Read Yupik Matthew 26 Bible Online

Matthew 26 - Yupik bible

Matthew 26

¹Jesus-aam-llu qaneryarani makut tamalkuita iquklicamiki elitnaurani qanrutai,

²“Nallunrituci erenrek malruk kinguagni Paaskaam nallairarkaucianek, tua-i Yuum Qetunraa tunumaarkauguq kelistamun-llu ussukcaucimaarkauluni.”

³Tuani agayulirten͞gunret, yuut-llu ciulirnerit, quyurtut qaillukuarvigmun, Caiaphas-aam, agayulirten͞gunret iliita eniinun,

⁴qaillukuarluteng-llu alapen'errluku teguyugluku tuqucugluku-llu.

⁵Tau͡gaam qanertut, “Nerevkaritem nalliini pivkenaku, yuut pek'ngarcuartut.”

⁶Jesus-aaq Bethany-mi uitallrani Simon-aam mamyuilngulgem eniini,

⁷arnam ullagaa qikunguamek putiilekaangqerrluni tepkegcautmek imalegmek akitulriamek, tamatumek Jesus-aam qamiqurra kuvevikaa, nervigmi aqumgallrani.

⁸Tau͡gaam elitnaurain tamana tangrramegteggu cangayugtut, qanerluteng, “Ciin man'a tuaten caanguarutngua?

⁹Minguk man'a amllelrianun tunkuni cikiutekautnguyartuq arrsaulrianun.”

¹⁰Jesus-aam tamana niicamiu qanrutai, “Ciin una arnaq cangayugcetaarceciu? Caliara tungemnun assilriaruuq.

¹¹Wani-wa arrsaulrianek nayurtengqerrlainartuci, tau͡gaam wii nayurtekerrlainarngaitarpecia.

¹²Minguk man'a qaimnun kuvaa tungmagcimallerkamnun uplua.

¹³Ilumun, qanrutamci, nani nunami tamiini man'a qaneryaraq assilria qallautekumakan, man'a-llu arnam pillra qanrutekciqaat ellii neq'akluku.”

¹⁴Tua-llu elitnaurain iliit, Judas-aaq Iscariot-aaq, agayulirten͞gunernun ayagtuq,

¹⁵apluki-llu, “Camek cikirciqsecia tunkumku elpecen̄un?” Taukut-llu usperluki akit, yuinaq qulnek cipluku, tunait elliinun.

¹⁶Tamana engelekluku ingcurtuq tunllerkaanek.

¹⁷Erenret quulciriyaarailngurnek kelipartularviit ciuqliatni elitnaurat Jesus-aaq ullagaat, qanerluteng, “Nani upciiqseta Paaskaarcuutekamek ner'arkarpenek?”

¹⁸Elliin-llu qanrutai, “Nunarpagni yuk tauna ullagciu qanrulluku-llu, Elitnauristem qanrutesqaaten waten: ‘Pillerkaqa tekituq, enevni Paaskaaryugtua elitnauranka ilakluki.’”

¹⁹Taukut-llu elitnaurat tuaten piut Jesus-aamun ellimertuucimegcetun, Paaskaarcuutekaq-llu upluku.

²⁰Atakuan-llu, estuulumi nerellgutkai elitnaurani qula malrugnek cipluku.

²¹Nernginanermeggni-llu qanrutai, “Ilumun, qanrutamci, ilavci tunciqaanga.”

²²Taukut-llu angniirtut, tungliqu'urluteng-llu aptaat, “Wiinga-qaa taunguunga, Ataneq?”

²³Elliin-llu kiugai, “Qantamun akurtellgutma tunciqaanga.

²⁴Yuum Qetunraan egilrani aturyaaqaa pitekluni igausngaciicetun, tau͡gaam nakleng yuk tauna Yuum Qetunraan tunestii! Yuk tauna atawauyartuq yuurtellrunrilkuni.”

²⁵Tua-i Judas-aaq tunestii qanertuq, “Wiinga-qaa taunguunga?” Kiugaa-llu, “Aa-ang, qanrucirpetun.”

²⁶Nerrlermeggni-llu Jesus-aam kelipaq tegua, quyatekraarluku-llu itumtaa, elitnauraminun-llu tunluku, qanerluni, “Teguluku nerici, wani-wa temka.”

²⁷Cali-llu saskaq tegua quyaluni-llu taumek cikirai qanerluni, “Tamarpeci tuaken merci,

²⁸wani-wa auka akquyutem nutaram auga, amlleret pitekluki kuvumalria assiilnguut au͡gautekaat.

