Read Yupik Matthew 27 Bible Online

Matthew 27 - Yupik bible

Matthew 27

¹Ercan-llu, agayulirten͞gunret yuut-llu ciulirnerit qaillukuartut Jesus-aaq pitekluku, tuqucugluku;

²qillerqaarluku ayautaat, Pilate-aamun-llu nunam atanranun tunluku.

³Tuqutesqucia-llu tunestiin Judas-aam tangrramiu umyuarnayaguciuq akit-llu taukut, yuinaq qulnek cipnelget, ut'rutai agayulirten͞gunernun ciulirnernun-llu,

⁴qanerluni, “Wiinga picurlagtua ellualriim auga tunngamku.” Tau͡gaam qanertut, “Catnguciqat wangkutnun? Elpet pikaten.”

⁵Akit tua-i taukut Agayuvigpagmun egtai, ayagluni-llu ellminek qemituq.

⁶Tua-i agayulirten͞gunret akit taukut teguit qanerluteng, “Ukut Agayuvigpiim akiutainun ilaucunaitut, augem akikngaki.”

⁷Qaillukuarraarluteng-llu qikuliurtet nunautiitnek kipuyutkait allanret tungmagcivigkaatnek.

⁸Tamana pitekluku nuna tauna “Augtalegmek” aterpagtelaraat, cali watua maa-i.

⁹Tua-i piciurtuq Jeremiah-kun prophet-aakun qaneryaraqumalleq man'a: “Akit yuinaq qulnek cipluku teguit, akikiurumalriim akikai, akikiuratgu Israel-aam kinguvrin ilaita;

¹⁰qikuliurtet-llu nunautiitnun tunait, Atanermun alerquucimegcetun.”

¹¹Jesus-aaq-llu nangengqauq nunam atanran ciuqerrani, taum-llu aptaa, “Taunguuten-qaa Jews-aat Angayuqrat?” Jesus-aam kiugaa, “Aa-ang, taunguunga.”

¹²Tau͡gaam agayulirten͞gunret, yuut-llu ciulirnerit picetaarutengraatni kiunritqapigtuq.

¹³Pilate-aam-llu qanrutaa, “Niitenrituten-qaa ukut nallunairutaitnek ayuqenrilngurnek elpenun?”

¹⁴Elliin tau͡gaam kiunritaa carraungraan, nunam atanra irr'iqapigtelluku.

¹⁵Nunam atanra piciryaramitun Paaskaam nalliini itercimalriit iliitnek angicilartuq, yuut pisqumallratnek.

¹⁶Itengqalriartangqertuq-llu arcaqanqerrulriamek nallunailngurmek, Barabbas-aamek atengqerrluni.

¹⁷Tua-i yuut quyungqallratni, Pilate-aam aptai, “Naliagnek angicisqumacecia, Barabbas-aamek-qaa wall'u Jesus-aamek, Christ-amek aterpagcimalriamek?”

¹⁸Tua-i nallunrilamiki ciknakluku tunellrucianek.

¹⁹Aqumllermi qanercetaarvigmi aqumgallrani nulirran ullagcetaa qanrutesqelluku, “Angun tauna cayaqunaku, unuamek nangteqeqapigcama qavangurtullemkun tauna pitekluku.”

²⁰Agayulirten͞gunret tau͡gaam ciulirneret-llu yuut eguaqurait Barabbas-aaq kaigatkesqelluku, Jesus-aaq-llu tuqutesqelluku.

²¹Tua-i nunam atanran ataam aptai, “Naliak ukuk angiciiqsia elpecen̄un?” Kiugaat-llu, “Barabbas-aaq.”

²²Pilate-aam tua-i qanrutai, “Qaillun-mi tua-i Jesus-aaq piciqsia Christ-amek aterpagcimalria?” Tamarmeng-llu kiugaat, “Ussukcausgu.”

²³Elliin cali aptai, “Ciin-wa, camek assiilngirta?” Tau͡gaam qayagpagtut, “Ussukcausgu.”

²⁴Pilate-aam tangrramiu cakanirngailucini, tau͡gaam-llu piyunairusngiinaata, tua-i mermek pivkarluni unatni erurai yuut takuatni, qanerluni, “Wiinga pinarqenrilnguugua uum ellualriim auganun; elpeci pikarci.”

²⁵Tua-i yugugaat tamalkirrluteng kiugaat, “Auga wangkutnun tusngali irniamten̄un-llu!”

²⁶Taumek Barabbas-aaq angitaa ellaitnun, Jesus-aaq-llu piqertuarraartelluku, ellaitnun tunaa ussukcautesqelluku.

²⁷Tua-i-llu nunam atanran anguyagtain Jesus-aaq teguat ayaulluku-llu nunam atanran 'laavkaaranun, anguyagten͞gullguteteng-llu tamalkuita elliinun quyurtait.

²⁸Matarqaarluku-llu, 'lumarrarmek kavirlimek acetaat.

²⁹Cukilananek-llu piirriluteng nasqerrutekiuraat, qamiqurranun-llu elliluku, cuplulegmek-llu tegumiiraat unataikun tallirpilirnerikun, ciisqumiggluteng-llu ciuqerranun ciktaarviknguaraat piciliutekluku, qanerluteng, “Waqaa, Jews-aat Atanrat.”

³⁰Qeciraat-llu, cuplulek-llu teguluku kaugturaat qamiqurrakun.

³¹Piciliutekumariamegteggu-llu kavirlimek matartaat aturainek-llu ac'elluku, ayautaat-llu ussukcautnaluku.

