Read Yupik Mark 8 Bible Online

Mark 8 - Yupik bible

Mark 8

¹Ernerni taukuni, yugugaat ataam quyurcata, neqkaunateng-llu, Jesus-aam elitnaurani taisqai qanrulluki-llu,

²“Ukut yugugaat takumcukanka, ernerni pingayuni wangnelata neqkaunateng-llu.

³Nerevkarpek'naki kingunratnun ayagteskumki, ayallermeggni pinialiciqut; ilait-llu yaaqvanek tekicata.”

⁴Elitnaurain-llu kiugaat, “Naken-mi yuk kelipangciqa ukut camirutkaatnek maani yuilqumi?”

⁵Aptai-llu, “Qavcinek kelipautengqerceci?” Kiugaat, “Malrunlegnek.”

⁶Tua-i yuut nunamun aqumesqai; taukut-llu kelipat malrunlegen teguluki quyaluni-llu itumtai, elitnauraminun-llu tunluki aruqutkesqelluki; taukut-llu yugnun aruqutkait.

⁷Qavcirrarnek-llu neqkuinrangqerrata, quyatekraarluki taukut-llu aruqutkait.

⁸Ner'ut-llu camirrluteng, kaimllerit-llu ilakuarit quyurtait kalngat malrunlegen imirluki.

⁹Taukut-llu tiissitsaat cetaman engelkartait. Tua-i-llu ayagcetai.

¹⁰Tamaa-llu angyamun ek'uq elitnaurani ilakluki Dalmanutha-rmiut-llu avatiitnun ayagluni.

¹¹Pharisee-aat-llu ullagaat apqaurluku-llu, nallunailkutmek qilagmek nasvitesqelluteng, naspaaluku.

¹²Ellii-llu iluteqluni aneryaarluni, qanertuq, “Ciin ukut tungelquqelriit nallunailkutmek pingengnaqvakartat? Ilumun, qanrutamci, ukut tungelquqelriit nallunailkutmek cikiumangaitut.”

¹³Tua-i-llu unilluki, ataam angyamun ek'uq, akianun-llu qerrarluni.

¹⁴Kelipalgirarkateng nalluyagutait, ataucimek tau͡gaam angyamelngurmek.

¹⁵Inerqurai-llu, “Tarikici, mulngakluci Pharisee-aat quulciiraatnek, Herod-aam-llu quulciiraanek.”

¹⁶Tua-i ellait qanruyutut, “Wangkuta kelipautaitukut.”

¹⁷Jesus-aam-llu elpekngamiki qanrutai, “Ciin qanruyuceci kelipautailucirpecen̄ek? Cali-qaa elpengeksaituci, ayuquciinaci-llu? Ircaqurci-qaa tegg'ivkararci?

¹⁸Iingqerrluci, tangenrrituci-qaa? Ciutengqerrluci, niitenrituci-qaa? Neq'akinrituci-llu-qaa

¹⁹imkut kelipat talliman itumcamki tiissitsaanun tallimanun, kaimllerit-llu quyurtellerpecen̄i kalngat qavcin imirceciki?” Kiugaat, “Qulen malrugnek cipluki.”

²⁰“Imkut-llu malrunelgen itumcamki tiissitsaanun cetamanun, kaimllerit-llu quyurtellerpecen̄i kalngat qavcin imirceciki?” Kiugaat-llu, “Malrunelgen.”

²¹Tua-i qanrutai, “Cali-qaa taringeksaituci?”

²²Bethsaida-mun tekitut. Cikmiumalria-llu elliinun ullautaat, kaigavikluku-llu agtuusqelluku.

²³Tua-i cikmiumalria tauna tegua tass'uqluku enet yaatiitnun ayautaa, iik-llu qecirak unatminek-llu pategluku aptaa, “Camek-qaa tangertuten?”

²⁴Tua-i uilluni qanertuq, “Yuut tangrranka tuarpiaq napat pektellriit.”

²⁵Tua-i-llu ataam iik unatminek patgak; tangellra-llu pektayiinani elluariuq, takvigiuq-llu.

²⁶Tua-i eniinun utercetaa, qanerluni, “Nunanun iteryaqunak.”

²⁷Tua-i Jesus-aaq ayagtuq elitnaurani ilakluki nunainun Caesarea Philippi-m. Ayainanermeggni-llu elitnaurani aptai qanerluni ellaitnun, “Yuut kituuniatnga?”

²⁸Kiugaat-llu, “John-aaruniatgen Angllurcista, ilaita-llu Elijah-uniluten, ilaita-llu prophet-aanun ilakniluten.”

²⁹Aptai-llu, “Tau͡gaam elpeci kituuyuksecia?” Tua-i Peter-aam kiugaa, “Elpet Christ-auguten.”

³⁰Inerqurai-llu kitumun qanrutkesqevkenani.

³¹Tua-i nalqigutai Yuum Qetunraa amllelriatgun nangteqerkaucianek, qessakumaarkaucianek-llu ciulirnernek agayulirten͞gunernek-llu, kalikanek-llu elisngalrianek, tuqucimaarkaucianek-llu, erenret-llu pingayureskata maktarkaucianek.

³²Tamana-llu aassaqevkenaku qallautekaa. Peter-aam tua-i tegua inerqurluku-llu.

³³Tau͡gaam kingyarluni elitnaurani tangrrai, Peter-llu inerquraa qanerluni, “Tunumnun kinguvaa, Satan-aaq! Agayutem pii pinrilavki, tau͡gaam yuut piit umyuaqngavki.”

³⁴Tua-i yugugaat taisqai elitnaurani-llu, qanrutai-llu, “Wangnun maliguculria ellminek arcaqakenrilli, kelistani-llu qugluku maligglia.

³⁵Tua-i kia imum unguvani ellminek anirtuquniu tamarciqaa, tau͡gaam wii piteklua qaneryaraq-llu assilria pitekluku unguvaminek tamarilriim, unguvani anirturciqaa.

³⁶Wani-wa camun ikayuutnguciqa yugmun, nunam pii tamalkuita piksaguskuniki, unguvani-llu cagmarluku?

³⁷Wall'u-qaa ca yuum tunciqau unguvami navrutkaanun?

³⁸Wani-wa wangnek qaneryaramnek-llu talluryuutekilria, ukuni akusrarutekilriani assiilngurtulriani-llu, tauna Yuum Qetunraan-llu cali talluryuutekciqaa tekiskuni Atami ucurnarqucia aturluku an'gilat ellualriit ilakluki.”