Read Yupik Matthew 23 Bible Online

Matthew 23 - Yupik bible

Matthew 23

¹Tuani Jesus-aam qalarutai yugugaat elitnaurani-llu,

²qanerluni, “Igatulit Pharisee-aat-llu aqumgalartut Moses-aam aqumllerani.

³Taumek elpecen̄un atuusqutait tamalkuita aturciki maligtaquluki-llu, tau͡gaam caliarit maligtaquksaunaki. Wani-wa ayuqucirturilaryaaqut, tau͡gken aturpek'naki.

⁴Atmagarkanek uqamailngurnek qugciigalngurnek qillerqilartut, yuut-llu tusaitnun elliluki, tau͡gaam tungaunateng unatmeggnek calligcunrit'larait.

⁵Tau͡gaam caliateng tamalkuita caliaqelarait yugnun tangrresqelluteng, nallunailkutateng elurtungnaq'larait, aturameng-llu cenliarutait angliriluki.

⁶Nerevkarivigni-llu kiaqliuyulartut, agayuvigni-llu aqumlleret kiaqliit aqumviksularait.

⁷Nayangarvikesqumalartut-llu tuneniarvigni, ‘Ayuqucirturten̄ek-llu’ tuqluusqumaluteng.

⁸Tau͡gaam elpeci ayuqucirturten̄ek tuqluusqessaqunaci, atauciq ayuqucirturtekngavciu, tamarpeci-llu amaqliqelriaruuci.

⁹Nunamiungulria-llu tuqluqsaunaku atavcen̄ek, atauciq Atakngavciu qilagmelnguq.

¹⁰Atanernek-llu tuqluusqeksaunaci, atauciq Ataneqngavciu, wani-wa Christ-aq.

¹¹Tau͡gaam angnertarci pisten͞gukili elpecen̄i.

¹²Kina ellminek ucuqellria caunrilkumaarkauguq, ellminek-llu caunrilkelria ucuqumaarkauluni.

¹³“Tau͡gaam nakleng elpeci, igatulini Pharisee-aani-llu, malrugnek umyualegni! Qiliim angayuqauvia kelucaavciu yugnun; wani-wa elpeci-llu itenrituci, iteryulriit-llu itercetenritaci.

¹⁴Nakleng elpeci, igatulini Pharisee-aani-llu, malrugnek umyualegni! Arnat aipainret enait uayaalaavciki piicaumanguaraqluci-llu, taumek angenranek picirkiumaarkauguci.

¹⁵Nakleng elpeci, igatulini Pharisee-aani-llu, malrugnek umyualegni! Nunakun merkun-llu ayalaavci yugmek ataucimek unangengnaqluci, ilaksagutaqavciu-llu nangcivigmun piarkaurtelararci malrurqugnek elpecen̄i arcaqanrurrluku.

¹⁶“Nakleng elpeci, tass'uqisten̄i cikmiumalriani, qanlaavci, ‘Agayuvik tumekluku ukvernarcarilria, tauna caunrituq, tau͡gaam agayuviim suulutaara tumekluku ukvernarcarilria, uniurcailkutkangqerrniluku.’

¹⁷Elpeci usviitellriani cikmiumalriani-llu! Naliak angenrua, suulutaaq wall'u agayuvik suulutaam kenciknarivkartii?

¹⁸Tuamta-llu qanlartuci, ‘Elliivik tumekluku ukvernarcarilria, tauna caunrituq; tau͡gaam qainganelnguq tumekluku cikiun ukvernarcarilria, pinarqutkangqerrniluku.’

¹⁹Elpeci cikmiumalriani! Naliak angenrua, cikiun wall'u elliivik cikiutem kenciknarivkartii?

²⁰Taumek elliivik tumekluku ukvernarcarilriim ukvernarcarvikaa tauna, qainganelnguut-llu ilakluki.

²¹Agayuvik-llu tumekluku ukvernarcarilriim ukvernarcarvikaa tauna, yua-llu ilakluku,

²²qilak-llu tumekluku ukvernarcarilriim, ukvernarcarvikaa Agayutem angayuqauvian aqumllertaa, qaingani-llu aqumgalria ilakluku.