³²Anngameng-llu, yuk nall'artaat Cyrene-armiu Simon-aamek at'lek; tauna unayaqaat kelistaa quukataasqelluku.

³³Ullakengarteng-llu tekicamegteggu Golgotha-mek aterpagcimalria, (yugcetun Ilquignertalek),

³⁴tuani mercetaat quunarqelriamek cungarninarqelriamek avulegmek; uiggaarluku-llu meryunritaa.

³⁵Ussukcaucimariamegteggu-llu aturai avenqegtait nall'arcetaarutekluki;

³⁶aqumluteng-llu kellutekaat.

³⁷Picetaaruyutii-llu igaq elliat qamiqurran quliinun waten: UNA JESUS-AARUUQ JEWS-AAT ATANRAT.

³⁸Tuani cali uayaaritulik malruk kelistaagnun ussukcautagket, aipaa tallirpilirneranun, aipaa-llu iqsulirneranun.

³⁹Tamaaggun-llu kitulriit qacungakaat, ungaulugvikluku,

⁴⁰qanerluteng, “Qumlinaqvaa, Agayuvigmek itumciyulriami, pilinqiggluten-llu ernerni pingayuni! Elpenek anirtua! Agayutem Qetunraqkaten, kelistamek atraa!”

⁴¹Tuaten cali agayulirten͞gunret piciliutekaat, igatulit ciulirneret-llu ilakluki, qanerluteng,

⁴²“Allat anirtullruyaaqai, ellminek tau͡gaam anirturciiganani. Israel-aat ataneqkatni kelistamek atrarli, ukvervikniarput.

⁴³Agayun cacetuqutekellrua, Agayutem anirturliu watua piyukuniu, qanellruan waten, ‘Agayutem Qetunraqaanga.’”

⁴⁴Tuaten-llu cali taukuk uayaaritulik ussukcaucimallgutegken piciliutekaak.

⁴⁵Erenrem-llu qukallranek ayagluni nuna tamarmi tan'geriuq, sass'at pingayuat tekilluku.

⁴⁶Sass'at-llu pingayuatni Jesus-aaq qayagpagtuq waten, “Eli, Eli, lama sabachthani?” Tamana mumiggluku waten ayuquq, “Agayutmaa, Agayutmaa, ciin unicia?”

⁴⁷Tuani-llu nangengqalriit ilaita niicamegteggu qanertut, “Atam, Elijah qayagaa.”

⁴⁸Iliit-llu aqvaqurluni urungalngurmek aqvatuq, quunarqelriamek-llu mecirluku, cuplulegmun-llu kapulluku, tuaggun mercetaa.

⁴⁹Ilait tau͡gaam qanertut, “Uitaqerci, Elijah-m anirturyarturciqlia, tangerrnaurput.”

⁵⁰Jesus-aaq-llu qayagpaggaarluni anernerirtuq.

⁵¹Tangerrluku-llu, Agayuvigpiim capkutaa qup'uq malruurrluni pikaken ayagluni kanavet. Nuna-llu pektuq, qiuret-llu qupurluteng,

⁵²qungut-llu ikirtut, yuunrillret-llu ellualriit amlleret temait maktut.

⁵³Qungunek-llu anluteng nunarpagnun kenciknarqelrianun itertut maktellran kinguani, amllelrianun-llu tangercetut.

⁵⁴Anguyagtet-llu atanrata, ilain-llu Jesus-aam tarikestain, tangrramegteggu nuna pektellria, irr'inarqelriit-llu allat, tua-i alingeqapigtut qanerluteng, “Ilumun una yuk Agayutem Qetunraqlinia.”

⁵⁵Arnat-llu tuani yaaqvani nangengqaut tangvagluku, Galilee-amek maligutellriit Jesus-aaq kevgiurluku.

⁵⁶Taukut ilakait Mary Magdalene, Mary-llu, James-aam Joseph-aam-llu aaniik, Zebedee-am-llu cali qetunraagken aaniik.

⁵⁷Atakuan-llu, angun tukuulria Arimathea-rmiu, Joseph-aamek at'lek taiguq, Jesus-aamun elitnauraulria.

⁵⁸Taum ullagaa Pilate-aaq, Jesus-aam-llu temiinek kaigavikluku. Pilate-aam-llu tunesqaa elliinun.

⁵⁹Joseph-aam-llu tauna tema tegua, 'lumarrarmun-llu qaterlimun imgulluku,

⁶⁰qungurkiuraminun-llu nutaramun elliluku, qiurmi nayuumalriamun; painga-llu teggalqurpagmek akaggvikraarluku ayagtuq.

⁶¹Mary Magdalene, aipaa-llu cali Mary, tuantellruuk, qungum akiani aqumgalutek.

⁶²Unuaquan-llu, upcaram tungliani agayulirten͞gunret Pharisee-aat-llu quyurrluteng Pilate-aaq ullagaat qanerluteng,

⁶³“Ataneq, wangkuta neq'akarput iqlungalriim taum qanellra unguvallermini waten, ‘Erenret pingayuureskata makciqua.’

⁶⁴Tamana pitekluku qunguq tarikescirru erenret pingayuata engeliinun, elitnaurain teglegyarturyuaraat, yugnun-llu qanerluteng ‘Maktelliniuq tuqumek.’ Tua-i-llu iqluurineq kinguqliq arcaqanruyuartuq ciuqlirmi.”

⁶⁵Pilate-aaq qanertuq ellaitnun, “Elpeci tarikestekangqertuci, ayagci, piyunartacirpecetun-llu pengegnaircarciu.”

⁶⁶Tua-i ayagtut qunguq-llu tarikesten̄un tarikevkarluku, teggalquq-llu nepyucirluku.