Read Yupik Malachi 3 Bible Online

Malachi 3 - Yupik bible

Malachi 3

¹ATANEQ Artuqailnguq kiuguq, “Qanertekaqa ayagceciiqaqa tumkaqa uptesqelluku. Nutaan-llu ATANEQ yuaqengarci alqunaq taiciquq Agayuvigpaminun. Qanerta-llu tangerrsuumiq'ngarci taiciquq qanrutekluku-llu akqutka.”

²Kia-kiq cavkenani tauna erneq aturyugnganiartau ellii taikan? Kina-llu nangerngayugngaciqa ellii alaiqan? Tuani ernermi taikuni ayuqeciquq miilatun tuknilriatun, kenertun carririlriatun assircarilriatun cavigmek.

³Ellii taiciquq cuqciyarturluni assircarilriatun avurrluirilriatun-llu qerrirlimek cavigmek. Cavignek calistetun assircarilauciatun qerrirlimek cavigmek suulutaamek-llu, tuaten ATANREM qanertiin menuiruciiqai agayulirtet, taitarkaurtelluki ATANERMUN elliitnek akurtuyunarqellrianek.

⁴Nutaan elliitet Judah-m Jerusalem-aam-llu yuin taitellrit ATANERMUN ilukegcinarqeciqut elliinun, ciungani pilallrucimegcetun.

⁵ATANEQ Artuqailnguq qanertuq, “Alairciqua akunlevcen̄un cuqcinalua, nallunairiciqua egmian tamakut inglulirluki angalkumirtaatulit, akusrarutekitulit, piciunrilngurmek-llu nallunairilalriit, teglegiyulriit-llu calistem̄eng akingutkaqsallritnek, arenqilitekluki-llu iqlutun pilartait aipainret elliraat allanret-llu, tamalkuita-llu tugerluki qigcikenritestenka.

⁶“Wiinga ATANRUUNGA, cimiyuunii. Taumek elpeci, kinguvrini Jacob-aam, tamaqapigteksaituci.

⁷Elpeci, ciuliarpecicetun, avtellruuci alerquutemnek aturpek'naki-llu. Uterci wangnun, wiinga-llu uterrniartua elpecen̄un. Tau͡gaam elpeci aptuci, ‘Qaillun-mi piluta uterciiqseta elpenun?’

⁸Wiinga aptamci, canrituq-qaa yuum teglegikuniu Agayun? Watqapik tuaten pingaituq, tau͡gken elpeci teglegiaqlua. Elpeci-llu qanertuci, ‘Qaillun teglegceta elpenek?’ Qulngurutevciuggun-wa elliitevciuggun-llu.

⁹Aniqlaamauci tamarpeci, tua-i-wa atanruviim yuin tamarmeng teglegiatnga.

¹⁰Qulngurutet ilakuivkenaki taiciki Agayuvigpagmun, neqkat nurnaitnaurtut enemni. Naspaacia pitassiarluku ikirusngailucirci qiliim egalrinek, kuvevikluci-llu uryulriamek atawaqautmek.

¹¹Naucetaaci ciissiarnun piunrirtessngaitanka, wine-arkat-llu atsat naucetaaci nauluaqerciqut.

¹²Nutaan-llu atanruvilget tamarmeng yuita atawaqercecimalriaruniciqaiceci, tua-i-wa nunasi nunaksuuminarqelriaruciqngan.”

¹³ATANEQ qanertuq, “Qalartellruuci assiitellrianek wiinga pilua. Tau͡gken apluci, ‘Camek qalartellruceta elpet piluten?’

¹⁴Elpeci waten qanellruuci, ‘Catngunrituq kevgiullra Agayutem. Cakanirciqseta qanellranek atuqumta wall'u wangkuta nasvakumteggu umyuarniullerput ATANERMUN Artuqailngurmun?

¹⁵Tangllemten̄i, ucuryagtellriit tau͡gaam yuut angnilartut. Assiitellriit yuut tukuurteqainarpek'nateng, tau͡gaam naspaalaraat-llu Agayutem pektayiilucia assiilngurnek calillermegteggun, tau͡gken qimagaqluku picurlallmeng nunuliutii.’”

¹⁶Tua-llu yuut ATANREM qigcikestai qanellgutkut, ATANEQ-llu niicugniuq niilluku-llu qanellrat. Ciuqerrani, igaucimallruut kalikarnun qigcikestai takaqestai-llu ATANREM.

¹⁷ATANEQ-llu Artuqailnguq qanerluni, “Taukut wiinga yuk'eciqanka. Tuani ernermi piarkaqa pikumku, nakmiillaqsaguciiqanka. Naklekciqanka-llu angayuqaulriim naklekilauciatun irniaminek kevgiurtem̄inek.

¹⁸Ataam yum'a tangenqigciiqaat niisngalriit ellualriakun-llu yuulriit ayuqenritellrat assiilngurmek calilriatun, kevgiulriit-llu wangnun ayuqenritellrat kevgiunrilngurtun.”