Read Yupik Matthew 2 Bible Online

Matthew 2 - Yupik bible

Matthew 2

¹Jesus-aaq yuurcan Bethlehem-aami, Judea-mi, Herod-aaq atanrullrani, tangerrluku yuut umyuartulriit Jerusalem-aamun tekitut Calaram tungiinek, qanerluteng,

²“Nauwa-mi tauna yuurrnerraq Jews-aat atanerkaat? Wani-wa agyaa tangrramteggu Calaram nuniini, taigukut ciktaarviknaluku.”

³Herod-aaq tau͡gaam mat'umek niicami nuniituq, Jerusalem-aarmiut-llu tamarmeng tuaten.

⁴Tua-i-llu agayulirten͞gunret igatulit-llu quyurcetai, apluki-llu nani Christ-am yuurtarkaucianek.

⁵Kiugaat, “Bethlehem-aami Judea-melngurmi, waten igausngiin prophet-aatgun:

⁶‘Elpet, Bethlehem-aaq, Judah-melngurmi, mikellrunrituten Judah-m nunaini, elpenek tekitarkaungan Angayuqaq yuunka Israel-aat atanirarkauluki.’”

⁷Tua-i Herod-aam taukut umyuartulriit kelegcetai aassaqluni apluki-llu ilungluni qangvaq agyam alairucianek.

⁸Bethlehem-aamun-llu ayagcetai qanerluni: “Ayagci mikelnguq tauna yuarluku cumiggluci, nataqekuvciu-llu qanruskicia, wiinga-llu tuaten ciktaarviksarturniarqa.”

⁹Tua-i-llu atanrem qanellra niicamegteggu ayagtut; ataam-llu agyaq Calarami alailleq ciungatgun pektuq, mikelnguum-llu uitallra tekilluku quliini arulairtuq.

¹⁰Agyaq tangrramegteggu angniqapigtut cakneq.

¹¹Enemun-llu itrameng tangrraat mikelnguq aanii-llu Mary; ciuqerranun-llu ciisqumiggluteng ciktaarvikaat, tukuutmeggnek-llu payugtaat cikiutnek, wani-wa suulutaamek, aruvagkamek, tepkegcilriamek-llu uqumek.

¹²Qavangurtullratgun Agayutem inerquateng Herod-aamun utertesqevkenaki, nunameggnun utertut Jerusalem-aarmiut tumkevkenaki.

¹³Ayaumariata-llu Atanrem an'gilaa Joseph-aamun tangercetuq qavangurtullrakun qanrulluku, “Makluten, qimausgu mikelnguq aanii-llu Egypt-aamun, tuanetniartuci elpengcallerkama engeliinun; wani-wa mikelnguq tauna Herod-aam yuaqataraa piunrirnaluku.”

¹⁴Tua-i unugmi makluni mikelnguyagaq aanii-llu ayautak Egypt-aamun.

¹⁵Tuani-llu uitaluteng Herod-aam tuqullran engeliinun, piciurrluku Agayutem qaneryaraa prophet-aakun waten, “Qetunraqa kelgaqa Egypt-aamek.”

¹⁶Tau͡gaam Herod-aam, elpekngamiki imkut umyuartulriit elliinun cakaarilriit, eq'uqertuq cakneq, Bethlehem-aarmiunun-llu avataitnun-llu ayagceciuq tuquqluki tamalkuita mikelnguut tan'gaurluut malrugnek allrakungeksailnguut; wani-wa taukut umyuartulriit apqaunqegcaarallruamiki qangvaq yuurucianek.

¹⁷Tua-i Jeremiah-m prophet-aam qanellra cali piciurtuq man'a:

¹⁸“Ramah-rmiut erinamek niitut qialriamek yuunialriamek, Rachel-aam yuuniarutekngaki irniani, qarucunaunani-llu piunriata.”

¹⁹Herod-aaq tuqumarian, Atanrem an'gilaa cali Joseph-aamun tangercetuq Egypt-aami qavangurtullrakun qanrulluku,

²⁰“Makluten ayauskek mikelnguq aanii-llu Israel-aat nuniitnun, waniwa yuunrirtut mikelnguum tuqutengnaqestai.”

²¹Tupiimi-llu tuaten piuq, aanakelriik ayautak, Israel-aat-llu nuniitnun tekilluni.

²²Tau͡gaam niicami Herod-aam cimiucia qetunraanek Archelaus-aamek, Judea-mi atanrurtellriamek, alinguq tuavet ullautellerkamegnek, Agayutem-llu qanrutenqigcani qavanguakun, qimakanirtut Galilee-amun.

²³Nunaliluteng-llu Nazareth-aarmiuni. Piciurrluku qaneryaraq: Ellii pitekluku qanrutkumalria prophet-aatgun, “Nazarene-armiumek” aprumaarkauniluku.