Read Yupik Matthew 8 Bible Online

Matthew 8 - Yupik bible

Matthew 8

¹Ingrimek-llu atraan yugugaat maligtaat.

²Tangerrluku-llu mamyuilngurmek apqucilek tekituq ciuqerranun-llu ciisqumiggluni qanertuq, “Ataneq, piyukuvet carriryugngaarpenga.”

³Jesus-aam-llu unatni yaggluki agturaa, qanerluni-llu, “Piyugtua, carriuten.” Egmianun-llu apquciirutuq.

⁴Jesus-aam-llu qanrutaa, “Kitumun qaneryaqunak, tau͡gaam agayulirtem̄un tangercecartua, cikiun-llu Moses-aam alerquutekellra cikiutekiu tamakut nallunriutekaatnek.”

⁵Jesus-aaq-llu Capernaum-aarmiunun tekican atanirturilriim ullagaa kaigavikluku,

⁶“Ataneq, wiinga pisteka nunamni taklartuq naulluuluni pekcesciigaliluni, nangteqeqapiggluni-llu.”

⁷Jesus-aam-llu qanrutaa, “Ullagciqaqa anirturyarturluku.”

⁸Anguyagtet atanirturtiita kiugaa, “Enemnun taikuvet tun'ernarqeciquten, tau͡gaam qanngerpet qaneryararpegun assiriciquq pisteka.

⁹Wani-wa wiinga pisten͞guyaaqua atanerni, anguyagtet tau͡gaam ataniumaluki, una ayaasqekumni ayagarkauguq, una-llu taisqekumni taigarkauguq, pisteka-llu qaillun pisqaqamku tuaten pilartuq.”

¹⁰Jesus-aam niicamiu man'a irr'iqapigtuq qanrulluki-llu malini, “Ilumun qanrutamci, waten pitalriamek ukvermek nataquteksaitua Israel-aani.

¹¹Qanrutamci-llu, amlleret tekiciiqut calaramek kanavamek-llu aqumeciqut-llu qiliim angayuqauvianun Abraham-aaq, Isaac, Jacob-aaq-llu ilakluki.

¹²Tau͡gaam angayuqauviim yui cingqaqumaarkaugut ancimaluteng tan'gercetqapigtellriamun. Tuani qiaciqut kavcagciarkauluteng-llu keggutmeggnek.”

¹³Jesus-aam-llu qanrutaa anguyagtet atanirturtiit, “Tua-i ayii, ukverpet pisquciatun tuaten pimauten.” Pistii-llu sass'ami taumi assiriuq.

¹⁴Peter-aam-llu eniinun Jesus-aaq itrami, tuani Peter-aam cakia tangrraa naulluullinilria puqelvagluni.

¹⁵Unataikun-llu agtuani puqlairutuq. Tua-i-llu makcami Jesus-aaq neqkiurluku.

¹⁶Atakuan-llu amllelriit anernerrlulget taitait. Elliin-llu qanllermikun anernerrluut anevkarai, naulluulriit-llu tamalkuita canrircetai.

¹⁷Piciurrluku Isaiah-kun prophet-aakun qanrutkumalria, “Ellminek tegua pinialucirput, piksagulluki-llu naulluuteput.”

¹⁸Jesus-aam avatmini tangrramiki yugugaat alerquriuq qeraucesqelluni nanvam akilirneranun.

¹⁹Tuani igatulim ullagaa, qanrulluku-llu, “Elitnauristaa, maligciiqamken ayallren tamalkuan.”

²⁰Jesus-aam kiugaa, “Kaviaret igtengqertut, yaqulget-llu ellamelnguut unglungqertut, tau͡gaam Yuum Qetunraa enaituq inarrvigkaminek.”

²¹Allam-llu elitnauram qanrutaa, “Ayaggaarlii ataka tungmagcarturluku.”

²²Tau͡gaam Jesus-aam qanrutaa, “Maligesnga, tuqumalriit ellmeggnek tungmageskilit.”

²³Tua-llu angyamun ekngan elitnaurain maligtaat.

²⁴Tangerrluku-llu, alqunaq kayunguriuq nanvami. Qairpiit-llu tuaten angyaq ekurluku. Tau͡gaam ellii qavartuq.

²⁵Elitnaurain-llu ullagaat, tupaggluku-llu qanrutaat, “Ataneq, anirturkut akacakatartukut!”

²⁶Tau͡gaam elliin qanrutai, “Ciin nangyaryugceci, elpeci ukverkilngurni?” Makluni-llu anuqa meq-llu inerqurak; tamaa-llu quunenguq.

²⁷Tau͡gaam taukut angutet irr'ikluku qanertut, “Qaillun una yuk ayuqa, anuqem mer'em-llu niisngaluku?”

²⁸Tua-i-llu akilirneranun tekican Gadarenes-aarmiunun, malruk anernerrlulgek pairtak, qungunek anlutek, alingnarqeqapigglutek, yuut-llu tamaaggun kituyunaunateng.

²⁹Taukuk qayagpagtuk qanerlutek, “Caciqsit wangkugnun, Jesus-aaq Agayutem Qetunraa? Tekituten-qaa nangetnalunuk pinarivailgan?”

³⁰Yaaqsinrilkiitni-llu sitiinkaat katngat uitaut nerelriit.

³¹Anernerrluut-llu kaigavikaat, “Aneskuvkut sitiinkaanun katnganun ayagceskikut.”

³²Qanrutai-llu, “Tua-i ayagci.” Anngameng-llu sitiinkarugarnun katnganun itertut; tangerrluku-llu sitiinkaat tamarmeng picimegcetun aqvaqurluteng pen̄akun nanvamun igtut qecuqilluteng-llu mermi.

³³Taukut-llu tarikestait qimagtut nunarpagnun, qanemcikluki-llu tamalkuita, taukuk-llu anernerrlulgek ayuquciagnek.

³⁴Tamaa-llu nunarpiim yui tamarmeng an'ut pairrsaagluku Jesus-aaq. Tangrramegteggu-llu kaigavikaat nunameggnek ayaasqelluku.