Read Yupik Matthew 18 Bible Online

Matthew 18 - Yupik bible

Matthew 18

¹Taum nalliini Jesus-aaq elitnaurain ullagaat apluku-llu, “Kina angenrua qiliim angayuqauviani?”

²Jesus-aam tau͡gaam mikelnguq tagciraa qukaatnun-llu nangerrluku,

³qanerluni-llu. “Ilumun, qanrutamci, ayuqucilinqigtenrilkuvci, mikelngurtun-llu ayuqlirinrilkuvci, iterngaituci qiliim angayuqauvianun.

⁴Taumek kina imna ellminek picalqukenrilnguq uutun mikelngurtun, angenruarkauguq qiliim angayuqauviani.”

⁵“Kia-llu imum atemkun mikelngurmek ciuniurilriim, ciuniuraanga.

⁶Tau͡gaam kia imum assiilngirteskuniu ukut mikelnguut ukveqestem̄a iliit, atawauyartuq tauna miilissuutem teggalquanek uyaqurrikun kiciquni, imarpiim-llu et'uqranun kit'elluku.

⁷“Nakleng nunamiut picetaarumalriit; picetaarutet taigarkauyaaqut, tau͡gaam nakleng yuk tauna picetaarutem taitestii.

⁸Taumek unatvet wall'u it'gavet picurlagceskaten, kepiu eggluku-llu, inglupiamek unatengqeng'e'rpet wall'u inglupiamek it'gangqeng'e'rpet atawaunruarkauguten unguvamun itquvet, temen tamalkuuluku egcetevkenaku kenermun nipsuilngurmun.

⁹Tuaten-llu iivet picurlagceskaten ikugluku egesgu, inglupiamek iingqeng'e'rpet atawaunruarkauguten unguvamun itquvet, iituumarpet malrugnek egcimanrilkuvet kenermun nipsuilngurmun.

¹⁰“Mulngakici, caunrilkenriciu makut mikelnguut iliit. Qanrutamci an'gilait qilagmi uitalartut Atama qilagmelnguum ciuqerrani.

¹¹“Yuum-llu Qetunraa tekituq anirturyarturluku tamaumalria.

¹²Qaillun umyuarteqseci? Yuk qusngiutengqerquni yuinarnek tallimanek, atauciq-llu tamarluni, taukut-qaa yuinaat tallimaunritaraan unisngaitai, ingrini-llu tamalleq yuaryarturluku?

¹³Nalaqurainaquniu-llu, ilumun qanrutamci, quyatekciqaa angenrulriamek taukuni yuinarni tallimaunrita'arni tamallrunrilngurni.

¹⁴Tuaten-llu Atavci qilagmelnguum ukut mikelnguut iliit piunriisqumanritaa.

¹⁵“Cali-llu ilavet assiilngirvikekaten, ullagluku qanrucarturru picurlautiinek allamek ilaunatek, niiskuniten-llu unakeciqan.

¹⁶Tau͡gaam niitenrilkaten, unayaqlia ataucimek yugmek wall'u malrugnek maliklukek-llu. Tuaten qaneryaraq tamiin qalarutkumalleq niicetengqerrnaurtuq malrugnek wall'u pingayunek.

¹⁷Taukuk-llu niicunrilkakek, agayuvigmiunun qanrutkiu. Taukut-llu cali niicunrilkaki, agayumanrilngurtun ayuqutniaran, akiliqurautnek-llu quyurcilriatun.

¹⁸Ilumun qanrutamci, nunam qaingani camek qillerqikuvci, qilagmi-llu qillerqumaarkauguq. Cali-llu nunam qaingani angicikuvci qilagmi-llu angicimaarkauguq.

¹⁹Cali qanrutamci, yuuk ilagci nunam qaingani umyuallgutkekunek kaigallermegnek, tua-i tuaten Atama qilagmelnguum niiciiqak.

²⁰Nani-llu malruk wall'u pingayun yuut atemkun quyureskata, tuani qukaatneciiqua.”

²¹Tua-i-llu Peter-aam ullagluku Jesus-aaq aptaa, “Ataneq, ilama assiilngirvik'laqanga qavcirqunek au͡g'ariciiqsia? Malrunlerqunek-qaa?”

²²Jesus-aam kiugaa, “Qanenritua elpenun malrunlerqunek, tau͡gaam malrunelget amllerqunek aturluki au͡g'aritarkaugan.

²³“Taumek qiliim angayuqauvia ayuquq atanertun pistem̄inek akilitevkarilriatun.

²⁴Tua-i-llu ayagnian elliinun ullautaat akiilngulek akinek tiissitsaanek qulnek.

²⁵Tau͡gaam akikailan atanran ellimertuutaa tunesqelluku, nulirra-llu irniari-llu, pii-llu tamalkuita akiilnguirutkesqelluki.

²⁶Pista tua-i tauna atanrem ciuqerranun palurrluni kaigavikaa, ‘Ataneq, takumcuklua uitasnga, akiilnguirvikciqamken tamalkuitnek.’

²⁷Atanrem tua-i takumcukluku pegtaa au͡g'arilluku-llu akiilnguinek.

²⁸Tau͡gaam tauna pista anngami, tangrraa pisten͞gullgutmi iliit, ellminun akiilngulek akicuarnek yuinarnek tallimanek. Tuqluakun-llu tegua qanrulluku, ‘Akilisnga akiilngurpenek.’

²⁹Pisten͞gullgutiin tua-i palurrluni kaigavikaa, ‘Takumcuklua uitasnga akiliciiqamken.’

³⁰Tau͡gaam ellii niicunrituq kelucaucivigmun-llu ayagcetaa akiilnguirutlerkaan engeliinun.

³¹Man'a tuaten pillra tangrramegteggu pisten͞gullgutain ilutequtekaat, atanerteng-llu ullagluku qanrucarturaat makunek tamalkuitnek.

³²Atanran tua-i ellminun taisqaa tauna pista qanrulluku-llu, ‘Elpet assiitellria pista, au͡g'aritellruamken tamalkuitnek akiilngurpenek kaigavikngavnga.

³³Pisten͞gullguten-llu-qaa takumcukarkaunritan, takumcukellrucimtun?’

³⁴Atanra tua-i qenqerrluni pista tauna nangcisten̄un tunaa akiilnguirutlerkaan engeliinun.

³⁵Tuaten cali piarkaugaaci Atama qilagmelnguum ircaqurpeciuggun au͡g'aricinrilkuvci ilavci picurlallritnek.”