²⁹Tau͡gaam qanrutamci, mat'um kinguani merngaitua maaken wine-am atsainek, erneq imna engelkarrluku nutarauluku meq'umku ilakluci Atama angayuqauviani.”

³⁰Quyatmek-llu atuumariameng, an'ut Olive-aam ingrianun ayagluteng.

³¹Tuani Jesus-aam qanrutai, “Tamarpeci unuku cangayuutekciqerpecia igausngaciatun, ‘Qusngiliurta kaugturciqaqa, qusngit-llu katngat sekavciiqut.’

³²Tau͡gaam makcimarikuma ciuvcen̄i ayagciqua Galilee-amun.”

³³Tau͡gaam Peter-aam qanrutaa, “Tamarmeng cangayungraata wiinga cangayugngaitua.”

³⁴Jesus-aam kiugaa, “Ilumun, qanrutamken, unugmi mat'umi, yaqulek qalriavailgan, mecirautekciqerpenga pingayurqunek.”

³⁵Peter-aam qanrutaa, “Tuqullgutkarkaungramken mecirautekngaitamken.” Tuaten-llu cali tamarmeng qanertut.

³⁶Tua-i taukut ilakluki Jesus-aaq tekituq Gethsemane-mek aterpagcimalriamun, qanrutai-llu elitnaurani, “Maavet aqumici yaavet piicagyartullemni.”

³⁷Peter-llu Zebedee-am-llu qetunraak malikai, tua-i-llu angniirtuq nanikuaqapiggluni-llu.

³⁸Qanrutai-llu, “Wiinga tarneqa angniitqapigtuq, tuqumun tuaten. Maantaurci, pegg'allguteklua-llu.”

³⁹Ayakanirluni-llu palurtuq, piicagluni-llu waten, “Atamaa, piyunarqekan, saskaq una wangnek au͡g'arru! Tau͡gaam, pisquciqa pivkenani, elpet pisqucin piuli.”

⁴⁰Maaten elitnaurani ullagai qavallinilriit. Peter-llu qanrutaa, “Waqaa pegg'allgutkesciigatarpecia-qaa sass'ami ataucimi?

⁴¹Tupaumaci piicagluci-llu, naspaatem pinritnauraaci. Anerneq ilumun cumigcaaquq, tau͡gaam kemek piniatuq.”

⁴²Cali aipiriluni piicagyarturtuq qanerluni, “Atamaa, saskaq una au͡g'ayunailkan, tau͡gaam mer'arkaukumku tua-i pisqucin piuli.”

⁴³Ullanqigcamiki-llu tekitai qavarluteng, iingit uitesciiganateng.

⁴⁴Tua-i unilluki cali piicagyarturtuq pingayiriluni, qaneryarani qaneryaraqenqiggluki.

⁴⁵Elitnaurani-llu ullanqigcamiki qanrutai, “Cali-qaa qavartuci, mernuinercirluci-llu? Tangerrluku, Yuum Qetunraa tunqataraat assiilngiumalriit unataitnun.

⁴⁶Makluci, ayagnaurtukut, tunestekaqa canimelliuq.”

⁴⁷Tua-i tamaa cali qallasnginanrani, Judas-aaq, taukut qulen malrugnek cipnelget iliit, tekituq yugugaat ilakluki, nuussirpalget kaugtuutalget-llu, agayulirten͞gunernek yuut-llu ciulirneritnek cingumalriit.

⁴⁸Tunestekaan-llu nallunailkutamek ak'a cikillruamiki, qanertuq, “Melugararkaqa taunguciquq, tauna teguciu.”

⁴⁹Tamaa-llu Jesus-aaq ullagaa qanerluni-llu, “Atawaqaa, Ayuqucirturtaa,” melugarluku-llu.

⁵⁰Jesus-aam-llu qanrutaa, “Usuuq, caluten tekicit?” Tua-i taukut tailuteng yaggvikaat Jesus-aaq, teguluku-llu.

⁵¹Tangerrluku-llu, Jesus-aam nayurtain iliita yaggluni nuussirpani amua, agayulirten͞gunrem-llu pistii yaggluku ciutairtaa.

⁵²Jesus-aam-llu qanrutaa, “Saskun ataam qungasgu eniinun, waniwa saskunek tegutellriit tamarmeng saskukun piunrirciqngata.

⁵³Umyuartequten-qaa Ataka kaigavikesciigacukluku, elliin-llu tamaa an'gilanek tuyurlua tiissitsaat qula malrugnek cipluki amllenrulrianek?

