Read Yupik Mark 12 Bible Online

Mark 12 - Yupik bible

Mark 12

¹Ayuqestassiigutetgun qallautai, “Yuk wine-amek naucetaarvilillruuq, casgulirluku-llu, mecuirvigkaq-llu elagluku nayurvililuni-llu; nauceciiyurten̄un-llu navriutekaa, ayagluni-llu nunamun allamun.

²Pinarian-llu, pista ayagcetaa nauceciiyurten̄un, wine-at atsaitnek aqvatesqelluku.

³Taukut-llu teguat piqertuarluku-llu, ayagcetaat-llu unangevkarpek'naku.

⁴Cali pista alla taukunun ayagcetaa, taum qamiqurra kiliraat, kasngunarqelriakun-llu piluku.

⁵Cali alla ayagcetaa; tauna tuqutaat. Allat-llu amlleret ayagcet'laryaaqai; taukut ilait piqertuarait, ilait-llu tuqulluki.

⁶Cali-llu ataucimek qetunrangqertuq, kenkekminek, kiituani tauna-llu taukunun ayagcetaa qanerluni, ‘Qetunraqa takaqeciqaat.’

⁷Tau͡gaam taukut nauceciiyurtet qanruyutut, ‘Wani-wa paitangqerrarkaq, kitaki tuqullaut, tua-i paitarkaa piksagutniarput.’

⁸Tua-i teguat tuqulluku-llu, naucetaarviim-llu elatiinun eggluku.

⁹Tua-i naucetaarviim yua qaillun piciqa? Tekiciiquq nauceciiyurtet-llu taukut piunrirciqai, naucetaarvik-llu allanun tunluku.

¹⁰Makut-qaa igat naaqeksaitaci: ‘Teggalquq enelilriit qessakek'ngaat kangiram tusnganqerkaurtaa.

¹¹Atanermek tuaten pillruuq, irr'inaqluni-llu iimten̄un’?”

¹²Tegungnaqsaaqaat-llu, tau͡gaam yugugaat alikait, elpekngamegteggu mat'umek ayuqestassiigutmek qalarucia ellait piluteng; tua-i-llu unilluku ayagtut.

¹³Tua-i elliinun ayagcetait Pharisee-aat ilait, Herod-aam-llu yuin ilait, qaneryaraakun napcetengnaqesqelluku.

¹⁴Taukut-llu tekicamegteggu qanrutaat, “Elitnauristaa, nallunritarput piciucin, catkiyuunak-llu yugmek, yuum taungucia catkenrilavgu, tau͡gaam Agayutem tumyaraqesqellra piciuluten ayuqucirtuutekluku. Elluartuq-qaa Caesar-aaq akiliqurautnek cikirluku, wall'u elluanrituq?

¹⁵Cikiqengciqukut-qaa wall'u cikiqengengaitukut?” Tau͡gaam malrugnek umyuangqerruciatnek nallunrilami, qanrutai, “Ciin naspaacecia? Akicuar wangnun taiciu, tangerrnaurqa.”

¹⁶Tua-i taitaat. Qanrutai-llu, “Kia una ayuqii, kia-llu atranek igangqerta?” Kiugaat-llu, “Caesar-aam-wa.”

¹⁷Tua-i Jesus-aam qanrutai, “Caesar-aam pia Caesar-aamun tuniciu, Agayutem-llu pia Agayutmun tunluku.” Tua-i irr'iqapigtut.

¹⁸Tua-i Sadducee-aat ullagaat, maktellerkartailucianek qanlalriit, apqauraat-llu, qanerluteng,

¹⁹“Elitnauristaa, Moses-aam waten igarvikaakut, angutem anngaa tuqukan, nuliani-llu irniarunaku uniskaku, tua-i kinguqlian nuliqsagutarkauluku anelgutni kinguverkiurluku.

²⁰Malrunlegnek kinguqliqelriartangqellruuq. Ciuqliat-llu nulirturtuq, tuquluni-llu kinguverkaunani.

²¹Aipaan-llu tegullrua, tuquluni-llu kinguverkaunani; pingayuat-llu cali tuaten piluni.

²²Tuaten-llu taukut malrunelgen kinguvritut. Tamarmeng kinguatgun arnaq-llu tuqullruuq.

²³Tua-i makeskuneng kia taukut naliata nulirqeciqau? Wani-wa taukut malrunelgen nulirqellrukiit.”

