Read Yupik Matthew 20 Bible Online

Matthew 20 - Yupik bible

Matthew 20

¹“Qiliim angayuqauvia ayuquq yugtun naucetaarvilegtun, unuayaarmi ayalriatun ellimeqliriyarturluni caliarkanek naucetaarviminun.

²Umyugait nall'arrluki akiliryugai ernerpak akimek ataucimek, ayagtelluki-llu naucetaarviminun.

³Sass'ami qulngunrita'armi cali ayiimi tangertuq allanek qacigtellrianek tuneniarvigmi.

⁴Qanrutai-llu, ‘Elpeci-llu ayagci naucetaarvimnun, akilirciqamci elaranailngurmek.’ Taukut-llu ayagtut.

⁵Cali-llu ayanqigtuq erenrem qukallrani, sass'at-llu pingayuatni cali. Tuaten cali piluni.

⁶Sass'at tallimiitni ayiimi cali allat tangrrai qaciggluteng nangengqalriit. Qanrutai-llu, ‘Ciin qaciggluci ernerpak maani nangengqaceci?’

⁷Kiugaat-llu, ‘Yuum-wa ellimeqsailakut.’ Tua-i qanrutai, ‘Elpeci-llu cali naucetaarvimnun caliyarturci, elaranailngurmek akingeciquci.’

⁸Atakuan-llu naucetaarviim yuan qanrutaa qaunqista taivkaasqelluki calilriit, akiliisqelluki-llu. Kinguqliitnek-llu ayagluki akilirai ciuqliitnek-llu taqluki.

⁹Tua-i-llu tallimani sass'ami yagtellriit taingameng akimek ataucimek akingut.

¹⁰Tau͡gaam ciumek yagtellret taingameng umyuartequt akitunrunayukluteng, tau͡gaam cali tuaten akimek ataucimek akingluteng.

¹¹Taumek atanerteng qaneksuarautekaat.

¹²Qanrutaat-llu, ‘Ukut kingumek yagtellret sass'ami ataucimi calillruut, tau͡gaam akiliraten pitatekluta wangkuta ernerpak cakviullerni kiirniurluta-llu.’

¹³Elliin tau͡gaam kiugaa iliit, ‘Usuuq, canganarqenricuksaaqua, umyuan nall'arrluku akimek ataucimek akiliryullrukemken.

¹⁴Akiuten teguluku ayii. Una kinguqliq akiliryugaqa elpetun pitarrluku.

¹⁵Elluanrituq-qaa umyuaqa aturluku piutenka aulukekumki? Wall'u-qaa assiuciqa ciknakan?’

¹⁶Tuaten kinguqliit ciuqliurtarkaugut, cali-llu ciuqliit kinguqliurtarkauluteng. Unayaqumalriit amllerrsaaqut, tau͡gaam cucukumalriit ikgetut.”

¹⁷Jerusalem-aarmiut tungiitnun ayainanermeggni Jesus-aam elitnaurani allakarluki qanrutai,

¹⁸“Tangerrluku ayagtukut Jerusalem-aamun. Tuani-llu Yuum Qetunraa tunumaarkauguq agayulirten͞gunernun igatulinun-llu, tuqutesqumaarkaugaat-llu.

¹⁹Agayumanrilngurnun-llu tunciqaat piciliutekesqelluku ussukcaucesqelluku-llu kelistamun. Tau͡gaam makciiquq erenret pingayuatni.”

²⁰Tuani-llu Zebedia-m qetunraagken aaniik elliinun taiguq, taukuk-llu qetunraagni ullaullukek, nunamun palurrluni kaigavikaa piyullminek niitesqelluni.

²¹Elliin-llu aptaa, “Camek tua-i pisqumasit?” Taum tua-i qanrutaa, “Angayuqauvigpeni ukuk qetunraagka canivnun aqumevkaasqumaagka, aipaa tallirpilirnerpeni, aipaa-llu iqsulirnerpeni.”

²²Tau͡gaam Jesus-aam kiugai, “Apyuteklerci nalluarci. Mey'unarqutek-qaa saskam imaanek wii mer'arkamnek? Anglluutekamnek-llu-qaa anglluyunarqutek?” Kiugaak, “Aa-ang, piyunarqukuk.”

²³Tua-i qanrutak, “Mer'arkamnek elpetek mer'arkauyaaqutek, anglluutekamnek-llu angllurarkauyaaqutek, tau͡gaam canimni aqumgallerkartek wii pisqutkaqenritaqa, tau͡gaam Atama pisqumallri tuaten piarkaugut.”

²⁴Tua-i-llu elitnauraullgutkenka qulen mat'umek niicameng cangayuutekagket ukuk anngaqelriik.

²⁵Tau͡gaam Jesus-aam ellminun pivkarluki qanrutai, “Agayumanrilnguut atanirtaita ataniumalarait atanrunitekluteng, ciulirnerita-llu mulngakenrit'larait.

²⁶Elpecen̄i tau͡gaam tuaten pikaunrituq. Tau͡gaam nalirci angenruyukuni pisten͞gukili ilamini.

²⁷Cali-llu nalirci ciuqliuyulria kevgiurten͞gukili ilamini.

²⁸Tuaten Yuum Qetunraatun, tekitenrilami kevgiuresqelluni tau͡gaam kevgiurarkauluni, unguvani-llu cikiutekarkauluku amllelriit akiliutekaatnek.”

²⁹Ayallrani-llu Jericho-mek yugugaat maligtaat.

³⁰Tangerrluku-llu cikmiumalriik, pekcarat caniatni aqumgalriik, niicamegnegu Jesus-aaq kituqatarniluku, qayagpagtuk, “Ataneq, David-aam Qetunraa, takumcukikuk.”

³¹Yugugaat tua-i inerquryaaqagket nepliisqevkenakek. Tau͡gaam taukuk pikanirlutek qayagpagtuk, “Ataneq, David-aam Qetunraa! Takumcukikuk.”

³²Jesus-aaq tua-i arulairtuq ellminun-llu taisqellukek, tua-i-llu aptak, “Qaillun pisqumacetek wangnun?”

³³Qanrutaak, “Ataneq, iipuk uitesqelluki.”

³⁴Tua-i takumcuklukek Jesus-aam iikek agturai. Tamaa-llu tangerrsaurtuk, Jesus-aamun-llu maligullutek.