Read Yupik Malachi 1 Bible Online

Malachi 1 - Yupik bible

Malachi 1

¹Waniwa una qaneryaraq ATANREM cikiutekellra Malachi-amun qanrutkesqelluku Israel-aam yuinun.

²ATANEQ qanertuq yum'inun, “Kesianek kenkerrlainaramci.” Tau͡gaam ellait kiugut, “Qaillun nasvallrusiu wankutnun kenken?” ATANEQ-llu kiuguq, “Esau-nkuk Jacob-aaq-llu anelgutkellruuk, Jacob-aaq tau͡gaam kenkellruaqa kinguvri-llu,

³eq'ukellruaqa-llu Esau kinguvri-llu; nunakarniirutellruaqa qemililria nunautii cakaarluku-llu yuilqurmiutarnun qimugten̄un jackal-aanun uitavikevkarluku.”

⁴Esau-m kinguvri Edomite-at, qanqata, “Nunarraput piunriumallruut, tau͡gaam ataam nauciiqaput,” ATANEQ kiuciquq, “Ataam-wa nauskilitki—cali wiinga navgurciqanka. Yuut ap'larciqait ‘Assiilnguum nunii’ waten-llu ‘Angayuqauvik ATANREM qenruskii iquilngurmek.’”

⁵Israel-aam yuin man'a iimegteggun tangerciqaat, qanerciqut-llu, “ATANEQ artuqaituq, Israel-aam-llu nuniin elatekengraaku tuaten ayuquq!”

⁶ATANEQ Artuqailnguq qanertuq agayulirten̄un. “Qetunraulriim takaqelaraa atani, pistem-llu takaqluku ataneni. Wiinga atakarpecia, ciin-mi tua-i takaqenricecia? Ataneqerpecia, ciin-mi qigcikenricecia? Elpeci caunrilkarpecia, tau͡gken apluci, ‘Qaillun piluta caunrilkillruceta elpenek?’

⁷Waten pillerpeciuggun—elliiluci cakarniilngurnek neqkanek ekuavimnun. Tua-i-llu aptuci, ‘Qaillun piluta takaqiksaiceta elpenek?’ Qanrutnaamci—caunrilkellerpeciuggun ekuavika.

⁸Taiciaqavci cikmiumalrianek wall'u naulluutelegnek wall'u tussitellrianek ungungssiarnek ekuagarkanek, umyuartequci-qaa tuatnallerci canricukluku? Tuaten atam ayuqellriamek ungungssiarmek cikiqerciu nunam atanra! Ilukegcitekciqaci-qaa wall'u-qaa ikayungcallerci niilluku ikayurciqaaci?”

⁹Kitaki watua, elpeci agayulirten̄i, kaigaqerci Agayutmun naklekluta pisqelluta. Tuaten ayuqellrianek cikirluku pikuvci, elliin-qaa niiciiqaa kaigatsi?

¹⁰ATANEQ Artuqailnguq qanertuq, “Ilavci-tuq tua-i Agayuviim amiigi palulliki, kenermek catngunrilngurmek kumarcisciigatevkarluci ekuavimni. Ilukegcitkenritamci; ciuniurngaitanka elliitet taitelci wangnun.

¹¹Akertem pit'ellranek yaavet tevillranun ellam yuin tamarmeng takaqaatnga. Nani tamiini ekuagilartut tepkegcilrianek wangnun elliiluteng-llu akurtuyunarqelrianek. Tua-i-wa atqa angtatailan atanruvigni tamaitni.

¹²Tau͡gaam elpeci atqa caarrluurtelararci qanraqavci wii ekuavika catngunritniluku qainganun-llu elliigaqavci neqkanek umyualngukekevcen̄ek.

¹³Qanraqluci-llu, ‘Taqsuqutarput man'a wangkuta!’ ciukanirluci-llu ciuqamni. Wangnun-llu elliilartuci teglegamek ungungssiarmek wall'u tussitellriamek wall'u naulluutelegmek. Umyuartequci-qaa ciuniurinayuklua tuaten ayuqellriamek elliitevcen̄ek?

¹⁴Aniqlaamali piciunrilnguq ekuagilria cakarniilngurmek ungungssiarmek wangnun, katngautmini assilriamek ungungssiarautengqeng'e'rmi akqutkellerminek cikiutekciqniluku wangnun! Tua-i wii angelriarulua atanruama, yuita-llu tamarmeng atanruvilget qigcikaatnga.”