Read Yupik Matthew 9 Bible Online

Matthew 9 - Yupik bible

Matthew 9

¹Jesus-aaq-llu angyamun ek'uq, qerarluni-llu nunaminun tekilluni.

²Tangerrluku-llu angun nat'mikun nalamalria taitaat elliinun inarrvigmi taklaluni. Jesus-aam-llu ukvertaciat tangrramiu nalamalria qanrutaa, “Qetunraaq, caceturi, assiilnguten au͡gaumaut.”

³Igatulit-llu ilaita qaneksuarautekaat ellmeggnun, “Una angun piciliutekiuq.”

⁴Tau͡gaam Jesus-aam umyugait nallunrilamiki qanertuq, “Ciin umyuarteqseci assiilngurmek ircaqurpeciuggun?

⁵Naliak qacignarqenrua, qanerluni, ‘Assiilnguten au͡gaumaut,’ wall'u qanerluni, ‘Makten piyualuten-llu’?

⁶Tau͡gaam nallunritesqelluci Yuum Qetunraa assiilngurnek au͡g'ariyunarqucianek nunam qaingani.” Naulluulriamun qanertuq, “Makten, inarcessuuteten-llu teguluki enevnun ayii.”

⁷Tauna-llu maktuq ayagluni-llu eneminun.

⁸Tau͡gaam yugugaat tangrramegteggu alingut, Agayun-llu nanraraat, pinimek tuaten pitalriamek cikiqengelria yugnun.

⁹Jesus-aaq-llu tamaaken ayiimi angun tangrraa Matthew-mek at'lek akiliquraucivigmi aqumgalria. Qanrutaa-llu, “Maligesnga.” Tauna-llu nangertuq maliggluku-llu.

¹⁰Enemi-llu aqumgallrani nerluni, amllelriit akiliqurautnek quyurcistet, assiilngiumalriit-llu taigut ilalirluku elitnaurai-llu.

¹¹Tau͡gaam Pharisee-aat tamana tangrramegteggu qanrutait elitnaurai, “Ciin uum elitnauristevci akiliqurautnek quyurcistet assiilngiumalriit-llu nerellgutek'lartaki?”

¹²Jesus-aam man'a niicamiu qanrutai, “Canrilnguut yungcaristem̄ek pinarqenritut tau͡gaam naulluulriit.

¹³Tau͡gaam ayagci elitengnaqluku caucia mat'um: ‘Takumcukinermek piyugtua, cikiutnek ekuagarkanek piyugpek'nii.’ Tekitenrilama ellualriit umyualinqigcesqelluki tau͡gaam assiilngilriit.”

¹⁴John-aam elitnaurain ullagaat Jesus-aaq apluku-llu, “Ciin wangkuta Pharisee-aat-llu yaalarceta, elpet tau͡gken elitnauraten yaayuunateng?”

¹⁵Jesus-aam-llu qanrutai, “Kassuucaram-qaa yui angniitelartut nayurtekluku uikaun? Tau͡gaam erenret tekiciiqut uikautem ayaucimallerkaa ellaitnek; nutaan tuani yagciqut.

¹⁶Yuum 'liqneq nutaraq ilaarutkenrit'laraa ak'allarmun aturamun, 'liqnerem allgunqigtarkaungaku arcaqanruluku.

¹⁷Tuaten-llu wine-aq nutaraq imiutenrit'laraat caqunun ak'allarnun; caqun qagertarkaungaku, wine-aq-llu maqluni, caqun-llu caunrirluni. Tau͡gaam nutaraq wine-aq nutaramun caqumakuni tamarmek cangaituk.”

¹⁸Mat'umek qallasnginanrani tangerrluku atanirturilria tekituq, Jesus-aam-llu ciuqerranun ciisqumiggluni qanertuq, “Wiinga panika yuunrirtuq watua, tau͡gaam taikuvet unatevnek-llu pategvikekuvni unguirarkauguq.”

¹⁹Jesus-aam-llu nangerrluni maligtaa, elitnaurani ilakluki.

²⁰Tangerrluku-llu arnaq tekituq augmek apqucilek allrakuni qula malrugnek cipluku. Taum ullagaa kingunrakun, agturluku-llu aturain akuatgun,

²¹qanellruami ellminek waten, “Aturai tau͡gaam agtuqumki assiriciqua.”

²²Jesus-aam-llu kingyarluku tangvagaa qanrulluku-llu, “Paniik, caceturikina, ukverpet anirturaaten.” Arnaq-llu tauna sass'ami taumi assiriuq.

²³Atanirturilriim-llu eniinun itrami, Jesus-aam tangrrai aturcetaartet yugugaat-llu neplialriit.

²⁴Elliin-llu qanrutai, “Avici, nasaurluq una tuqunrituq tau͡gaam qavartuq.” Taukut-llu temcikaat.

²⁵Tau͡gaam yugugaat avicimariatni itertuq unataikun-llu teguani nasaurluq tauna maktuq.

²⁶Man'a-llu tuaten pillra qaneryaraurtuq tamiini nunami.

²⁷Tuaken-llu ayiin cikmiumalriik malruk maligtaak, qayagalutek-llu, “Usuuq, David-aam Qetunraan, takumcukikuk.”

²⁸Enemun-llu itran ullagaak. Tua-llu Jesus-aam aptak, “Ukvertutek-qaa piyunarqucingqerrucimnek?” Taukuk-llu qanertuk, “Qanrucirpetun, Ataneq.”

²⁹Tua-i-llu iikek agturai qanerluni, “Ukverpetek pisquciatun tuaten pimautek.”

³⁰Taukuk-llu iikek uituk. Jesus-aam-llu tamaa inerqurak, “Qaneryaqunatek.”

³¹Tau͡gaam taukuk ayiimek qalarutkaak nunani tamaitni.

³²Tangerrluku-llu yuk qanerciigalnguq elliinun ullautaat anernerrlugmek pilek.

³³Anernerrluk-llu anevkaumarian, yuk tauna qaneryaurtuq; yugugaat-llu tuanelnguut irr'iqapigtut qanerluteng, “Waten pilriamek tangeqsaitukut Israel-aani.”

³⁴Pharisee-aat tau͡gaam qanertut, “Anernerrluut anevkalarai anernerrluut atanratgun.”

³⁵Jesus-aaq-llu ayalartuq nunarpagnun nunarrarnun-llu tamalkuitnun elicungcariluni-llu agayuviitni, angayuqauviim qaneryarartaa qanrutekluku. Yuut-llu anirtularai naulluutaitnek apquciitnek-llu tamalkuitnek.

³⁶Tau͡gaam yugugaat tangrramiki takumcuyugtuq ellaitnek, ikayurnaqngata, sekavcimiita-llu qusngicetun aulukestailngurcetun.

³⁷Tua-i elitnaurani qanrutai, “Quyurtarkat amllerrsaaqut, tau͡gaam quyurcilriit ikgetut.

³⁸Taumek quyurciviim Atanra kaigavikiciu ayagcecisqelluku quyurciarkanek quyurcivigmun.”