Read Yupik Zechariah 9 Bible Online

Zechariah 9 - Yupik bible

Zechariah 9

¹Una ATANREM qanelqaa: Ellii picirkirillruuq anucimirqecetaarutmek Hadrach-aam nuniinun nunarpiinun-llu Damascus-aam. Israel-aam yui kiingita pivkenaki Syria-m-llu atanruvia nunarpak ATANREM pikaa.

²Hadrach-aam-llu caniqlia Hamath-aaq pikaa, nunarpiik-llu Tyre-ankuk Sidon-aaq-llu, calitulrianek yulgek.

³Tyre-aq pilillruuq cayailkutkaminek quyurtaangluni-llu qerrirlinek suulutaamek-llu amllerem ugaani paivngariluteng marayatun!

⁴Tau͡gaam ATANREM teguiciqaa piinek tamalkuitnek. Tukuutai egciiqai imarpigmun, nunarpak-llu nangluni ekuavkaumaciquq.

⁵Nunarpiim-llu Ashkelon-aam tangerrluku tuaten pimakan alingeciquq. Nunarpiim Gaza-m tangerciqaa nangteqerpagluni-llu angelriamek. Tuaten-llu cali Ekron-aaq piciquq, neryuniurutai-llu navguumaciqut. Gaza angayuqriuciiquq, Ashkelon-aaq-llu yuin uniciiqaat.

⁶Ashdod-aaq-llu ayuqenrilngurnek yung'eciquq. ATANEQ qanertuq, “Philistine-at tamalkuita ellaitnek pivakenrirceciiqanka.

⁷Augtuumaita kemegnek nernanrirciqut, allanek-llu inerquusngalrianek. Tamalkuita unegtaulriit yum'a ilaksaguciqait Judah-m ilakellgutkelriaritun ayuqsagulluteng. Ekron-aam-llu cali yui, yum'a ilaksaguciiqait Jebusite-at[4] tuaten pillruciicetun.

⁸Murilkeciqaqa nunauteka anguyagtet-llu tamaagguirceteksaunaki. Nangciyulrianun yuunka nangcetenqiggngaitanka. Tangellruamku qaillun pitalriamek yuunka nangteqtallruciat.”

⁹Caknerpak nunaniryugci Zion-aam yuini! Qayagpagaci nunaniryugluci, Jerusalem-aam yuini! Atam tangerqerciu, atanerkarpeci ullagaaci! Taiguq anagkengelriaruluni cirlakilriaruluni-llu, tau͡gaam ellmikutuuluni ekumaluni-llu ciulviim qaingani— ciulviim iniaran qaingani.

¹⁰ATANEQ qanertuq, “Au͡g'arciqanka akalrialget ekumassuutet Israel-aamek horse-aarit-llu Jerusalem-aamek teguluki; urluvret anguyagaqameng atutukait navguumaciqut. Atanerci taquciiquq uitanqegcitmek atanruviigni; atanruciquq imarpigmek ayagluni allamun imarpigmun, kuigmek-llu Euphrates-aamek ayagluni nunam iquanun.”

¹¹ATANEQ qanertuq, “Akqutkelqa elpecen̄un pitekluku takarnarquciumalria tuqutarkat elliitet augatgun, yut'en anirturciqanka— anirturluki mer'ilngurmek petmianek nunaminek ayagcecimayaram.

¹²Uterci, nunavcen̄ek ayagcecimallerni maa-i neryuniurut'ngelriani; uterci nunavcen̄un camek alingniurnailngurmun. Watua-llu qanrutamci cimiriciqamci malrurqugnek amllenruluku atawaqautnek tapirluku tamalkuan nangteqlerci akilirluku.

¹³Judah urluvqelriatun aturciqaqa Israel-aaq-llu pitegcautetun. Zion-aam-llu angutai nuussirpagtun, anguyagcuutekluki Greece-am angutainun.”

¹⁴ATANEQ alairciquq yum'i quliitgun; pitgaquciiqai pitegcautni kalluum kenratun. Artuqailnguum ATANREM cupu'uryaraq cupciqaa; ayagciquq ellarayagteggun ungalamek tailrianek.

¹⁵ATANREM Artuqailnguum yun'i camun pivkarngaitai, ellaita-llu piunrirciqait inglukesteteng. Qayagpagaciqut taangiqellriatun augat-llu inglukestem̄i maqevkarciqaa qurrlurciquq augatun ekualuku elliitem kuvumalriatun qantamek ekuaviim qainganun.

¹⁶Tauna erneq tekiskan, ATANREM anirturciqai yun'i, qusngiliurtem katngautni anirtulauciatun aarnarqellriamek. Tanqigmek akiqerciqut nuniini teggalquqegtaaraitun nasqerrutem.

¹⁷Assiqatarpagta tangniqluni-llu nuna! Mukaarkai wine-ai-llu ayagyuat piniritkeciqait.