Read Yupik Matthew 5 Bible Online

Matthew 5 - Yupik bible

Matthew 5

¹Yugugaat tangrramiki ingrimun mayurtuq, aqumngan-llu elitnaurain ullagaat.

²Elicungcarai-llu qanerluni:

³“Atawaqertut ellmeggnek picalqukenrilnguut, pikngamegteggu qiliim angayuqauvia.

⁴“Atawaqertut angniilnguut, qarutaarumaarkaungameng.

⁵“Atawaqertut ellmikutuulriit, piutengqerrarkaungameng nunami.

⁶“Atawaqertut kailriit meqsulriit-llu elluamek, camirtarkaungameng.

⁷“Atawaqertut takumcukitulit, takumcukumaarkaungameng.

⁸“Atawaqertut ircaqumegteggun menuilnguut, tangrrarkaungamegteggu Agayun.

⁹“Atawaqertut uitanqegcivkarilriit, Agayutem yuinek aprumaarkaungameng.

¹⁰“Atawaqertut nangcimalriit elluangnaqucirteng pitekluku, qiliim angayuqauvia pikngamegteggu.

¹¹“Atawaqertuci qumlikekaceci nanglluci-llu assiitellrianek-llu ayuqenrilngurnek piciliraqluci wii piteklua.

¹²Nunaniryugci angnirpagluci-llu, akiliutekarci angengan qilagmi. Tuaten nangtellruitki ciuvcen̄i qaneryariulriit.

¹³“Nunamun taryuuguci. Tau͡gaam taryuq taryurninairuskan, ca taryirciqau? Catngunriciiquq tau͡gaam egcimaciquq yugnun tutmartelluku.

¹⁴“Elpeci tanqiuguci ellamun, ingrim qainganelnguut nunat iirumangaitut.

¹⁵Tuaten-llu kenurraq kumalria puckam acianun ellimangaituq, tau͡gaam kenurrarvigmun, nutaan tanqigiarkauluki enemelnguut tamalkuita.

¹⁶Tuaten tanqigci yugnun tamaitnun, tangerrnaurait caliaci assilriit, nanrarnauraat-llu Atasi qilagmelnguq.

¹⁷“Umyuarteqenrici tekicuklua caunrirnaluki alerquutet, prophet-aat-llu igait. Tekitenritua caunrircarturluki, tau͡gaam qaqicarturluki.

¹⁸Ilumun qanrutamci, alerquutet iliit carraungermi qaqimarivailgan, piunrirngaituq qiliim nunam-llu iquklitlerkaagnun.

¹⁹Kina imna alerquutmek carraungraan narurcilria, ilaminek-llu iqlutmun eguaquriluni, Agayutem takuani catngunrituq. Tau͡gaam kia imum atuquniki ayuqucirtuutekluki-llu ang'arkauguq Agayutem angayuqauviani.

²⁰Qanrutnaamci, Agayumacirci elluanrunrilkan igatulit Pharisee-aat-llu agayumaciatni, tua-i qiliim angayuqauvia iterngaitarci.

²¹“Niitelararci ak'a tamaani inerquun: ‘Tuquciyaqunak, kina-llu imna tuqucilria, qanercetaarumaciquq.’

²²Wiinga tau͡gaam qanrutamci, kina imna ilaminun paggluirucunrilnguq qanercetaarumaarkauguq; kina-llu ilaminek caunrilkilria angtuamek qanercetaarumaarkauguq; kina-llu imna ilaminek aniqlaayulria kenermun nipsuilngurmun piarkauguq.

²³Agayutmun cikiqengqatallerpeni ekuagarkanek neq'ak'ngangqerquvet assiilngillerpenek ilavnun,

²⁴cikiutekan tuavet ekuavigmun unilluku, ilan ullagluku kenegyaguqaarlutek, nutaan cikiutekan cikiuteksarturru.

²⁵Inglun-llu kenegyagutengnaqiu qanercetaarvigmun ullautellerpetegni, cuqcistem̄un tunyuaraaten ingluvet, cuqcistem-llu tunluten anguyagtem̄un, taum-llu itercivigmun iterrluten.

