Read Yupik Mark 10 Bible Online

Mark 10 - Yupik bible

Mark 10

¹Tua-i-llu nangerrluni tuaken ayagtuq Judea-mun tekilluni Jordan-aam akianun. Yugugaat-llu quyurrluteng ulliitni, ataam elicungcarai pilaucimitun.

²Tua-i Pharisee-aat ullagaat apluku-llu naspaaluku, “Angutem-qaa nuliani avvutellerkaa elluartuq?”

³Kiugai-llu, “Moses-aam qaillun picirkillruaci?”

⁴Qanertut-llu, “Moses-aam angun pillerkillrua igaasqelluku avvuyutkamek, avvutesqelluku-llu.”

⁵Tau͡gaam Jesus-aam qanrutai, “Ircaquci teggngata man'a picirkiun elpecen̄un igautaa.

⁶Tau͡gaam piurcimalriit piqarraallratnek, angun arnaq-llu piurcetak elliin.

⁷Tamana pitekluku angutem atani aanani-llu uniciiqak nuliani-llu atavikluku.

⁸Elkek-llu kemegkun atauciurciiquk; tuaten malruunrirlutek kemegkun atauciulutek.

⁹Taumek Agayutem kassuutellrek yuum avvusngaitak.”

¹⁰Tua-i-llu enemi elitnaurain tamatumek aptenqigtaat.

¹¹Qanrutai-llu, “Nuliaminek avvutellria allamek-llu nulirturluni, taumek akusrarutekiuq.

¹²Arnam-llu uini uniskuniu allamek-llu uingluni, tua-i akusrarutekevkartuq.”

¹³Mikelnguut-llu elliinun ullautait agtuusqelluki. Elitnaurat-llu ullaucilriit inerqurait.

¹⁴Tau͡gaam Jesus-aam tangrramiki qingaryugtuq qanrulluki-llu, “Mikelnguut wangnun taivkarciki, pinriceteksaunaki-llu, waten ayuqelriit Agayutem angayuqauvia pikngatgu.

¹⁵Ilumun, qanrutamci, kia imum Agayutem angayuqauvia mikelngurcetun ciuniunrilkuniu itervikngaitaa.”

¹⁶Tegularai-llu atawaqaasqelluki, unatminek-llu pategluki.

¹⁷Tumyaramun-llu anngan, yuum aqvaqurluni ullagaa ciuqerranun-llu ciisqumigtuq, apluku-llu, “Elitnauristaa assilria, qaillun pilua piksaguciiqsia unguva nangyuilnguq?”

¹⁸Jesus-aam-llu qanrutaa, “Ciin assilriamek tuqlurcia? Allamek assilriartaituq, Agayun kiimi assilriaruuq.

¹⁹Inerquutet nallunritaten: ‘Akusrarutekiyaqunak, Tuquciyaqunak, Teglegyaqunak, Piciliqengyaqunak, Uayaaringnaqsaqunak, Aatan aanan-llu takaqikek.’”

²⁰Qanrutaa-llu, “Elitnauristaa, tamakut tamalkuita maligtaqungnaqanka mikelnguullemnek.”

²¹Jesus-aam-llu tangvagaa, kenekluku-llu qanrutaa, “Atauciq piksaitan, ayagluten piten tamalkuita navrucarturki, kusgurnarqelrianun-llu cikiutekluki, tua-i qilagmi piutengqerciquten, tailuten-llu maligesnga.”

²²Tau͡gaam man'a qanellra kanaviqrutkaa, ayagluni-llu iluteqluni, tukuuqapigcami.

²³Jesus-aaq tua-i kingyarluni qanertuq elitnauraminun, “Atam Agayutem angayuqauvianun itlerkaq caknaanarqeqapigtuq tukuulriani!”

²⁴Elitnaurain-llu alangaarutkait qaneryarai. Tau͡gaam Jesus-aaq ataam piuq qanerluni ellaitnun, “Irniamaa, atam tukuutmeggnek cacetuqutekilriit Agayutem angayuqauvianun itlerkaat caknaanarqeqapigtuq.

²⁵Ungungssiq qulugtellria mingqutem iingakun itlerkaa qacignarqenruuq tukuulriim Agayutem angayuqauvianun itlerkaani.”

²⁶Tua-i nutaan alangaaqapigtut qanrulluku-llu, “Kina-kiq tua-i anirtuumaniarta?”

²⁷Jesus-aam tangvagluki qanrutai, “Yugni man'a caperrnaqsaaquq, tau͡gaam Agayutmi pivkenani, cat tamarmeng caperrnarqenrilata Agayutmi.”

²⁸Tua-i Peter-aam pia, “Atam, wangkuta tamalkuita unilluki maligtamteggen.”

