Read Yupik Matthew 12 Bible Online

Matthew 12 - Yupik bible

Matthew 12

¹Tamatum nalliini Sabbath-aaruluku, Jesus-aaq elitnaurani-llu mukaarkat akuliitgun pektut; kaingameng-llu elitnaurai mukaarkanek kangririluteng ner'ut.

²Tau͡gaam Pharisee-aat tamana tangrramegteggu qanrutaat, “Tangerrluku, elitnauraten pisqutngunrilngurmek pilriit Sabbath-aami.”

³Tau͡gaam elliin kiugai, “Naaqiksaituci-qaa David-aam picillranek kaillermini malini-llu?

⁴Nauwa Agayutem eniinun itellruuq nerluni-llu kelipanek tangrresqutnek, nerrlerkaat inerquusngangraan elliinun maliinun-llu, agayulirten̄un tau͡gaam neresqutnguluteng.

⁵Cali-llu-qaa naaqiksaituci alerquutni agayulirtet Agayuvigpagmi picillratnek, Sabbath-aaq qigcikenrilngermegteggu picurlautailuciat.

⁶Taumek qanrutamci, Agayuviim piunranek maa-i ilangqertuci.

⁷Tau͡gaam nallunrilkuvciu caucia mat'um, ‘Takumcukiyaraq cucukaqa, cikiutet ekuagarkat pivkenaki,’ tua-i pinarqenrilnguut cangakeksaicaraci.

⁸Wani-wa Yuum Qetunraa Sabbath-aam Ataneqngaku.”

⁹Tamaaken-llu ayiimi agayuviatnun itertuq.

¹⁰Tangerrluku-llu, tuani angucetangqertuq, unatai nalamaluteng. Aptaat-llu Jesus-aaq, “Pisqutnguuq-qaa Sabbath-aami yungcariluni?” Waniwa picetaarutnaluku.

¹¹Elliin-llu kiugai, “Nalirci qusngiutengqerquni ataucimek, tauna-llu igeskan elanermun Sabbath-aami, teguluku-qaa nuggngaitaa?

¹²Atam, qaillun pitalriamek yuk qununarqenrua qusngimi? Taumek Sabbath-aarungraan assilriamek caliyunarquq.”

¹³Tua-i-llu angun tauna qanrutaa, “Unateten yageski.” Taum-llu yagtai, assiriqerrluteng-llu unatai inglumegcetun.

¹⁴Pharisee-aat anngameng qaillukuartut nau͡gg'un piunrirnaluku.

¹⁵Tau͡gaam Jesus-aam elpekngamiki tuaken ayagtuq. Yugugaat-llu maligtaat. Elliin-llu yungcarai tamalkuita.

¹⁶Cakneq-llu inerqurai tuaten pillni qanrutkesqevkenaki.

¹⁷Tamana piciurrluku Isaiah-m prophet-aam qanellra:

¹⁸“Tangerrluku, pisteka cucukek'ngaqa. Elliin kenkek'ngama ilukegcivkaraanga. Wiinga-llu Anerneq tuc'eciiqaqa elliinun. Elliin-llu qaneryarallgutkenrilnguut cikirciqai cuqyutkaatnek.

¹⁹Tauna qanaataarngaituq, qasqaarngaunani-llu, erinii-llu tumyarani niicimangaituq.

²⁰Naunraq cuplulek qagerngalria ayemn͞gaitaa, kumarun-llu qamyartulria nipngaitaa, elluam cirlakillerkaan engeliinun;

²¹qaneryarallgutkenrilnguut-llu atra neryuniurvikciqaat.”

²²Tamatum nalliini ullautaat elliinun anernerrlulek, cikmiumalria qanyuunani-llu. Tauna anirturaa Jesus-aam qaneryaurtelluku, tangerrsaurtelluku-llu.

²³Yuut-llu tamarmeng alangaartut qanerluteng, “Una-qaa David-aam kinguveqsaa-qaa?”

²⁴Tau͡gaam Pharisee-aat niicamegteggu qanertut, “Uum allakun anernerrluut anevkaqsaicaaqai tau͡gaam tuunrangayagkun, anernerrluut atanratgun.”

²⁵Tua-i-llu Jesus-aam umyugaat nallunrilamiu qanrutai, “Angayuqauvik piunrirciquq yui ellmeggnun inglukuskata. Tuaten-llu nunarpagmiut wall'u enelgutkelriit inglukuskuneng nangerngangaitut.

²⁶Tuaten-llu tuunrangayak anevkarikuni tuunrangayagmek, ellminek inglukiuq. Qaillun waniwa angayuqauvingqerciqa?

²⁷Tua-i-llu wiinga tuunrangayagkun anevkarikuma anernerrlugnek, nau͡gg'un elitnauraci anevkarilartat? Taumek wani-wa ellaita qanercetaararkaugaiceci.

