Read Yupik Zechariah 3 Bible Online

Zechariah 3 - Yupik bible

Zechariah 3

¹Allami cali tangrruallemni ATANREM nasvitaanga agayulirten͞gunermek Joshua-mek nangengqaluni ciuqerrani an'gilaan ATANREM. Caniani-wa Joshua-m Tuunrangayak nangerngalria[1] picetaarucumaurluku.

²ATANREM an'gilaan Tuunrangayak qanrutaa, “ATANREM pinarqelriarurrliten, Tuunrangayaak! ATANREM, Jerusalem-aam kenkestiin, pinarqelriarurrliten. Una angun ayuquq muragatun nucugaringallertun kenermek.”

³Joshua tuani nangengqauq, iqangtalrianek aturanek aturluni.

⁴An'gilam qilagmiut ciuqamini nangerngalriit qanrutai, “Iqangtalrianek aturanek una angun matarciu.” Joshua-llu qanrutaa, “Assiilnguten au͡g'allruanka nutaranek-llu aturarkarpenek cikirciqamken.”

⁵Taukut ciuqamini nangengqalriit alerqurai Joshua iqailngurmek nacaasqelluku. Tuaten taukut piut, ac'etaat-llu nutaranek aturanek ATANREM an'gilaa tuani nangengqallrani.

⁶An'gilam Joshua qanrutaa,

⁷ATANREM Artuqailnguum qanellranek: “Niisngakuvki alerquutenka caliaqluki-llu caliarkiutellrenka elpenun, taqevkenak ataniumalarciqan Agayuvigpaka elaqlia-llu, piicagaqavet-llu niitaqluten, niitelaucimtun an'gilat uitallgucirlua uitalriit.

⁸Niicugni kitaki, Joshua, elpet Agayulirten͞gunrulriami; niicugnici-llu, agayulirten͞gunrulriallgutaini, elpeci nallunailkutaulriani assilriamun ciunerkarpecen̄un: Nallunrirceciiqaqa pisteka, aterpagcimalria Avayaq!

⁹Joshua-m ciuqerranun elliigua ataucimek teggalqumek malrunlegnek manigcaumalriartalegmek qaimikun. Wiinga-llu igarciqua taum qainganun, ernermi-llu ataucimi nunam mat'um assiilngui au͡g'arluki.

¹⁰Erneq tauna tekiskan, tamarpeci kelgiciquci nunalgutevcen̄ek, tailuki ilaliisqelluci uitanqegciluci uitallerpecen̄i camek alingniurpek'naci, uitavici avatairumaluteng naucetaarvigpecen̄ek wine-arkanek figs-aat-llu napaitnek.”