²⁹Jesus-aaq qanertuq, “Ilumun, qanrutamci, kia yuum eneni, wall'u anelgutni, wall'u aanani, wall'u atani, wall'u irniani, wall'u nunautni uniteng'e'rmiki wii piteklua, qaneryaraq-llu assilria pitekluku,

³⁰yuinarnek tallimauqaqluki maani nunam qaingani pingciquq neqkaminek, anelgutkaminek, aanakaminek, irniarkaminek, nunautekaminek-llu, tau͡gaam nakukumaluni, cali-llu ellam aipaani unguva nangyuilnguq pikciqaa.

³¹Tau͡gaam amllelriit ciuqliulriit, kinguqliugarkaugut, kinguqliulriit-llu ciuqliugarkauluteng.”

³²Ayagtut-llu Jerusalem-aamun mayurluteng, Jesus-aam-llu ciuliqagtai. Ellait-llu alangaartut, maligutellriit-llu civuurluteng. Tua-i ataam taukut qulen malrugnek cipnelget ellminun taisqai, qanrulluki-llu qaillun pimallerkaminek,

³³“Atam, Jerusalem-aamun mayurtukut, tua-i Yuum Qetunraa tunumaarkauguq agayulirten͞gunernun kalikanek-llu elisngalrianun, taukut-llu tuqutnaqniciqaat, agayumanrilngurnun-llu tunciqaat.

³⁴Piciliutekciqaat-llu, qeciraluku-llu, piqertuarluku-llu, tuqulluku-llu, erenret-llu pingayuatni makciiquq.”

³⁵Tua-i James-aam John-aam-llu, Zebedee-am qetunraagken, ullagaak qanerlutek-llu elliinun, “Elitnauristaa, kaigatkamegnek elpenun niitesqumayaaqukuk.”

³⁶Aptak-llu, “Qaillun pisqumacetek wangnun?”

³⁷Kiugaak, “Aqumgaarkaurceskuk, nalirpuk tallirpigpet tungiini, nalirpuk-llu iqsurpet tungiini ucurnavni.”

³⁸Tau͡gaam Jesus-aam qanrutak, “Kaigatsek nalluartek. Mer'utem-qaa imaa wiinga mer'arkaqa mey'unarqertek? Anglluutemnek-llu-qaa anglluyunarqutek?”

³⁹Qanrutaak-llu, “Piyunarqukuk.” Jesus-aam-llu qanrutak, “Mer'utem imaa wiinga mer'arkaqa mer'arkauyaaqertek, anglluutemnek-llu angllurciqutek.

⁴⁰Tau͡gaam tallirpima iqsuma-llu tungiigni aqumgallerkaq wiinga pisqutkaqenritaqa, tau͡gaam tuaten pisqumalriit tuaten piciqut.”

⁴¹Ilaita qulen tamana niicamegteggu, James-aaq John-aaq-llu qingaryuutekagket.

⁴²Jesus-aam-llu taisqai qanrulluki-llu, “Nallunrituci, agayumanrilngurni atanrulriit atanrussaalartut, angnertait-llu takaqesqumalartut.

⁴³Tau͡gaam elpeci tuaten pikaunrituci; elpecen̄i angelriarurculria kevgiurli;

⁴⁴elpecen̄i-llu ciuqliuyulria tamalkuitnun kevgiulriaruli.

⁴⁵Wani-wa Yuum Qetunraa-llu tekitenrituq kevgiuresqelluni, tau͡gaam kevgiurarkauluni, unguvani-llu akikatun cikiutekarkauluku amllelriit utercecimatkaatnek.”

⁴⁶Tua-i Jericho-mun tekitut. Jericho-mek-llu anllermini elitnaurani yugugaat-llu amlleret ilakluki, tuani cikmiumalria kaigalria pekcarami aqumgauq, wani-wa Bartimaeus-aaq, Timaeus-aam qetunraa.

⁴⁷Taum niicamiu Jesus-aarucia Nazareth-aarmiu, qayagauq qanerluni, “Jesus-aaq, David-aam Qetunraa, takumcukia!”

⁴⁸Amllelriit-llu inerquraat nepliisqevkenaku; tau͡gaam tauna pikanirluni qayagauq, “David-aam Qetunraa, takumcukia!”

⁴⁹Tua-i Jesus-aaq arulairtuq qanerluni-llu, “Taisqiciu.” Cikmiumalria-llu taisqaat qanrulluku-llu, “Caceturi, nangerrluten-llu, taisqaaten.”

⁵⁰Ulikutani tua-i peggluku nangertuq, Jesus-aamun-llu ullaulluni.

⁵¹Jesus-aam-llu pia qanrulluku, “Qaillun pisqessit wangnun?” Cikmiumalriim-llu kiugaa, “Ayuqucirturtaa, tangerrsaurcesqua.”

⁵²Jesus-aam-llu qanrutaa, “Tua-i ayii, ukverpet anirturaaten.” Tamaa-llu tangerrsaurtuq, Jesus-aaq-llu maligtaa pekcarakun.