Read Yupik Matthew 3 Bible Online

Matthew 3 - Yupik bible

Matthew 3

¹Tamatum nalliini John-aaq Angllurcecista tekituq, Judea-m-llu yuilqurtaani qaneryariurluni, qanerluni,

²“Umyualinqigci, qiliim angayuqauvia ukaqsigian.”

³Wani-wa tauna qanrutkumauq Isaiah-kun prophet-aakun waten, “Yuilqumi qayagalriim erinii; Ataneq tumkaanek upyuciu, pekcararkai-llu elluaqcarciki nalqigcarluki.”

⁴John-aaq una aturangqertuq ungungssim qulugtellriim melqurrinek naqugutengqerrluni-llu amimek, ner'aqluni-llu petgertayulirpagnek, evegtaat-llu neqkautaitnek.

⁵Yugugaat-llu ullagaat, Jerusalem-aarmiut, Judea-m-llu tamarmi yuin, Jordan-aam-llu tamarmi yuin.

⁶Angllurcetevkartut-llu elliinun Jordan-aami assiilnguteng apervikuatekluki.

⁷Tau͡gaam Pharisee-aat amllellriit Sadducee-aat-llu tangrramiki anglluryulriit qalarutai, “Elpeci ciissirpiit piyagaitni, kia apertuutaci Agayutem eq'ukutii qimaasqelluku?

⁸Taumek yuucirpeciuggun umyualinqigtellerci nasvagciu.

⁹Umyuarpeciuggun-llu qankunavkenaci: ‘Abraham-aam kinguveqaakut.’ Waniwa qanrutamci Agayun makunek teggalqunek kinguverkiuryugngauq Abraham-aamun.

¹⁰Cali-llu napat aciat ellivikumauq piqertuutarmek, napat atsangenrilnguut assilrianek, kepumaarkauluteng kenermun-llu muriulluki.

¹¹Wiinga merkun angllurcetamci umyualinqigtellerkarpecen̄un, tau͡gaam cimirkaqa tauna, tukninrulria wangni, aluilitagkenek tegumiallerkaqa tunriukutnarquq; elliin angllurceciiqaaci Anernerkun Tanqilriakun, kenerkun-llu.

¹²Aqlayutminek avalingqertuq, mukaarkat-llu kaimvviat imairciqaa, mukaarkat-llu quyurrluki qemaggviminun, tau͡gaam carangllugkuat ekuavkararkaugai kenermek nipsuilngurmek.”

¹³Taum nalliini Jesus-aaq Jordan-aamun tekituq Galilee-amek, John-aamun-llu angllurcesqumaluni.

¹⁴John-aam pisqumanricaaqaa qanrulluku, “Elpet tau͡gaam angllurcetnaqsaaqerpenga, amta-llu-qaa wangnun pisqumaluten?”

¹⁵Jesus-aam kiugaa, “Watua tuaten pivkarnga, tuaten pinaqngakuk elluam pisqutii aturluku.” Tua-i tuaten pivkaraa.

¹⁶Anglluumariami-llu Jesus-aaq egmian tag'uq mermek; taguciatun-llu qilak ikirtuq, Agayutem-llu Anernera tangrraa atralria yaqulegtun, elliinun-llu mill'uni.

¹⁷Erinatanguq-llu qilagmek qanerluni, “Wani-wa una Qetunraqa kenkek'ngaqa, ilukegcitkaqa.”