Read Yupik Matthew 15 Bible Online

Matthew 15 - Yupik bible

Matthew 15

¹Tamatum nalliini igatulit Pharisee-aat-llu ilait Jerusalem-aamek tekitut Jesus-aamun, apluku-llu,

²“Ciin elitnauraten niicunrit'lartat agayulirten͞gunret inerquutaitnek, unateteng erurpek'naki nerqata'arqameng?”

³Elliin tau͡gaam kiugai, “Ciin elpeci piciryararpeciuggun Agayutem alerquutai caunrilkelarceciki?

⁴Nauwa Agayun alerqurillruuq waten: ‘Aatan aanan-llu takaqikek, kia-llu angayuqaagni qanerrluuskunikek tuquarkauguq.’

⁵Tau͡gaam elpeci piciryarangqertuci waten: ‘Yuum atani wall'u aanani qanruskuniu, pikaqsallren Agayutmun elliitekumauq;’

⁶takaqevkenakek-llu angayuqaagni. Tuaten elpeci Agayutem alerquutii caunrilkarci piciryarangutevciuggun.

⁷Elpeci malrugnek umyualegni! Nall'arrluci qanrutkaaci Isaiah-m prophet-aam waten:

⁸‘Ukut yuut ullagaatnga qanmegteggun, takaqelaraatnga-llu qerrlumegteggun, tau͡gaam ircaqumegteggun yaaqsigaatnga.

⁹Tua-i elliinginaq wangnun agayulartut yuut piciryarait alerquutekluki.’”

¹⁰Yugugaat-llu taivkarraarluki qanrutai, “Niici taringluci-llu,

¹¹yuum-wa igellni caarrluurutkeksaitelaraa, tau͡gaam qanmikun anelria caarrluurutkelaraa.”

¹²Elitnaurain-llu ulliimegteggu qanrutaat, “Nallunritaten-qaa Pharisee-aat cangayuuciat niicamegteggu qanellren?”

¹³Elliin kiugai, “Naucetaat tamalkuita Atama qilagmelnguum nauceciilqenrilkai qecuumaarkaugut acilqurtuumarmeng.

¹⁴Uitaciki cikmiumang'e'rmeng tass'uqilartut. Tuaten-llu cikmiumallgutkelriik tass'uquskunek tamarmek elanermun igtarkauguk.”

¹⁵Tau͡gaam Peter-aam kiugaa, “Nallunairru wangkutnun man'a cuqyun.”

¹⁶Elliin tau͡gaam kiugai, “Elpeci-llu cuna-wa taringeksailnguci.

¹⁷Nalluarci-qaa yuum igellra qamavet iluanun pilaucianek, anluni-llu nerkengat anyaraatgun.

¹⁸Tau͡gaam qanrakun anelriit qamaken ircaqruanek kingunilartut, tamakut-llu yuk caarrluurtelaraat.

¹⁹Waniwaugut-llu ircaqumek anyulalriit, umyuarrluut, tuqucineq, akusrarutekineq, caruyaneq, tegleneq, piciliqengneq, qacungakineq-llu.

²⁰Makut maa-i yuk caarrluurtelaraat; tau͡gaam yuum nerqata'arqami unatni eruqsaileng'e'rmiki tamana caarrluurutekngaitaa.”

²¹Tuaken ayiimi Jesus-aaq tekituq Tyre-armiut Sidon-armiut-llu yaaqsinrilkiitnun.

²²Tangerrluku-llu arnaq Canaan-aarmiu tuaken nunanek tekituq, qayagpagaa-llu qanraqluni, “Takumcukia, David-aam Qetunraani, panika nangteqeqapigtuq anernerrlugmek.”

²³Elliin tau͡gaam kiunritaa qaneryararraungraan. Taumek elitnaurain kaigavikaat qanerluteng, “Ayagtessgu, nepliupakaraakut.”

²⁴Tua-i kiuluki qanertuq, “Qusngiinun Israel-aam tamaumalriartainun tau͡gaam ayagcecimaunga.”

²⁵Tauna-llu tailuni ciuqerranun ciisqumigtuq qanerluni-llu, “Ataneq, ikayurnga.”

²⁶Kiugaa-llu, “Atawaunrituq mikelnguut teguiluki neqiitnek eggluku-llu qimugten̄un.”

²⁷Qanrutaa-llu taum, “Ilumun-wa, tau͡gaam cali qimugtet estuulum acianek nerlartut yum'eng kaimellritnek.”

²⁸Jesus-aam-llu kiugaa, “Arnaaq, ukveren cagniuq, taumek pisqumallren pimaarkauguq.” Tauna-llu sass'aq engelekluku pania assiriuq.

²⁹Tuaken-llu ayiimi Jesus-aaq ayagtuq Nanvarpiim Galilee-m cen̄iikun, ingrimun-llu mayurluni aqumuq.

³⁰Yugugaat-llu elliinun taigut ullauciluteng tussitellrianek, apqucilegnek, cikmiumalrianek, qanyuilngurnek-llu, allanek-llu ayuqenrilngurnek, ciuqerranun-llu elliit. Elliin-llu canrircetai.

³¹Taumek yuut irriut tangllermeggnek, qanyuilnguut qaneryaurrluteng, apqucilget canrircecimaluteng, tussitellriit-llu piyuangluteng, cikmiumalriit-llu tangerrsaurrluteng. Ucurnarivkaraat-llu Israel-aat Agayutiit.

³²Jesus-aam-llu elitnaurani taisqelluki qanrutai, “Takumcukanka yugugaat wangnelata ernerni pingayuni, nereksaunateng-llu, kaigtelluki ayagcecuumiitanka, tumemeggni pinialiciqngata.”

³³Elitnaurain-llu qanrutaat, “Naken-mi maani yuilqumi kelipangciqseta ukut yugugaat camirutkaatnek?”

³⁴Jesus-aam-llu aptai, “Qavcinek elpeci kelipautengqerceci?” Kiugaat, “Malrunelguut, neqkuinraat-wa.”

³⁵Tua-i yugugaat aqumesqai nunamun.

³⁶Taukut-llu kelipat neqkuinraat-llu teguamiki quyatekai itumlluki-llu elitnauraminun tunluki. Taukut-llu yugugarnun aruqutkait.

³⁷Tamarmeng-llu ner'ut camirrluteng-llu. Ilakuarit-llu itumcimalriit quyurtait kalngat malrunelgen imirluki.

³⁸Taukut-llu nerellret angutet tiissitsaaruut cetaman, ilakevkenaki arnat mikelnguut-llu.

³⁹Yugugaat-llu utercetai, angyamun-llu ekluni ayagtuq nunamun Magadan-aarmiunun.