²³“Nakleng elpeci, igatulini Pharisee-aani-llu, malrugnek umyualegni! Naunraat ayuqenrilnguut, mint, dill, cummin-llu qulngurutait elliitekautek'laavciki, alerquutet tau͡gken arcaqanrit cakaarluki makut: elluaq, takumcukiyaraq-llu, ukveq-llu. Makut maa-i arcaqerluki aturarkaugaci, au͡gkut-llu cakaarpek'naki.

²⁴Elpeci, tass'uqisten̄i cikmiumalriani, ungilagliaraat nerilkautek'laavciki, tau͡gken ungungssiq qulugtellria ig'aqluku!

²⁵“Nakleng elpeci, igatulini Pharisee-aani-llu, malrugnek umyualegni! Mer'utet qantat-llu qaingitgun carrilaavciki, tau͡gaam ilumegteggun tegleganek piksugiiyaramek-llu imalguut.

²⁶Usuuq, Pharisee-aaq, cikmiumalriami! Mer'un qantaq-llu iluagnegun carrirraarkek elatmegnegun cali iqairutnaurtuk.

²⁷“Nakleng elpeci, igatulini Pharisee-aani-llu, malrugnek umyualegni! Qungut urasqercimalriit ayuqngavciki; taukut qaimegteggun kenegnaruaryaaqut, tau͡gaam ilumegteggun tuqumalriit enritnek, pellernarqelrianek-llu ayuqenrilngurnek imalguut.

²⁸Tuaten elpeci-llu qaivciuggun elluaruaryaaquci yuut takuatni, tau͡gaam iluvciuggun piciunguamek arcaqanqumek-llu imalguuci.

²⁹“Nakleng elpeci, igatulini Pharisee-aani-llu, malrugnek umyualegni! Prophet-aat qunguit piliaqelaavciki, ellualriit-llu neq'akutait kenegnarcarluki,

³⁰qanerluci, ‘Ciuliaput yuullgutkellrukumteki prophet-aanek tuqucilriit ilaliryanritaput.’

³¹Tuaten piluci elpecen̄ek nallunailartuci, prophet-aanek tuqucilrianun irniaqucirpecen̄ek.

³²Taumek, tua-i, ciuliarpeci assiiluciat aturciu.

³³Elpeci ciissirpagni, elpeci ciissirpiit piyagaitni, qaillun piluci nangtaullerkarci qimagciqseciu?

³⁴“Taumek tamana pitekluku, elpecen̄un ayagceciunga prophet-aanek, angutnek-llu elisngalrianek, igatulinek-llu; taukut ilait tuquciiqaci, kelistanun-llu ussukcaulluki, ilait-llu piqertuarciqaci agayuvigpecen̄i, malirqaraluki-llu nunanun allanun, qimangraata.

³⁵Elpecen̄un tut'esqelluku ellualriit augat nunamun kuvvleq tamalkuan, Abel-aam ellualriim auganek ayagluni Zechariah-m-llu auga engelkarrluku, Barachias-aam, qetunraan, imum tuqutellerpeci agayuviim ekuaviim-llu akuliigni.

³⁶Ilumun, qanrutamci, makut tamarmeng ilakellrianun ukunun tekiciiqut.

³⁷“Jerusalem-aaq, Jerusalem-aaq, prophet-aanek tuqucilriami, teggalqunek-llu miluquluki elpenun ayagcecimalriit! Wani-wa irniaten pulengtaq quyurcularyaaqanka, tuacetun yaqulgutem piyagaminek evalauciatun yaqugmi aciagnun, tau͡gaam elpeci piyunrituci!

³⁸Atam, enesi elpecen̄i unicimaarkauguq cairulluni.

³⁹Waniwa qanrutamci, mat'um kinguakun tangerrngaitarpecia, qanerpailegpeci waten, ‘Atawaqerli Atanrem atrakun tekitellria.’”