Read Yupik Zechariah 4 Bible Online

Zechariah 4 - Yupik bible

Zechariah 4

¹An'gilam imum qalarutestek'lallma ullanqigtaanga tupagglua-llu qavalriamek pilriacetun.

²Aptaanga, “Camek tangercit?” Kiugaqa, “Kenurrarvigmek piliaqumaluni suulutaamek. Kangrani-wa qantaq uqumek imangqerrarkaq. Kenurrarvik-llu malrunlegnek kenurrartarluni, tamarmeng ataucitaarluteng kumarucirvigluteng malrunlegnek.

³Atunem-llu avategkeni taum kenurrarviim olive-aam napagkenek pitarluni.”

⁴An'gilaq tauna aptaqa, “Camek makut kangingqellriaruat?”

⁵“Waqaa nalluan?” taum aptaanga. Kiugaqa, “Aa-ang, wiinga-tang nallukeka.”

¹⁰An'gilam qanrutaanga, “Malrunelgen kenurrat malrunelguut iingi ATANREM, taukut tangvagyugngaluku ellarpak tamalkuan.”[2]

¹¹Wiinga aptaqa, “Kenurrarviim avategkeni olive-aam napak camek kangingqertak?

¹²Camek-llu kangingqertak olive-aam napaan avayak caniagni suulutaak cupluk maqcissuutek olive-aam uquanek?”

¹³Aptaanga, “Waqaa nalluan?” Kiugaqa, “Aa-ang, nalluaqa.”

¹⁴Tua-i qanertuq, “Ukuk malruk angutek Agayutem cucukelqak mingullrulukek-llu kevgiuresqelluni, Atanra ellarpiim tamarmi.” Agayutem Akqutii Zerubbabel-aamun An'gilam qanrutaanga Zerubbabel-aaq uumek qanerkamek qanrutesqelluku ATANERMEK kingunelegmek: “Piluaqerciquten, anguyagtet piniatgun pivkenak wall'u elpet pinirpegun, tau͡gaam wiinga anernemkun. Pisciigalutekaten ingritun asvaitetangermeng ciunerpenek catairuciiqut. Agayuvigpak ataam nauciiqan, nangneq-llu teggalquq nunakaanun ellikuvgu, yuut qayagpagciqut, ‘Nutaan atam!’” Cali alla qanrutkarkaq taiguq wangnun ATANERMEK. Ellii qanertuq, “Zerubbabel-aam Agayuvigpiim tusnganri ellillrui, elliin qaqilluku caliaqeciqaa. Tuaten pikan, yum'a nallunriciiqaat wangnun ayagcetellrucin ellaitnun. Tau͡gaam qacuvallaumaut caliaqellra cukaipakaan. Tau͡gaam tangerciqaat Zerubbabel-aam taqeksaunani Agayuvigpak caliaqurallraku, ellait-llu quyaciqut.”