²⁸Tau͡gaam Agayutem Anernerakun anernerrluut anevkaqumki, Agayutem angayuqauvia tekisngauq elpecen̄un.

²⁹Qaillun-mi pinilriim enii yuum ityunarqau piutainek uayaariyarturluku? Qillerqaaquniu tau͡gaam yuk ciumek enii uayaayunarqeciqaa.

³⁰Wangnun maligutenrilnguum inglukaanga, cali-llu quyurcillgutkenrilkeka sekavcilriaruuq.

³¹“Taumek qanrutamci: yuut au͡g'arisngaarkauyaaqut assiilnguitnek tamalkuitnek, qanerrluutaitnek tuaten. Tau͡gaam Anernerem piciliutekestii au͡g'aricimangaituq.

³²Kia imum piciliutekekuniu Yuum Qetunraa au͡g'aricimaarkauguq. Tau͡gaam kia imum Anerneq Tanqilria piciliutekekuniu ellami mat'umi au͡g'aricimangaituq, ellam-llu aipaani pimangaunani.

³³“Napa atsangqetuli assilriarukan atsai-llu assilriaruciqut, napa nallunaitelaami atsamikun.

³⁴Elpeci ciissirpiit piyagaitni, qaillun-mi assiilnguuluci assilriamek qanerciqseci? Umyuam qanellra qanerkun anlartuq.

³⁵Yuk assilria umyuaminek qemangqaallerminek assilriamek qanlartuq. Tau͡gaam yuk assiilnguq umyuamini qemangqaallerminek assiilngurmek qanlartuq.

³⁶Tau͡gaam qanrutamci: yuut qanlallrit assiilngurmek, tamakut pitekluki qanercetaarumaarkaugut ernermi taumi qanercetaarvigmi.

³⁷Qanllerpegun aipaagnek elluakumaarkauguten, wall'u pinarqumaarkauluten.”

³⁸Tamatum nalliini cali igatulit, Pharisee-aat-llu ilaita qanrutaat, “Ataneq, elpenek nallunailkutamek tangerrsugtukut.”

³⁹Tau͡gaam kiugai, “Assiilnguut akusrarutekilriit-llu nallunailkutamek yualartut, tau͡gaam nallunailkutamek pimangaitut, Jonah-m tau͡gaam prophet-aam pianek.

⁴⁰Jonah-tun ernerni pingayuni unugni-llu pingayuni neqerpiim anrutaan iluantellertun, tuaten-llu Yuum Qetunraa ernerni pingayuni unugni-llu pingayuni nunam iluantarkauguq.

⁴¹Ninevah-rmiut-llu qanercetaarvigmi nangerciiqut ukut yuut ilakluki, assiilkelluki-llu. Nauwa taukut umyualinqigtellruut Jonah-m qanellra niicamegteggu. Wani-wa-llu Jonah-m piunranek ilangqertuci.

⁴²Imna-llu atanelleq arnaq ungalam tungiinek tekitelleq qanercetaarvigmi maktellgutkarkaugai ukut yuut assiilkelluki-llu. Nauwa tauna nunat yaaqsinratnek tekitellruuq Solomon-aam umyuartutacia niitnaluku. Wani-wa-llu Solomon-aam piunranek ilangqertuci.

⁴³“Anerneq assiilnguq yugmek an'aqami calligtaalartuq mertailngurteggun uitavigkaminek yuarluni, tau͡gaam nataqutevkenani.

⁴⁴Tua-i-llu qanertuq, ‘Uitallemnun ataam uterrlii.’ Tekicamiu-llu nataqaa yuitellinillra, carriumaluni, assircaumaluni-llu.

⁴⁵Nutaan-llu allanek malrunlegnek anernerrlugnek aqvatuq ellmini arcaqanrulrianek; tamarmeng-llu iterluteng tuavet uitavikluku-llu. Yuum-llu taum ayuqucia kinguqliq arcaqanruciquq ciuqliani. Tuaten-llu ukut yuulgutkelriit assiilnguut ayuqeciqut.”

⁴⁶Cali yugnek qalaruciinanrani, aanii anelgutai-llu nangengqaut yuut elatiitni qalarucugluku.

⁴⁷Yuut-llu iliita qanrutaa, “Atam, aanan anelguteten-llu keggani nangengqaut qalarucugluten.”

⁴⁸Elliin tau͡gaam qanrutaa, “Kinkut aanaksia, kinkunek-llu anelgutengqercia?”

⁴⁹Elitnaurani-llu nirluki qanertuq, “Wani-wa tang aanaka anelgutenka-llu!

⁵⁰Kina imna Atama qilagmelnguum pisqutiinek atulria, tauna anelgutkaqa, nayagaqluku-llu, aanakluku-llu.”