Read Yupik Mark 2 Bible Online

Mark 2 - Yupik bible

Mark 2

¹Erenret-llu qavcin kinguatni Capernaum-aamun itenqigcan niitaat enemelucia.

²Amllelriit-llu quyurtut ena piviirulluku, ikirtuqam elatiini tuaten piviinateng; qaneryaraq-llu taukunun qalarutkaa.

³Ilaita-llu ullagaat yugmek pektesciigalngurmek ullauciluteng; tauna cetamauluteng akigaraat.

⁴Tua-i-llu yugyagpakaan elliinun mallgutesciigalameng ena uitavia qilairaat; callarcamegteggu-llu inangqavik pektesciigalngurtuumaan aqevlertaat.

⁵Ukvertaciat-llu Jesus-aam tangrramiu, pektesciigalnguq qanrutaa, “Qetunraaq, assiilnguten au͡gaumaut.”

⁶Tau͡gaam kalikanek elisngalriit ilait tuani aqumgalriit ircaqumegteggun umyuartequt,

⁷“Ciin una yuk waten qallata? Agayutmek qacungakiuq! Kina Agayutngunrilnguq assiilngurnek au͡g'ariyunarqa?”

⁸Jesus-aam-llu anernermikun tamaa elpekngamiki umyuamegteggun tuaten umyuartequciat, qanrutai, “Ciin ircaqurpeciuggun tuaten umyuarteqseci?

⁹Naliak qacignarqenrua, waten pektesciigalngurmun qanerluni, ‘Assiilnguten au͡gaumaut,’ wall'u waten qanerluni, ‘Makluten, inartessuuten teguu piyualuten-llu’?

¹⁰Tau͡gaam nallunriisqelluku Yuum Qetunraan piningqerrucia nunam qaingani assiilngurnek au͡g'ariyugngacia,” (pektesciigalnguq cauluku pia),

¹¹“Qanrutamken, makluten inartessuuten teguu, nunavnun-llu ayagluten.”

¹²Tua-i maktuq, tamaa-llu inartessuutni tegua anluni-llu tamarmeng takuatni. Tamarmeng-llu alangaarutkaat; Agayun-llu nanraraat qanerluteng, “Waten pilriamek tangeqsaitukut!”

¹³Tua-i-llu ataam ayagtuq nanvarpiim mengliinun, tamarmeng-llu yugugaat ulliitni elicungcarai.

¹⁴Pektellermini-llu, tangrraa Levi Alphaeus-aam qetunraa, akiliqurautnek quyurcivigmi aqumgaluni, tauna qanrutaa, “Maligesnga.” Tua-i nangertuq maliggluku-llu.

¹⁵Wanikuani-llu, aqumluteng nernginanratni eniini, amlleret akiliqurautnek quyurcistet, assiilngiumalriit-llu, Jesus-aaq elitnaurai-llu aqumgallgutkait; amllerrluteng-llu maligcamegteggu.

¹⁶Kalikanek-llu elisngalriit Pharisee-aat-llu tangrramegteggu, akiliqurautnek quyurcistet assiilngiumalriit-llu nerellgutekluki, elitnaurainun qanertut, “Ciin akiliqurautnek quyurcistet assiilngiumalriit-llu nerellgutek'lartaki mellgutekluki-llu?”

¹⁷Jesus-aam-llu tamana niicamiu, qanrutai, “Canrilnguut yungcaristem̄ek pinarqenritut, tau͡gaam naulluulriit. Ellualriit kelegyartunritanka, tau͡gaam assiilngiumalriit.”

¹⁸John-aam-llu Pharisee-aat-llu elitnaurait yaalaameng nerenritengnaqluteng, tekilluteng qanrutaat, “Ciin John-aam Pharisee-aat-llu elitnaurait yaalartat nerenritengnaqluteng, tau͡gaam elpet elitnauraten yagyugpek'nateng?”

¹⁹Jesus-aaq-llu ellaitnun qanertuq, “Uikautem-qaa ilai yaayunarqut uikaun ilakluku? Uikaun ilakluku yaayunaitut.

²⁰Tau͡gaam erenret tekiciiqut, tua-i uikaun ellaitnek tegumaarkauguq; tuaten pikan yaagarkaugut.

²¹'Liqneq nutaraqapiar ilaarutkeksaitelaraat aturamun ak'allamun, ilaarutem nutaram ak'allaq allgunqigtarkaungaku, allganra arcaqanruvkarluku.

²²Wine-aq-llu nutaraq caqunun ak'allarnun imiuteksaitaat, wine-am nutaram caqutet ullirtarkaungaki, wine-aq-llu caanguaruluni, caqutet-llu caunrirluteng; tau͡gaam wine-aq nutaraq caqunun nutaranun imiutnarquq.”

²³Caqerluni Sabbath-aami naucetaat mukaarkat tumekngaki, elitnaurai ayainanermeggni kangritnek qecuutut.

²⁴Pharisee-aat elliinun qanertut, “Tangerrluku, ciin atam Sabbath-aami inerquutmek piat pisqutngunrilngurmek?”

²⁵Elliin-llu qanrutai, “Naaqiksaituci-qaa David-aam pillranek arenqiallugcami kaigluni, ilai-llu?

²⁶Qaillun Agayutem eniinun itellra Abiathar-aq agayulirten͞gunrullrani, kelipat-llu tangrresqutet nerluki, agayulirten̄un tau͡gaam neresqumalriit, ilani-llu cikirluki?”

²⁷Qanrutai-llu, “Sabbath-aaq piurcimauq yuk pitekluku, yuk piurcimanrituq Sabbath-aaq pitekluku.

²⁸Taumek Yuum Qetunraa Sabbath-aamun tuaten atanruuq.”