Read Yupik Mark 3 Bible Online

Mark 3 - Yupik bible

Mark 3

¹Cali-llu agayuvigmun itenqigtuq; yuk-llu tuantuq unatain ingluit nalamaluteng.

²Kellutekaat-llu Sabbath-aami yungcarinayukluku, waniwa picetaarutnaluku.

³Tua-i yugmun nalamalrianek unatelegmun qanertuq, “Nangerrluten taitai.”

⁴Qanrutai-llu, “Ca elluarta, Sabbath-aami assilriamek piluni, wall'u assiitellriamek piluni; unguvavkariluni wall'u tuquciluni?” Tau͡gaam nepaitut taukut.

⁵Cangayugtuq tua-i kiarcamiki ilutequtekluki-llu, ircaqurrit tegqapigcata, qanertuq-llu taumun yugmun, “Unateten yageski.” Taum-llu yagtai, unatai-llu elluariut.

⁶Pharisee-aat tua-i an'ut; tamaa-llu Herod-aam yui ilakluki qaillukuartut ellii pitekluku, qaillun piluteng tuqutengnaqnaluku.

⁷Tau͡gaam Jesus-aaq elitnauraminek ilaluni nanvamun ayagtuq; yugugaat-llu maligtaat Galilee-amek, Judea-mek-llu,

⁸Jerusalem-aamek-llu, Idumea-mek-llu, Jordan-aam-llu akilirneranek, cali-llu Tyre-am Sidon-aam-llu avatiigkeni nunalget yugugaat ullagaat, caliallri angelriit niicamegteki.

⁹Tua-i-llu elitnaurani qanrutai angyamek upingatesqelluni yuut pitekluki, qerrlerulluni piviirrnayukluni.

¹⁰Waniwa amllelriit yungcaaki, taumek nangtequtellget tamarmeng elliinun ullautengnaqluteng qerrlerutut agturnaluku.

¹¹Anerneret-llu carrluulriit tangrraqamegteggu ciuqerranun palurtelartut neplirluteng-llu qanerluteng, “Taunguuten Agayutem Qetunraa.”

¹²Tau͡gaam elliin inerquqapigtai nallunairesqevkenani.

¹³Tua-i ingrim qainganun mayurtuq, piyullni-llu ellminun taisqai, taukut-llu ullagaat.

¹⁴Tua-i-llu qulen malrugnek cipnelget cucukai ellmentesqelluki qalaruciyarturcetnaluki;

¹⁵piyunarqucingqerrarkauluteng-llu anernerrluut anevkayunarqerkauluki.

¹⁶Simon-aaq tauna aciraa Peter-aamek,

¹⁷James-aaq-llu Zebedee-am qetunraa, John-aaq-llu James-aam anelgutii, taukuk acirak Boanerges-aagnek, waten tamana ayuquq, kalluum yuugkenek;

¹⁸Andrew-llu, Philip-aaq-llu, Bartholomew-llu, Matthew-llu, Thomas-aaq-llu, James-aaq-llu Alphaeus-aam qetunraa, Thaddaeus-aaq-llu, Simon-aaq-llu Canaanite-armiu,

¹⁹Judas Iscariot-aaq-llu, imna tunestellra. Enemun-llu iterluteng.

²⁰Tua-i-llu ataam yuut quyurtut yugyagluteng, kelipamek tuaten neresciigacelluki.

²¹Ilain-llu niicamegteggu an'ut tegunaluku, yuut qanrata, “Usviirutuq!”

²²Kalikanek-llu elisngalriit Jerusalem-aamek atrallret qanertut, “Beelzebul-amek pingqertuq. Anernerrluut-llu anevkalarai anernerrluut atanratgun.”

²³Tua-i taisqelluki ayuqestassiigutetgun qalarutai, “Qaillun piluni tuunrangayiim tuunrangayak anevkayunarqau?

²⁴Angayuqauviim yui ilakutenriquneng piungaitut.

²⁵Enelgutkelriit-llu ilakutenriquneng uitangaitut.

²⁶Tuunrangayak-llu ellminek inglukekuni, ellminek-llu ilakenriquni, uitayunaiciiquq, tau͡gaam iquklilluni.

²⁷Yuk pinilriim eniinun iterciigatuq piutainek uayaarinaluku, tau͡gaam pinilria tauna qillerqaaquniu, nutaan enii uayaryugngaciqaa.

²⁸Ilumun, qanrutamci: Tamalkuita assiilnguitnek au͡g'arimaarkaugut yuut irniarit, qacungakillritnek tuaten tamalkuitnek,

²⁹tau͡gaam Anernermek Tanqilriamek qacungakilria au͡g'arimangaitqapigtuq watqapik, tau͡gaam pinarquq assiilngurmek nangyuilngurmek;”

³⁰qanellruata, “Caarrluulriamek anernelguuq.”

³¹Tua-i anelgutai aanii-llu tekitut, nangengqaluteng-llu keggani, ullagtelluku-llu taisqaat.

³²Yugugaat-llu aqumgaut kassugusngaluku, taukut-llu qanrutaat, “Atam aanavet anelgutvet-llu keggani yuaraatgen.”

³³Kiugai-llu, “Kina aanaksia, kinkut-llu anelguteksia?”

³⁴Avatmini-llu aqumgalriit kiarrluki qanertuq, “Tua-i wani-wa aanaka anelgutenka-llu.

³⁵Wani-wa Agayutem pisqutiin aturtii, tua-inguuq anelgutka, nayagaqa-llu, aanaka-llu.”