Read Yupik Matthew 11 Bible Online

Matthew 11 - Yupik bible

Matthew 11

¹Tamatum-llu kinguani alerquutni qaqimariamiki elitnauraminun qula malrugnek cipnelegnun, tuaken ayagtuq elitnauriluni qalaruciluni-llu nunani tamakuni.

²Tua-i-llu caqerluni John-aam itercivigmetlermini Christ-am caliari niicamiki elitnaurami ilait ayagcetai,

³qanerluteng-llu elliinun, “Taunguuten-qaa tekitarkaq, wall'u-qaa allamek neryuniurnarqukut?”

⁴Jesus-aam-llu kiugai, “Uterrluci nasvicarturciu John-aaq makunek niitellerpecen̄ek tangllerpecen̄ek-llu.

⁵Cikmiumalriit tangerrsaurtut, tussitellriit piyuayaurtut, mamyuilngulget-llu carriumaut, niicuilnguut-llu niicaurtut, tuqumalriit-llu unguirtut, takumcunarqelriit-llu qaneryaramek qanrucimaut.

⁶Atawaqertuq-llu kina imna cangakinrilnguq wangnek.”

⁷Ayiignek-llu Jesus-aam yugugaat qanrutai John-aaq pitekluku, “Camek tangerrnaluci yuilqumun ayallruceci? Naunrarmek-qaa anuqem arulaskiinek?

⁸Wall'u camek tangerrnaluci ayallruceci? Angutmek-qaa aturaqegcilriamek? Tangerrluku aturaqegcilriit atanret enaitni uitalartut.

⁹Wall'u-qaa camek tangerrnaluci ayallruceci? Prophet-aamek-qaa? Ilumun, qanrutamci prophet-aam piunranek.

¹⁰Waniwaungan pitekluku igausngalria waten: ‘Tangerrluku, pisteka ayagcetaqa ciunerpegun tumkan upcesqelluku ciuvni.’

¹¹Ilumun, qanrutamci arnakun yuurtellriartangeksaituq John-aam angllurcecistem piunranek. Tuaten-llu-wa pingraan qiliim angayuqauvian yuin piunrillrat piunruuq elliini.

¹²John-aam-llu angllurcecistem kinguani man'a engelkarrluku qiliim angayuqauvia pingutengnaqsaaqaat, palartevkenateng-llu itengnaqsaaqaat.

¹³Nauwa tamarmeng prophet-aat, alerquutet-llu nallunairiut John-aaq engelkarrluku.

¹⁴Tuaten-llu ciuniuryukuvciu taunguuq Elijah tekitarkaq.

¹⁵Ciutengqellria niilli.

¹⁶“Tau͡gaam camun ayuquciiqsia ukut yuut? Ayuqut mikelngurcetun aqumgalriacetun tuneniarvigni, qayagaulriacetun ilameggnun

¹⁷qanerluteng: ‘Aturcetaarucaaqamci, tau͡gaam yuranrituci, nepliayaaqukut-llu tau͡gaam iluteqenrituci.’

¹⁸Nauwa John-aaq tekitellruuq nerkegtayuunani mek'egtayuunani-llu, qanrutkaat-llu tuunrangayagmek pingqerrniluku.

¹⁹Yuum-llu Qetunraa tekituq ner'aqluni mer'aqluni-llu, qanrutkaat-llu: ‘Tangerrluku, nernertulria meryunqeggluni-llu, yugnik'larai-llu akiliqurautnek quyurcistet assiilngiumalriit-llu.’ Tau͡gaam elluaq nallunaitelartuq caliamikun.”

²⁰Tamatum kinguani nunat irr'inarqelrianek amllenrulrianek pivikellni nunurai, umyualinqigtenrilata.

²¹“Nakleng, elpet Chorazin! Nakleng, elpet Bethsaida! Maa-i piliat angelriit elpeni pimalriit Tyre-ami Sidon-ami-llu pimallrukata ak'a missuullernek atungluteng qamllerni-llu aqumluteng umyualinqigcartut.

²²Tau͡gaam qanrutamci, ernermi qanercetaarvigmi Tyre-armiut Sidon-armiut-llu takumcukumanruarkaugut elpecen̄i.

²³Elpet-llu, Capernaum, ellami angenruyukeng'e'rpet nangteqnamun cingumaarkauguten. Maa-i caliat angelriit elpeni pimalriit Sodom-aami pimallrukata erneq man'a engelkarrluku uitayartuq.

²⁴Tau͡gaam qanrutamci, ernermi qanercetaarvigmi Sodom-aarmiut takumcukumanruarkaugut elpecen̄i.”

²⁵Tuani-llu Jesus-aaq qanertuq, “Quyavikamken, Aata, qiliim nunam-llu Atanrani, makunek iirucavki usvitulriit elisngalriit-llu, tau͡gaam mikelnguut taringevkarluki.

²⁶Tuaten pili, Aata, tuaten atawaungan elpeni.

²⁷Cat tamarmeng Atamnek wangnun tunumaut. Kia-llu nallunritenritaa Qetunraq, Aatam tau͡gaam. Tuaten-llu kia nallunritenritaa Aata, Qetunram tau͡gaam, Qetunram-llu nasviskiin nallunriciiqaa.

²⁸Ullagcia tamarpeci caknaalriani, artuqlitellriani-llu, mernuiruciiqamci.

²⁹Atmautamnek askici, cuqeklua-llu ellmikutuungama, wangnek-llu picalqukevkenii, tua-i tarnerpeci mernuinercirvigkaatnek nataquciiquci.

³⁰Atmautaqa piyunaqngan, atmagkiuranka-llu uqiggenateng.”