellallirngairuciiquq nuniit.

¹⁸Egyptian-aat aturyuumiilkatgu Uqisviit Nerevkaritiit, cangerliim tuciiqai ATANREM tuc'etarkaan tamalkuitnun atanruvignun piliyaryuumiilngurnun.

¹⁹Man'a anucimirqecetaarutkaqaa Egypt-aam allat-llu tamalkurmeng atanruviit atunrilkatgu Uqisviit Nerevkaritiit.

²⁰Taum nalliini horse-aarit-llu uskuraita kuluk'uunaqengraiceteng igangqelarciqut, “Qigcignarqelriaruuq ATANERMUN.” Egatet Agayuvigpagmi kencignarqetariciqut qantatun ekuaviim ciuqerrani uitalriatun.

²¹Tamarmeng egatet Jerusalem-aami tamiini-llu Judah-mi allakaumaciqut agayuaqameng tau͡gaam ATANERMUN Artuqailngurmun atulararkauluki. Yuut elliilriit tuqutarkanek atularciqait kemgitnek keniraqameng. Tauna pillerkaq tekiskan, tunenialriartairuciiquq Agayuvigpiini ATANREM Artuqailnguum.