Read Yupik Mark 7 Bible Online

Mark 7 - Yupik bible

Mark 7

¹Pharisee-aat kalikanek-llu elisngalriit ilaita, Jerusalem-aamek tekitellriit quyurrvikaat Jesus-aaq.

²Elitnaurain-llu ilait tangrrait nerelriit unateteng tuatesqinarluki, eruumavkenaki.

³(Wani-wa Pharisee-aat Jews-aat-llu tamarmeng nereksaitelaameng unateteng tau͡gaam erunqegcaararraarluki, wani-wa ciulirneret picirkangutait ciumurutengnaqluki.

⁴Kipucartularvignek-llu tekitaqameng nereksaitelartut, erurraarluteng tau͡gaam, allat-llu piciryaranguteteng ciumurutarkauluki; mer'utet erurarkauluki, egatet-llu, qantat-llu qatellriit.)

⁵Tua-i Pharisee-aat kalikanek-llu elisngalriit aptaat, “Ciin elitnauraten maligtaquteksaitelartat ciulirneret picirkangutaitnek?” Tau͡gaam kelipamek ner'aqluteng unateteng eruumavkenaki?

⁶Qanrutai-llu, “Elluarrluni Isaiah-m tangrruarluci qanrutkaaci, elpeci malrugnek umyualegni, igausngalriatun: ‘Ukut yuut takaqelaraatnga qerrlumegteggun, tau͡gaam ircaqruita yaaqsigaatnga.

⁷Elliinginaq-llu agayulartut wangnun, elitnaurutekluki yuut alerquutekellrit ayuqucirtuutekngamegteki.’

⁸Agayutem alerquutii cakaararci, yugnek-llu picirkangutet ciumurulluki.”

⁹Qanrutai-llu, “Elluatun Agayutem alerquutii atunrircetarci, picirkanguteci maligtaqunaluki.

¹⁰Moses-aaq qanellruan, ‘Aatan aanan-llu takaqikek,’ waten-llu, ‘Ataminun aanaminun-llu qanerrlulria tuquciquq.’

¹¹Tau͡gaam elpeci qanlartuci, ‘Yuk ataminun wall'u aanaminun waten qanqan, Wangnek pikaqsallren Corban-auguq’ (tua-i wani-wa cikiutnguuq Agayutmun),

¹²tua-i kinguani atiinek wall'u aaniinek kusguagisqenritarci.

¹³Tuaten-llu Agayutem qaneryaraa calligtarci picirkangutevciuggun, piciryarangutevciuggun-llu. Waten-llu ayuqelriit amlleret piciryaraqaci.”

¹⁴Tua-i yugugaat ataam taisqai qanrulluki-llu, “Tamarpeci niicugnicia, taringengnaqluci-llu.

¹⁵Yuum avatiinelnguut qaillun ayuqeng'e'rmeng yuk caarrluurceteksaitaat elliinun itraqameng, tau͡gaam elliinek anelriit tua-inguut yugmek caarrluurcilriit.

¹⁶[Ciutengqellria niilli.”]

¹⁷Tua-i yuut unilluki enemun itran, elitnaurain apqauraat mat'umek ayuqestassiigutmek.

¹⁸Kiugai-llu, “Cuna-wa elpeci-llu ayuquciituci. Elpekenritaci-qaa avatiinek yugmun itellriit qaillun ayuqeng'e'rmeng elliinek caarrluurciyuiluciat?

¹⁹Ircaqruanun pivkenateng, aqsaqruanun pilaata, camaggun-llu an'aqluteng nerkengat tamarmeng carrirviatgun.”

²⁰Qanerluni-llu, “Yugmek anelriit yuk caarrluurtelaraat.

²¹Kiaken yuut ircaqruitnek anlaata umyuarrluut, acunianeq, tegleneq, tuqucineq, akusrarutekineq,

²²piksugiineq, piciryararrluut, iqluneq, kasngunarqelrialineq, nalluyurnaqneq, picalqukneq, umyugaitneq-llu.

²³Makut assiilnguut tamarmeng kiaken anlartut, yuk-llu caarrluurtelaraat.”

²⁴Tua-i nangerrluni tuaken ayagtuq Tyre-am Sidon-am-llu tungiignun. Enemun-llu itertuq yugnun nallusqumayaaqluni, tau͡gaam iirumasciigatuq.

²⁵Tau͡gaam tamaa arnam niitaa, taum panigaraurlua anernermek carrluulriamek pilek; tauna tekituq palurrluni-llu it'gain ciuqerratnun.

²⁶Tauna arnaq Greek-aaruuq, Phoenicia-mi Syria-m iliini yuurtelleq. Nanikuavikaa-llu anernerrluk paniminek anevkaasqelluku.

²⁷Jesus-aam-llu qanrutaa, “Irniarulriit camirterraarlit, elluanrilan mikelnguut neqiitnek teguiluki qimugten̄un-llu eggluki.”

²⁸Tau͡gaam kiugaa, “Aa-ang, Ataneq. Tau͡gaam qimugtet-llu estuulum aciani mikelnguut kaimlleritnek nerlartut.”

²⁹Qanrutaa-llu, “Man'a qanellren pitekluku ayii; anernerrluk panigpenek anellruuq.”

³⁰Eneminun-llu utercami, tekitaa mikelnguq inglerni inangqaluni, anernerrluk-llu anellrulliniluni.

³¹Tyre-am avatiinek ataam ayiimi Sidon tumekluku tekituq Galilee-am nanvaanun Decapolis-aaq qukarturluku.

³²Tua-i niicuilnguq qaneneq-llu elluarrluku caperqekii elliinun ullautaat, nanikuavikluku-llu unatainek agtuusqelluku.

³³Tua-i yugnek allakarluku, yuaragni ciutegkenun elliak, qecirluni-llu alungutii agturaa.

³⁴Qilagmun-llu ciuggluni, aneryaarluni-llu qanrutaa, “Ephphatha,” tamana waten ayuquq, “Ikirtek.”

³⁵Tua-i ciutek egmian ikirtuk, alungutii-llu qelutairluni, elluarrluni-llu qallatuq.

³⁶Inerqurai-llu tamana kitumun qanrutkesqevkenaku, tau͡gaam inerquqapigtengraateng pikanirluku qanrutkaat.

³⁷Tua-i alangaaqapigtut qanerluteng-llu, “Tamalkuita elluarrluki pii; niicuilnguut-llu niicaurcetai, qanyuilnguut-llu qaneryaurcetai.”