Read Yupik Mark 5 Bible Online

Mark 5 - Yupik bible

Mark 5

¹Tua-i nanvarpiim akilirneranun tekitut Gadarenes-aarmiut nuniitnun.

²Angyamek-llu yuungan, tamaa qungunek yuum nall'artaa carrluulriamek anernelgem,

³tauna qunguni uitavingqertuq, qillertellerkaa-llu caperqaat, kalivnerungraata-llu.

⁴Pulengtaq-llu qillertelangraatni kelucalegnek kalivnernek-llu, kalivneret kevkartelarai, kelucalget-llu navguraqluki, cirlakumasciiganani-llu.

⁵Kesianek ernermi unugmi-llu qungunet'lartuq ingrini-llu, neplirluni-llu teggalqunun ellminek kilirturaqluni.

⁶Jesus-aaq-llu yaaqvanek tangrramiu aqvaqurluni ullagaa, palurrluni-llu ciuqerranun,

⁷qastuluni-llu qayagpagtuq qanerluni, “Caciqekemken, elpet Jesus-aaq Agayutem Quyinrulriim Qetunraani? Ilunglua qanrutamken Agayutem takuani nangtesqevkenii.”

⁸Qanrucani waten, “Elpet, anerneq caarrluulria, uumek yugmek ani!”

⁹Aptaa-llu, “Qaillun atengqercit?” Kiugaa-llu, “Legion-aamek atengqertua, amllerramta.”

¹⁰Kaigavikeqapigtaa-llu, tamatum avatiinek ayagcecesqevkenateng.

¹¹Tau͡gaam tuani ingrim qaingani sitiinkarugaat uitaut nerluteng.

¹²Tua-i taukut anernerrluut kaigavikaat qanerluteng, “Taukunun sitiinkaanun ayagceskut, taukunun iterniartukut.”

¹³Jesus-aam-llu pisqai. Tua-i-llu anerneret caarrluulriit an'ut, sitiinkaanun-llu iterluteng, sitiinkarugaat-llu tiissitsaak malruk nuniigni, atrartut ekvigkun nanvarpagmun-llu qecuqilluteng.

¹⁴Sitiinkaat-llu tarikestait qimagtut, tamana-llu qanrutekluku nunarpagni avatiini-llu. Taukut-llu yuut tekitut tamana tuaten pilleq tangerrsarturluku.

¹⁵Jesus-aamun-llu tekicameng, anernerrlulgulleq tauna Legion-aamek pingqelleq, tangrraat aqumgaluni aturangqerrluni, ellangqerrluni-llu; tua-i alingut.

¹⁶Tamatumek-llu tangvallret qanemcitait taukut anernerrlulgullermek qaillun ellillrucianek, sitiinkaanek-llu.

¹⁷Tua-i taukut alerquagaat Jesus-aaq avatmeggnek ayaasqelluku.

¹⁸Angyamun-llu ekngan anernerrlulgullrem taum kaigavikaa nayurnaluku.

¹⁹Tau͡gaam elliin pisqenritaa, tau͡gaam waten qanrutaa, “Ayii enevnun ilavnun-llu, apervikualuki-llu qaillun amllertalriamek Atanermun pillrucirpenek takumcukucirpenek-llu.”

²⁰Tua-i ayagtuq Decapolis-aamun qalarutekluku qaillun amllertalriamek Jesus-aamun pillrucini; tamarmeng-llu irr'ikaat.

²¹Jesus-aaq-llu angyakun ataam akianun arvian, yugugaat elliinun quyurtut; ellii-llu nanvarpiim cen̄iintuq.

²²Tuani-llu agayuviim atanrin iliita Jairus-aamek atelgem ullagaa, tangrramiu-llu it'gain ciuqerratnun palurtuq,

²³kaigavikqapiggluku-llu qanerluni, “Wiinga panika tuquqatartuq, unatevnek pategyarturru anirtuumanaurtuq, unguvaluni-llu.”

²⁴Elliin-llu maligtaa, yugugaat-llu kingunrirturaat, qerrlerulluku.

²⁵Arnaq-llu tuantuq allrakut qulen malrugnek cipluki aunralria,

²⁶nangteqeqapiggluni-llu yungcaristetgun amllelriatgun ikayuumang'e'rmi, pini-llu tamalkuita nangellruluki, elluarivkenani-llu tau͡gaam assiirusngiinarluni.

²⁷Jesus-aamek niicami, yuut akuliitgun aturai agturyarturai tunuakun,

²⁸Qanellruami waten, “Aturai tau͡gaam agtuqumki assiriciqua.”

²⁹Aunrallra-llu egmian taq'uq; tememikun-llu elpekaa nangtequtellerminek assiricini.

³⁰Jesus-aam-llu elpekaa piniq ellminek anucianek, yuut-llu akuliitni tunutmun cauluni qanertuq, “Kia aturanka agturtaki?”

³¹Elitnaurai-llu elliinun qanertut, “Elpet tangrraten yuut elpenun qerrlerucilriit, tau͡gken qanerluten, ‘Kia agturtanga?’”

³²Tua-i kiartuq tuaten pilleq tangerrnaluku.

³³Tau͡gaam tauna arnaq civuurauq uuleggluni-llu qaillun pillruciminek nallunrilami, ciuqerranun-llu palurcarturluni iqluvkenani-llu tamaitnek apervikuagaa.

³⁴Elliin-llu qanrutaa, “Paniik, ukverpet anirturaaten, uitanqegciluten ayii, nangtequtellerpenek-llu canria.”

³⁵Cali qallasnginanrani, agayuviim atanran enelgutain ilait tekitut qanerluteng, “Elpet paniin tuquuq, ciin Ayuqucirturta cali uamceciu?”

³⁶Tau͡gaam Jesus-aam qanellrat niicamiu, agayuviim atanra qanrutaa, “Civuuravkenak, ukvera tau͡gaam.”

³⁷Allat-llu ellminun maligutesqenritai, tau͡gaam Peter, James-aaq-llu, John-aaq-llu James-aam anelgutii.

³⁸Agayuviim-llu atanran eniinun tekicameng, neplilriit tangrrai, qialriit qalervalriit-llu.

³⁹Tua-i itertuq qanrulluki-llu, “Ciin neplirceci qialuci-llu? Mikelnguq tuqunrituq, qavartuq tau͡gaam.”

⁴⁰Taukut-llu engelarautekaat. Tau͡gaam tamalkuita anevkarraarluki, mikelnguum atii aanii-llu nayurten̄i-llu ilakluki, itertuq mikelnguum uitallranun.

⁴¹Tua-i-llu mikelnguq tegua unataikun qanrulluku-llu, “Talitha cumi,” mumiggluku waten ayuquq: “Neviarcar, qanrutamken makten.”

⁴²Neviarcar-llu egmian maktuq piyualuni-llu, qulen malrugnek cipluku allrakungami. Taukut-llu cakneq alangaaqapigtut.

⁴³Elliin-llu cakneq inerqurai tamana kitumun apertuusqevkenaku, qanerluni-llu nerevkaasqelluku.