Read Yupik Zechariah 2 Bible Online

Zechariah 2 - Yupik bible

Zechariah 2

¹Allami cali tangrruallemni tangertua angutmek cuqcissuutmek tegumiarluni.

²Aptaqa, “Natmun ayagcit?” Kiugaanga, “Cuqcarturluku Jerusalem-aam qaillun taktacia qaillun-llu iqtutacia.”

³An'gilaq-llu imna qalarutestelqa tangrraqa ketvallrani, alla-llu an'gilaq taiguq pairrsaagluku.

⁴Ciuqliim aipani qanrutaa, “Aqvaqurluten qanrucarturru yun'erra'ar cuqcissuutmek tegumialria yuut amllepiarciqniluki ungungssit-llu amllepiarciqniluki Jerusalem-aami, angssiyaagciqngami-llu qacarnermek avaperutengqerciiganani.

⁵ATANEQ akqillruuq ellii qacarneruciqniluni kenruluni avatairluku nunarpak camun pivkarngaunaku tuani-llu uitaciqniluni ucurnartuumarmi.”

⁶ATANREM yun'i qanrutai, “Cekavtellruamci natmun tuavet tamiinun. Tau͡gaam waniwa, elpeci nunavcen̄ek ayagcetaullerni, qimagci Babylonia-mek uterrluci-llu Jerusalem-aamun.

⁸Kia imum yageskunici yagciiqaa wangni cani qununarqenrulria.” Taumek ATANREM Artuqailnguum ayagceskiinga uumek qanrucartuusqelluki atanruviit uayaarillret yum'inek:

⁹“ATANREM ellminek callugciqaaci, yuut-llu mat'um ciungani pisteklerpeci uayarciqaiceci.” Tamana piciureskan, yuut tamarmeng nallunrirciqaat ATANERMUN Artuqailngurmun ayagcetellruciqa.

¹⁰ATANEQ qanertuq, “Nunaniryugluci aturpagci, Jerusalem-aam yuini! Ullagluci uitallguciryartuqataramci.”

¹¹Taum nalliini amlleret atanruviit ullagciqaat ATANEQ yukliuyulluteng-llu elliinun. Akunlevcen̄i uitaciquq, elpeci-llu nallunriciiqerci elliinun ayagcetellruciqa elpecen̄un.

¹²Ataam cali Judah ATANREM umyuaminun iluqliuluku piksaguciiqaa qigcignarqellriami nunami, Jerusalem-aaq-llu nunarpak kenkenruciqaa allani.

¹³Nepaici, yugni tamarpeci, ciuqerrani ATANREM, tua-i-wa ellii taiqataan qigcignarqellriamek uitaviminek.