Read Yupik Zechariah 7 Bible Online

Zechariah 7 - Yupik bible

Zechariah 7

¹Darius-aam atanrullran cetamiitni allrakut qulngunritariit iralut cetamanek ernengqerluku (Kislev-aam Iralua) ATANREM qanerkamnek cikillruanga.

²Bethel-aam yuin ayagcetellruat Sharezer-aaq Regemmelech-aaq-llu ilakek ilakluki Agayuvigpiinun ATANREM Artuqailnguum piicagyarturtelluki ATANERMUN atawaqaasqesqelluteng

³aptesqelluki-llu agayulirtet prophet-aat-llu mat'umek: “Cali-qaa angniilutkurlaut piunriumallra Agayuvigpiim, yaagaqluta iralut tallimaurtaqata allrakut amlleret aturluki pillrucimcetun?”

⁴Una wani-wa qanerkaq ATANERMEK wangnun tailleq.

⁵Qanertuq, “Nunam yui qanruski agayulirtet-llu, yaagaqameng-gguq angniitaqameng-llu tallimiitni malrunelgatni-llu iralut ukuni yuinaat pingayun qulmek cipluki (70) allrakuni, wiinga umyuaqlua piksaitellruut.

⁶Ner'aqameng-llu-gguq merluteng-llu, ellaita tau͡gaam camirtellerkarteng pitekluku pilallruut.”

⁷Waten ATANEQ qanellruuq ciuqliitgun prophet-aat Jerusalem-aaq camek nuuqitenritellran nalliini yugyagluni-llu, yugugaat-llu nunarraqainarni nunarpiim avatiinelngurni uitallruvkenateng, tau͡gaam cali ungalalirnermi nunami uitalriartarluni kanaknalirnermi-llu ingrit aciatni qemini.

⁸ATANREM Zechariah uumek qanerkamek cikillrua:

⁹“Ak'a tamaani yuut waten alerqullruanka, ‘Cuqciaqavci yugnek piciuluci pilaqici, takumcukulluci naklekulluci-llu atunem.

¹⁰Nangciksaunaci aipainernek, elli'irnek-llu, allanernek-llu nunavcen̄i uitalrianek, wall'u kitumek imumek nuuqitellriamek. Picirkiuqsaunaci-llu qaillun piluku akngirkengnaluci ilavcen̄ek.’

¹¹“Tau͡gaam yuunka maligtaqutevkenateng niicugniyuumiitellruut. Umyuateng umegluki

¹²ircaquteng-llu teggalqutun tegtarivkarluki. Niicunrilata qalarutengramteng prophet-aatgun ak'a yuullerteggun, wiinga cakneq qenqertellruunga.

¹³Niicugnillrunrilata qanllemni kiullrunritanka piicallratni.

¹⁴Anuqerpagkun kagillruanka nunakumanrilngurni nunani uitasqelluki. Man'a nunakegtaar yuirutellruuq, atauciungraan uitavikestairulluni.”