²⁶Ilumun qanrutamken, tuaken anngaituten anucimirqecetaarutvet akilitlerkaan engeliinun.

²⁷“Niitelararci ak'a tamaani inerquun: ‘Akusrarutekiyaqunak.’

²⁸Wiinga tau͡gaam qanrutamci, kia imum umyuamikun arnamek aglumakikuni, ak'a akusrarutekumaria ircaqumikun.

²⁹Iivet tallirpian picurlagceskaten, ikugluku egesgu, atawaunruciquten iingqeng'e'rpet inglupiamek tamalkirrluni temen nangteqnamun egcimanrilkuni.

³⁰Unatvet-llu tallirpian picurlagceskatgen, kepiki eggluki-llu, atawaunruciquten inglupiamek unatengqeng'e'rpet, tamalkirrluni temen nangteqnamun egcimanrilkuni.

³¹“Cali igausngauq: ‘Angutem nuliani unicukuniu kalikamek avvucaramek cikiisqelluku.’

³²Wiinga tau͡gaam qanertua: Kia imum nuliani avvuskuniu caruyallrunrilnguq akusrarutekevkaraa, kia-llu imum avvucimalria nuliqsaguskuniu cali akusrarutekaa.

³³“Cali ciuqvani qanrutkumalleq niitarci man'a, ‘Iqluluci ukvernarcarviksaqunaciu Agayun, tau͡gaam Agayun qigcikluku ukvernarcarillren aturarkaugan.’

³⁴Tau͡gaam qanrutamci, ukvernarcariyaqunaci watqapik, wall'u qilagmun, wani-wa Agayutem angayuqauvikngaku.

³⁵Wall'u nunamun, wani-wa it'gain tusngavikngatgu, wall'u Jerusalem-aamun, wani-wa Atanerpiim nunakngaku.

³⁶Tuaten-llu cali qamiquvgun ukvernarcarviksaqunaku, wani-wa elpenek nuyan atauciungraan qat'risciigatan tungurisciiganaku-llu.

³⁷Tau͡gaam qanraqavci ‘angllerci’ wall'u ‘qangaallerci’ camek ilavkenaku, allamek qanquvci assiilnguuguq.

³⁸“Cali-llu niitelararci man'a, ‘Yuk iingirkengkan, iingircesqelluku, wall'u keggutairkengkan keggutairesqelluku.’

³⁹Tau͡gaam qanrutamci: akinauryaqunaci, tau͡gaam yuum qacareskaten tallirpiakun ulluvavet, inglua cali manikiu.

⁴⁰Cali-llu yuum piksugiikaten paltuugpenek qaillukuarten̄un-llu ayaulluten, tua-i qallirraan-llu cali pikevkarru.

⁴¹Cali-llu yuum maliksukaten mile-aurtellranun, maligesgu malruurtellranun.

⁴²Cikiisqellria-llu cikirru cikiisqutiinek, navraryulria-llu qunukutevkenaku.

⁴³“Cali niitelartuci mat'umek, ‘Ilan kenkarkaugan inglun-llu uumikluku.’

⁴⁴Tau͡gaam qanrutamci: Kenkiciki ingluci, piicauciki-llu tangerrnakesceci nangtesceci-llu.

⁴⁵Atavci qilagmelnguum yuknauraaci. Wani-wa akerta pic'et'laraa assiilngurnun assilrianun-llu, cali-llu ellallircetaqluku ellualrianun elluanrilngurnun-llu.

⁴⁶Wani-wa kenkesteci kiingan kenkekuvciki, camek akqutengqerceci? Tuaten-llu-qaa piksaitut akiliqurautnek quyurcistet?

⁴⁷Cali-llu ilaci nallaitgun elluarrluki qalaruskuvciki, assinruuci-qaa allani? Tuaten-llu-qaa piksaitut agayumanrilnguut?

⁴⁸Taumek, kitaki elpeci, ellualriarungnaqici, Atavcetun qilagmelngurmi ellualriaruciatun.”