Read Yupik Mark 4 Bible Online

Mark 4 - Yupik bible

Mark 4

¹Cali-llu elicungcariuq nanvam cen̄iini; yugugaat-llu quyurrvikngatni angyamun tuani nanvami uitalriamun ekluni aqumuq, yuut-llu tamarmeng nunametut nanvam cen̄iini.

²Tua-i amllermek elicungcarai ayuqestassiigutetgun, elicungcarillermini-llu qanrutai,

³“Niicugnici! Atam nauceciiyurta nauceciiyarturtuq.

⁴Nauceciirinanrani-llu, ilait pekcaramun tut'ut, yaqulget-llu neryarturait nangluki.

⁵Ilait-llu teggalqulilriamun amllermek nunatailngurmun tut'ut, naugarrluteng-llu, mamtulriamek nunailameng.

⁶Akerta-llu pic'an uugut, acilqurrilameng-llu nalaut.

⁷Ilait-llu cukilanat akuliitnun tut'ut, cukilanat-llu naungameng cikvagutait, taumek nauginritut.

⁸Ilait-llu nunamun assilriamun tut'ut naugiluteng-llu naungiinalrianek, angliriinalrianek-llu; ilait naugiut yuinarmek qulnek ciptaqluki, ilait-llu yuinarnek pingayutaarluteng, ilait-llu yuinarnek tallimataarluteng.”

⁹Qanertuq-llu, “Ciutengqellria, niilli.”

¹⁰Tua-i-llu kiimellian, nayurtain taukut qulen malrugnek cipnelget ilakluki ayuqestassiigutnek apqauraat.

¹¹Qanrutai-llu, “Elpeci cikiumauci aassaqek'ngamek Agayutem angayuqauvian pianek, tau͡gaam makut ilakenrilkeput, tamaitnek ayuqestassiigutetgun pimalartut;

¹²tangvagluteng tangrrarkauyaaqngameng elitaqek'ngaunateng-llu, niilluteng-llu niitarkauyaaqngameng taringengaunateng-llu; taringekuneng umyualinqigcartut, assiilnguitnek-llu au͡g'arimaluteng.”

¹³Qanrutai-llu, “Man'a-qaa ayuqestassiigun taringenritarci? Qaillun-mi piluci tamalkuita ayuqestassiigutet taringeciqseciki?

¹⁴Nauceciiyurta qaneryaramek nauceciiguq.

¹⁵Waniwaugut-llu pekcaramun tut'ellriit, qaneryaraq nani nauceciumalria, niitaqatgu tamaa tuunrangayiim qaneryaraq ircaqruitnun nauceciumalria au͡g'aryartularaa.

¹⁶Tuaten-llu cali ayuqut teggalqulilriamun nauceciumalriit, taukut qaneryaraq niitaqamegteggu angnirluteng tamaa piksagutelaraat;

¹⁷tau͡gaam ilumegteggun acilqurrilameng, ak'aniyuitut, kinguani-llu qaneryaraq pitekluku nangcilriartangqerraqan tuqucingnaqelriartangqerraqan-llu, egmian cangayulartut.

¹⁸Taukut-llu cukilanat akuliitnun nauceciumalriit waniwaugut qaneryaramek niitellriit,

¹⁹tau͡gaam ellam mat'um pii umyuarrlugcarautekngamegteki, tukuucim-llu iqluateng, allat-llu ayarinarqelriit itrata, qaneryaraq cikvagutelaraat, naugivkenateng-llu.

²⁰Nunamun-llu assilriamun nauceciumalriit waniwaugut qaneryaramek niitellriit ciuniurluku-llu naugiluteng-llu, ilait yuinarnek qulnek ciptaqluki, ilait-llu yuinarnek pingayutaarluteng, ilait-llu yuinarnek tallimataarluteng.”

²¹Qanrutai-llu, “Kenurraq-qaa taitelaraat puckam acianun wall'u inglerem acianun ellinaluku, kenurrarvigmun pivkenaku?

²²Waniwa iirumalriartaituq, alairumangailngurmek, aassaqek'ngamek-llu nallunairumangailngurmek.

²³Kina imna ciutengqellria, niilli.”

²⁴Qanrutai-llu, “Niitelci murilkiciki. Elpeci cuqyutevcen̄ek cuqvikumaciquci ilakaniucimaarkauluci-llu.

²⁵Wani-wa pingqellria cikiumaciquq, tau͡gaam piilnguq teguimaarkauguq pianek tuaten.”

²⁶Tua-i-llu qanertuq, “Tuaten ayuquq Agayutem angayuqauvia, tuarpiaq yuum naucetaarkat nunamun egqaqaqaki,

²⁷qavaraqluni-llu maktaqluni-llu unugmi ernermi-llu; tua-i-llu naucetaarkat nauqata'artut angliriinarluteng-llu, qaillun piciatnek nalluuq.

²⁸Nuna ellminek naugilartuq, temait pirraarluki, kinguani kangrit, kinguani-llu mukaarkat kangrit iluitni taqmigtellret.

²⁹Tau͡gaam naugillrit piurtaqata tamaa evegtarcuutelget ayagcet'larai quyurciyaraq tekican.”

³⁰Tua-llu qanertuq, “Qaillun piluta Agayutem angayuqauvia ayuqestassiigutarkauceta? Wall'u qaillun ayuqelriamek ayuqestassiigutmek ayuqestassiigutarkauceta?

³¹Tuarpiaq mustard-aam naucetaarkaa, nunamun elliluku nauceciumaaqami, mikellruyaaquq naucetaarkani nunamelngurni tamalkuitni.

³²Tau͡gken nauceciumaaqami angliriinalartuq, angenrurrluni-llu naucetaallgutmini tamalkuitni, avayangluni-llu angelrianek, yaqulget tuaten pagaanelnguut ungluliyugngaluteng talinrani.”

³³Ayuqestassiigutet-llu waten ayuqelriit amlleret aturluki qaneryaramek qalarutai, niicunarquciicetun.

³⁴Ayuqestassiigutet-llu aturpek'naki qalarutenritai, tau͡gaam nallaitgun elitnauraminun ca tamalkuan taringnarilaraa.

³⁵Tua-llu ernermi taumi atakuani qanrutai, “Agaavet qeralta.”

³⁶Yugugaat-llu unilluki angyakun ayautaat ayuquciatun; allat-llu angyat ilakluki.

³⁷Tua-llu cayukartuq, angyaq-llu ekuraluku imangelirluku.

³⁸Ellii-llu angyam kinguani qavartuq akitem qaingani. Tua-i tupagtaat qanrulluku-llu, “Ayuqucirturtaa, catkenritan-qaa akacakataucirput?”

³⁹Tua-i maktuq anuqa-llu inerquraa, qanerluni-llu imarpigmun, “Nepaunak! Ellerrartenrilu!” Tua-i anuqairtuq, quuniqapiggluni-llu.

⁴⁰Qanrutai-llu, “Ciin tuaten nangyaryugceci? Ukvengeksaituci-qaa cali?”

⁴¹Alingeqapiggluteng-llu qanruyutut, “Kina una, anuqem mer'em-llu niisngaan'gu?”