Read Yupik Matthew 7 Bible Online

Matthew 7 - Yupik bible

Matthew 7

¹“Cuqciyaqunaci ilavcen̄ek, cuqcimanritnaurtuci.

²Maa-i cuqyutlerpecen̄ek cuqcimaciquci, usperilaucirpecetun-llu pimaciquci.

³Ciin-llu verun mikengraan tangvagciu ilavet iingani, tau͡gken veruten angelria iivni elpekevkenaku?

⁴Wall'u qaillun ilavnun qaneryugngasit, ‘Veruten au͡g'arnaurqa iivnek.’ Amta-llu verun angqapigtellria iivni uitaluni?

⁵Elpet malrugnek umyualegmi, ciumek verun angelria iivnek au͡g'arru, nutaan meciknaurtuten ilavet verutii iingani au͡g'allerkaanek.

⁶“Menuilnguq cikiutekenriciu qimugten̄un, qunukeksi-llu egteksaunaku sitiinkaat ciuqerratnun, tua-i tutmarciqait, caugarrluci-llu akngiqluci.

⁷“Kaigaci, tua-i cikiumaciquci, yuarci, tua-i nataquciiquci, tukriarci, tua-i ikirucimaciquci.

⁸Wani-wa kina imna kaigalria cikiumalartuq, kina-llu imna yualria nataqut'lartuq, kina-llu imna tukrialria ikirusngaluni.

⁹Kia nalirpeci qetunrani kaigalria keliparyugluni cikirciqau teggalqumek?

¹⁰Tuaten-llu neqmek kaigakan cikirciqlia ciissirpagmek?

¹¹Tua-i assiileng'e'rpeci nallunrituci cikiqengllerkarpecen̄ek assilrianek cikiutnek mikelngurpecen̄un. Qaillun-kiq pitalriamek Atavci qilagmelnguum assilrianek cikirniartaki kaigavikesten̄i!

¹²Qaillun tua-i pisqumakuvci yugnun, tuaten-llu yuut pilarciki. Waniwauguq alerquun prophet-aat-llu pisqutkaat.

¹³“Amigkun nequkilngurkun itqici. Waniwa picurliim tungii amigtangqertuq nequtulriamek, tumyararluni-llu iqtulriamek, amlleret-llu tamana aturluku it'lartut.

¹⁴Tua-i unguvam iteryaraa caknaanarquq, tumyaraa-llu nequkilami nataqestai ikget'lartut.

¹⁵“Mulngakici qaneryariurualrianek piciunrilngurnek. Taukut ullalaraiceci qusngit amiitnek aturarluteng, tau͡gaam ilumegteggun keglunruut alingnarliuluteng.

¹⁶Elpeci atsaitgun nallunriciiqaci. Cukilanat-qaa tegusvik'larait wine-anek, naunerrluut-llu-qaa tegusvik'larait atsanek?

¹⁷Tuaten-llu-wa napa assilria atsanglartuq assilrianek, tau͡gken napakegtaunrilnguq naugiarkauguq assiilngurnek.

¹⁸Napa assilria naugisciigatuq assiitellrianek; tuaten-llu napakegtaunrilnguq naugisciigatuq assilrianek.

¹⁹Tamarmeng napat naugiyunrilnguut assilrianek, iqucimaarkaugut, kenermun-llu egcimaluteng.

²⁰Taumek atsaitgun nallunritarkaugaci.

²¹“Wangnun qanellrung'e'rmeng waten, ‘Ataneq, Ataneq’, tamarmirrluteng iterngaitut qiliim angayuqauvianun; tau͡gaam Atama qilagmelnguum pisqutiin aturtii itrarkauguq.

²²Ernermi taumi amllelriit wangnun qanerciqut, ‘Ataneq, Ataneq, qaneryariunritukut-qaa aterpegun, cali-llu aterpegun anernerrluut anevkarluki, aterpegun-llu irr'inarqelrianek amllernek caliaqluta?’

²³Tuani qanruciiqanka, ‘Nalqapigtamci, wangnek ayagci assiilngurnek calilriani.’

²⁴“Kina imna qaneryaramnek niitellria aturluki-llu, ayuquq yugtun umyuartulriatun qiurem qaingani enelilriatun.

²⁵Tua-i-llu ellarvanguq, ulesqiirluni-llu, kayungami-llu 'laavkaaq tauna callugyaaqaa, tau͡gaam imenrituq qiurmek tusnganengqerrami.

²⁶Kina-llu qaneryaramnek makunek niitellria aturpek'naki-llu, ayuqarkauguq yugtun umyugailngurtun qaugyami enelilriatun.

²⁷Ellarvangan-llu ulesqiirluni kayungluni-llu, 'laavkaaq tauna callugaa imlluku itumteqapiggluku-llu.”

²⁸Qaneryarani ukut Jesus-aam taqngaki yugugaat irr'ikaat,

²⁹nallunrilngurtun ayuqucirtuateng, igatulicetun pivkenani.