Read Yupik Zechariah 8 Bible Online

Zechariah 8 - Yupik bible

Zechariah 8

¹ATANREM Artuqailnguum Zechariah waten qanrutaa:

²“Ikayuryuumilaryaaqaqa Jerusalem-aaq angelriamek kenkilqa yuinek pitekluku, kenkillma ellaitnek qenngucetellrui inglukestai.

³Uterciiqua Jerusalem-aamun, qigcignarqellriamun nunarpamnun, tuani-llu uitalua. Yuut nallunrirciqaat piciuluni nunarpaullrakun, qemia-llu ATANREM Artuqailnguum[3] aterpagingaciquq qigcignarqellriamek qemimek.

⁴Ataam angukara'urluut arnassagaat-llu, ak'allaurtem ugaani ayaruarluteng tarratengelriit aqumgalangeciqut tumyarat taqruitni.

⁵Tumyarat-llu ataam tan'gaurlurnek nasaurlurnek-llu yugyangciqut aquilrianek.

⁶“Man'a caperrnarqelriarungaciiqsaaquq wanirpak unegtaulrianun atanruviim yuinun, tau͡gaam wangni caperrnarqenrituq.

⁷Anirturciqanka yuunka nunanek ayaucimavillritnek,

⁸ut'rulluki-llu calaramek kanaknagmek-llu Jerusalem-aami uitasqelluki. Wiinga-llu yuk'eciqanka, ellaita-llu Agayutkeciqaatnga, atanirturluki piciulriakun ellualriakun-llu.

⁹“Caceturici! Niicavci wani-wa prophet-aat qaneryaraqellrita ayuqaitnek Agayuvigpiim tusnganerkai ellimallratni ataam nauteqatallermeggni.

¹⁰Tamatum ciungani kina imna caliarkanek yugnek wall'u ungungssiarnek pisciigatellruuq akiliutekailata, cali tamarmeng kelqurluteng inglukestemeggnek. Atunem ingluksagucetellruanka yuut.

¹¹Tau͡gaam maa-i unegtaulriit ciunganicetun ayuqutenritanka.

¹²Nauceciilarciqut camek alingevkenateng. Wine-arkat atsat napat epuit atsanglarciqut, nuna-llu naugilarciquq nauceciiganek, ellallillra-llu nurnarqevkenani. Makut atawaqautet tamalkuita cikiutekciqanka yumnun unegtaullernun.

¹³Judah-m Israel-aam-llu yuini! Avani pellullermi allanret aniqlaalallruit ilateng waten qanerluteng, ‘Picurlagatek'lallri-tuq Israel-aam Judah-m-llu yuin elpecen̄un tull'it!’ Tau͡gaam anirturciqamci, tamakut allanret qanlangevkarluki, ‘Atawaqautait atak Israel-aam Judah-m-llu yuin elpecen̄un tull'it!’ Taumek ciunerkairucaqunaci alingeksaunaci-llu.”

¹⁴ATANEQ Artuqailnguq qanertuq, “Ciuliarpeci qenqercetellratnga, picurlagnanek picirkiullruunga pinricen̄allrunritanka-llu, tau͡gaam picirkiullrenka piciurrluki.

¹⁵Tau͡gaam maa-i picirkiurtua atawaqercetnaluki Jerusalem-aam Judah-m-llu yui. Taumek alingyaqunaci.

¹⁶Makut tau͡gaam maa-i pilararkaci: Piciulrianek tau͡gaam ilavcen̄un qanraqluci. Apqaurvigni-llu cuqciaqluci elluarrluci, uitanqegcillerkamun ayagniutnguarkaulrianek.

¹⁷Umyuarrliquciksaunaci ilavcen̄ek. Piciunrilngurmek nallunairiksaunaci akqirraarluci piciulriamek tau͡gaam qanerciqniluci. Uumikaqa iqluquyaraq, elluanricaraq, calluayaraq-llu.”

¹⁸ATANREM Artuqailnguum una qanerkaq tunelqaa Zechariah-mun:

¹⁹“Yagyarat atulaqci cetamiitni, tallimiitni, malrunelgatni, qulngurutiitni-llu iralut nerevkariyaraurciiqut nunaniqluteng angnirnaqluteng-llu Judah-m yuinun. Taumek kenegyaguskiciu piciulria uitanqegcineq-llu.”

²⁰ATANEQ Artuqailnguq qanertuq, “Pillerkaq tekiciiquq yuut amllernek nunarpagnek taillerkaat Jerusalem-aamun.

²¹Nunamek tuaken pillret qanlarciqut nunamek allamek pillernun, ‘Wangkuta agayuqatartukut ATANERMUN Artuqailngurmun piicagluta-llu atawaqercetesqelluta. Maligcikut!’

²²Amllellriit yuut pinilegpiit-llu atanruviit tailarciqut Jerusalem-aamun agayunaluteng ATANERMUN Artuqailngurmun piicagnaluteng-llu atawaqercecesqelluteng.

²³Tamakuni ernerni qulen allanret ullalarciqaat atauciq Jews-aaq qanrulluku-llu, ‘Pillguciucugtukut tekitarkami pikarpenun, niitellruamta Agayutmun nayurniluci.’”