Read Yupik Zechariah 5 Bible Online

Zechariah 5 - Yupik bible

Zechariah 5

¹Ataam kiartua, tuani-llu tangertua kalikarmek imegyaramek ellakun tengaulriamek.

²An'gilam aptaanga camek-gguq tangercia. Kiugaqa, “Tangertua kalikarmek imegyaramek ellakun tengaulriamek; yuinaq qulmek cipluku (30) it'ganernek taktaluni akimiarnek-llu it'ganernek iqtutaluni.”

³Tua-llu qanrutaanga, “Qaingani igausngauq aniqlaan tut'arkaq tamiinun nunamun. Kalikarmi imegyarami una igausngauq teglengalriit tamalkuita nunamek au͡gaumaciqniluki; akmatii-llu qanerluni iqlulalriit ukvernarcarirraarluteng ayaucimaciqniluki.

⁴ATANEQ Artuqailnguq qanertuq ayagceciiqniluku una aniqlaan, iterciqai-llu tamalkuita teglengalriit enait iqlulalriit-llu ukvernarcarillrung'e'rmeng enait. Enaitni-llu uitaciquq navgurluki-llu imenrurrluki muraungraata, teggalquungraata-llu.”

⁵An'gilaq-llu qalarutestekelqa alainqigtuq qanerluni-llu, “Atam man'a alla cali agiirtellria tangerqerru!”

⁶“Cauga?” wiinga aptaqa. Kiugaanga, “Issratnguuq, tangrrutnguluni assiilnguanun nunam tamarmi.”

⁷Tauna-llu issran patungqertuq imarkamek lead-amek piliaqumalriamek. Tangvainanemni, patua ikirtuq, maaten ikirtuq issratem iluani arnaq aqumgalria!

⁸An'gilaq qanertuq, “Una arnaq assiitellriim tangrrutkaa.” Cingrraarluku-llu issratem iluanun patuluku.

⁹Ciugcama tangertua arnagnek malrugnek tengaurlutek agiirtellriignek tungemnun yaqurlutek qucillgartun. Tauna issran teguluku tenglutek ayautaak.

¹⁰Aptaqa tauna an'gilaq, “Natmun ayautan'gu?”

¹¹Kiugaanga, “Babylonia-mun, tuani agayuvigkaanek pilinaluteng. Agayuvik qaqiskan, issran tuavet elliciqaat ciktaarvik'laasqelluku.”