²⁴Jesus-aam qanrutai, “Man'a-qaa pitekluku alartenrituci? Qaneryaraq nalluavciu Agayutem-llu pinia nalluluku.

²⁵Wani-wa tuqumalrianek makeskuneng, kassuusngaitut kassuucingaunateng-llu, tau͡gaam an'gilacetun qilagmelngurcetun ayuqarkaugut.

²⁶Tau͡gaam tuqumalriit maktarkaulriit piluki, naaqiksaituci-qaa Moses-aam igaini, napayaarmek ekualriamek, qanrutkellrini, qaillun Agayutem qanrutellruagu qanerluni, ‘Abraham-aam Agayutkaanga, Isaac-aam-llu Agayutkaanga, Jacob-aam-llu Agayutkaanga?’

²⁷Agayun tuqumalriit Agayutkenritaat, tau͡gaam unguvalriit Agayutkaat. Elpeci alarteqapigtuci.”

²⁸Kalikanek-llu elisngalriit iliita atunem apqauruyuciat niicamiu, nalluvkenaku-llu ellaitnek kiuluaqaricia, ullagaa apluku-llu, “Alerquutet tamarmeng naliat ciuqliuga?”

²⁹Jesus-aam kiugaa, “Ciuqliat waniwauguq man'a: ‘Niicugni, Israel-aani, Ataneq Agayutvut, Ataneq atauciuguq;

³⁰kenkarkaugan-llu Ataneq Agayuten ircaqurpegun tamalkirrluten, tarnerpegun-llu tamalkirrluten, umyuarpegun-llu tamalkirrluten, pinirtacirpegun-llu.’

³¹Aipaa-llu waniwauguq: ‘Ilan elpetun pitarrluku kenkarkaugan.’ Allamek alerquucetaituq makugni angenrulriamek.”

³²Kalikanek-llu elisngalriim qanrutaa, “Elitnauristaa, ilumun elluarrluten qanertuten, Agayun atauciungan allamek-llu taungunrilngurmek Agayucetailan.

³³Tauna-llu kenekluku ircaqumikun tamalkirrluni, usvingucimikun-llu tamalkirrluni, pinirtacimikun-llu tamalkirrluni, ilani-llu ellmitun kenekluku, tua-i wani-wa cikiutni ekuagarkani tuqutarkani-llu tamalkuitni angenrulria.”

³⁴Jesus-aam-llu elpekngamiu ellalegtarmek kiucia, qanrutaa, “Elpet Agayutem angayuqauvia yaaqsinritan.” Tua-i taum kinguani aptellerkaanek yuut caperqaat.

³⁵Jesus-aaq-llu Agayuvigmi elitnauriami, qanertuq, “Qaillun kalikanek elisngalriit qanlartat Christ-aq David-aamun qetunraqniluku?

³⁶David-aaq tungaunani, Anernerkun Tanqilriakun waten qanellruuq: ‘Ataneq Atanemnun qanertuq, Tallirpima tungiinun aqumi, ingluten it'gavet aciatnun ellinatkamnun.’

³⁷Tuaten David-aam tungaunani Atanerminek tuqluamiu, qaillun wani-wa qetunraqau?” Yugugaat-llu niicuumikaat.

³⁸Elicungcarillermini-llu qanertuq, “Mulngakici kalikanek elisngalrianun, taukut pekculartut akurtulrianek aturangqerrluteng, kipucartularvigni-llu nayangarvikesqumaluteng,

³⁹agayuvigni-llu aqumlleret kiaqliit aqumviksularait, nerevkarimi-llu kiaqliuyugaqluteng.

⁴⁰Arnat aipainret enaitnek uayaalarait, piicaumangualartut-llu; taukut anucimirqecetaarutmek angenrulriamek pimaarkaugut.”

⁴¹Jesus-aaq-llu akinek elliiviim akiani aqumgallruuq, yuut-llu tangvagluki elliilriit, amlleret-llu tukuulriit amllelrianek elliigut.

⁴²Arnaq-llu aipaineq arrsaulria taiguq, taum qupcuayagaak malruk elliak, taukuk akicuar nalkaak.

⁴³Tua-i elitnaurani taisqai qanrulluki-llu, “Ilumun, qanrutamci, una arnaq aipaineq arrsaulria elliilriani tamalkuitni elliinruuq.

⁴⁴Taukut tamarmeng elliingata cipnermeng ilaitnek, tau͡gaam uum nurutellriaruluni pini tamalkuan elliitekaa, yuutekaqsaaqellni tamalkirrluku.”