⁵⁴Tau͡gaam qaillun waniwa piluteng kalikat piciurciiqat tuaten piarkauluni?”

⁵⁵Tuani sass'ami Jesus-aam qanrutai yugugaat, “Uayaaritulitun-qaa pitarrlua taiguci, nuussirpalgirluci kaugtuutalgirluci-llu tegungnaqlua? Unuaquaqan Agayuvigmi aqumgalua elicungcaringe'rma teguksaitarpecia.

⁵⁶Tau͡gaam makut tamarmeng tuaten ellirtut, prophet-aat igallrit piciurtesqelluki.” Elitnaurain-llu tamarmeng unitaat, qimagluteng-llu.

⁵⁷Tegustellrin-llu Jesus-aaq ayautaat Caiaphas-aamun agayulirten͞gunermun; tuavet-llu quyurtellruut igatulit, ciulirneret-llu.

⁵⁸Tau͡gaam Peter-aam yaaqvaarkun kingunrirturaa, agayulirten͞gunrem-llu qaillukuarvian elaqlianun iterluni, aqumluni-llu anguyagtet nayurtet akuliitnun iqua atanqen̄aluku.

⁵⁹Tua-llu agayulirten͞gunret qaillukuarten͞gullgutkelriit-llu tamarmeng piciunrilngurnek nallunairutkarcurtut Jesus-aamun, tuqucetnaluku;

⁶⁰tau͡gaam nataqutevkenateng, nallunairistet iqluulriit amlleret taingraata, cali nataqutenritut camek. Kinguatni nallunairistek iqluulriik taiguk,

⁶¹qanerlutek-llu, “Angun una qanellruuq waten, ‘Una Agayutem Enii piunriryugngaaqa, ernerni-llu pingayuni ataam naucugngaluku.’”

⁶²Agayulirten͞guneq tua-i nangertuq, Jesus-aaq-llu aptaa, “Kiutekaituten-qaa? Caugat makut nallunairutet elpenun?”

⁶³Tau͡gaam Jesus-aaq nepaituq. Agayulirten͞gunrem cali aptaa, “Agayun unguvalria nallunairtekluku ukvernarcarisqamken qanrutesqellua taungucirpenek Christ-aq Agayutem Qetunraa.”

⁶⁴Jesus-aam kiugaa, “Qanrucirpetun taunguunga; tau͡gaam qanrutamci, mat'um kinguani Yuum Qetunraa tangerciqerci Pinim tallirpian tungiini aqumgaluni, qiliim-llu amirluikun agiirrluni.”

⁶⁵Tua-i agayulirten͞gunrem aturani allgurai, qanerluni, “Agayutmek qacungakiuq, allamek-qaa nallunairistem̄ek pinarqukut? Wani-wa qacungakicia niitarci tungaunaci.

⁶⁶Qaillun umyuarteqseci?” Kiugaat, “Tuqutnarquq.”

⁶⁷Qeciraat-llu kegginaakun, tengluarluku-llu, ilaita-llu qacartaat unatmeggnek,

⁶⁸qanerluteng, “Wangkutnun ap'ringnaqi, Christ-aaq! Kia qacartaten?”

⁶⁹Tuani Peter-aaq qakmani aqumgauq, 'laavkaam elaqliani; tuani-llu pistet arnat iliita ullagaa qanrulluku, “Elpet-llu cali ilakelliniatgen Jesus-aam taum Galilee-armium.”

⁷⁰Tau͡gaam ellii meci'irtuq taukut tamarmeng takuatni, qanerluni waten, “Qanellren cauciitaqa.”

⁷¹Elaturramun-llu anngan, arnam allam tangrraa, qanrutekluku-llu tuanelngurnun, “Una angun cali Jesus-aam Nazareth-aarmium ilakellrua.”

⁷²Tau͡gaam meciranqigtuq ukvernarcariluni, “Angun tauna nalluaqa.”

⁷³Wanikuan cali tuani nangengqalriit ullagaat Peter qanrulluku-llu, “Ilumun taukut ilakliniatgen, qanllerpet nallunairaaten.”

⁷⁴Tau͡gaam acivaqanirluni ukvernarcariluni-llu qanertuq, “Angun tauna nalluaqa.” Egmianun-llu yaqulek qalriaguq.

⁷⁵Peter-aam-llu neq'eraa Jesus-aam qanellra, waten qanrutellruani, “Yaqulek qalriavailgan, mecirautekciqerpenga pingayurqunek.” Anluni-llu qiaqapigtuq.