Read Yupik Mark 9 Bible Online

Mark 9 - Yupik bible

Mark 9

¹Qanrutai-llu, “Ilumun, qanrutamci, ukut maanelnguut ilaita tuqu elpekngaitaat Agayutem angayuqauvianek tangerpailegmeng, pinilegpauluni tekitellriamek.”

²Erenret-llu arvinelgen pelluumariata Peter, James-aaq, John-aaq-llu, Jesus-aam malikai, nallaitgun-llu mayuulluki ingrimun qertulriamun. Tangellra-llu allayuurtuq takuatni.

³Aturai-llu qitngirnarqelriarurtut, qatqapiggluteng, qatercaristet nunamiungulriit tuaten qatertarivkarciigalkiitnek.

⁴Tuani-llu Elijah ellaitnun tangercetuq Moses-aamek aipirluni, taukuk-llu Jesus-aaq qallatellgutkaak.

⁵Tua-i Peter Jesus-aamun qanertuq, “Ayuqucirturtaa, maancuuminaqvaa, pingayunek enelilta, elpenun, Moses-aamun Elijah-mun-llu.”

⁶Waniwa qanrucirkani nallua, alingqapigcameng.

⁷Amirluq-llu alairtuq naligluki-llu, erina-llu amirlumek niicetuq waten, “Wani-wa Qetunraqa kenkek'ngaqa, niisngaciu.”

⁸Alqunaq-llu kiarcaaqut takuyartaarluteng, allamek tangerkengairutut, Jesus-aamek kiingan.

⁹Ingrimek-llu atraameng inerqurai tangellrat kitumun qanrutkesqevkenaku, Yuum Qetunraa tuqumalrianek makpailgan.

¹⁰Tamana-llu qanellra ellmentaurcetaat, apqaurulluteng-llu mat'um tuqumalrianek maktellerkam caucianek.

¹¹Tua-i aptaat, “Ciin kalikanek elisngalriit qanlartat Elijah ciumek tekitarkauniluku?”

¹²Qanrutai-llu, “Elijah ciumek tekitarkaullruuq tamalkuita-llu elluaqcararkauluki. Qaillun-llu igausngaa Yuum Qetunraa pitekluku nangteqeqapigtarkaulria caunrilkumaarkauluni-llu?

¹³Tau͡gaam qanrutamci, Elijah ak'a tekitellruuq, piyullermeggnek-llu pillruat, igausngaciatun.”

¹⁴Elitnaurat-llu tekicamegteki, yugugaat tangrrait avatiitni, kalikanek-llu elisngalriit apqaulriit.

¹⁵Tamarmeng-llu yugugaat tangrramegteggu alangaaqapigtut, aqvaqurluteng-llu ciuniuryarturluku.

¹⁶Tua-i aptai, “Camek apqaurceciki?”

¹⁷Tua-i-llu yuut iliita kiugaa, “Elitnauristaa, wiinga qetunraqa elpenun taicaaqaqa anernerrlulek qanerciiganani-llu.

¹⁸Taum-llu kaugaqamiu callularaa qistelluku kegglarciaqluni-llu keggutminek, cagniqerrluni tuaten, kemgiusngiinarluni-llu; elitnauraten-llu ellimerrsaaqanka anevkaasqelluku, tau͡gaam caperqaat.”

¹⁹Tua-i kiugai, “Arenqiapaa tungelquqelriani ukvenrilngurni, qaillun pitalriamek elpecen̄i uitaciqsia? Qaillun pitalriamek ilalcirciqsia elpecen̄un?”

²⁰Tua-i elliinun ullautaat, anernerrluum-llu tangrramiu egmian tan'gaurluq yagiravkaraa, nunamun-llu ayaluqertuq, akaguarluni-llu kapniurtequq.

²¹Atii tua-i aptaa, “Qangvarnek waten pilarta?” Kiugaa-llu, “Mikelnguullerminek.

²²Pulengtaq-llu egtelaraa kenermun mermun-llu, tuqutengnaqluku; tau͡gaam elpet piyunarqekuvet takumcukluta ikayurkut.”

²³Jesus-aam-llu qanrutaa, “Ukveryugngakuvet! Cat tamarmeng piyugngaut ukvelriamun.”

²⁴Tamaa-llu mikelnguum taum atii qayagpagtuq qanerluni, “Ukvertua, Ataneq, ukverkiluciqa ikayurru!”

²⁵Jesus-aam-llu yugugaat aqvaqurluteng quyurtellriit tangrramiki, anerneq caarrluulria nunuraa, qanrulluku, “Elpet qanerciigalngurmi niicuilngurmi-llu anerneq, ellimerturamken, uumek ani, kinguani-llu itenqigtevkenaku.”

²⁶Tua-i neplirluni cakneq-llu yagiravkarraarluku an'uq. Tua-i tan'gaurluq tuqumalriatun ellirtuq, amllelriit-llu qanertut, “Tuquuq!”

²⁷Tau͡gaam Jesus-aam unataikun tegua, makluku-llu.

²⁸Enemun-llu itran, elitnaurain allamek ilaunateng aptaat, “Ca pitekluku wangkuta anevkarisciigaceta?”

²⁹Qanrutai-llu, “Makucit catgun antesciigatqapigtut piicagkun tau͡gaam.”

³⁰Tuaken-llu ayiimeng Galilee-a tumkaat; mat'umek-llu yuut elpengevkaryunritai.

³¹Elitnaurani-llu elicungcarai qanrulluki-llu, “Yuum Qetunraa yuut unataitnun tunumaarkauguq, taukut-llu tuquciiqaat; tuqucimakuni-llu erenret pingayuatni makciiquq.”

³²Tau͡gaam man'a qaneryaraq taringenritaat, aptellerkaa-llu civuurakaat.

³³Tua-i-llu Capernaum-aamun tekitut, enemetlermini-llu aptai, “Ca qanrutekseciu ayallerpecen̄i?”

³⁴Tau͡gaam taukut nepaitut, ayallermeggni qanruyucameng nalirteng angenrucianek.

³⁵Tua-i aqumuq, taukut-llu qulen malrugnek cipnelget taisqai qanrulluki-llu, “Ciuqliuyulriartangqerquni, tauna tamalkuitnek kinguqliugarkauguq, tamalkuitnun-llu pisten͞guarkauluni.”

³⁶Mikelnguq-llu tegua, taukunun-llu akunleqliulluku, talliminek-llu amatairluku, qanrutai,

³⁷“Waten ayuqelriit iliitnek ciuniurilriartangqerquni wii piteklua taum wiinga ciuniuraanga, wangnek-llu ciuniurilriim, wang'unrilnguq cali ayagtesteka ciuniuraa.”

³⁸John-aaq qanertuq elliinun, “Elitnauristaa, yuk tangellruarput anernerrlugnek aterpegun anevkarilria; wangkuta-llu inerqurarput, maligtenrilakut.”

³⁹Tau͡gaam Jesus-aaq qanertuq, “Inerqunriciu, atemkun caperrnarqellrianek pilriartangqerrngailan kinguakun-llu wiinga qanerrluuteklua.

⁴⁰Wani-wa inglukestekenrilkevvut ilakarput.

⁴¹Kia-llu mermek mer'utem imaanek merr'iskaci, Christ-amun ilakucirci pitekluku, ilumun qanrutamci, akiliumanrilngaituq.

⁴²“Kina-llu imna picurlagcecikan ukut mikelnguut ukverumalriit iliitnek, atawaunruyartuq tauna miilissuutem teggarviinek uyaqurruikun agarrvikekuni eggluku-llu imarpigmun.

⁴³Unatvet-llu picurlagceskatgen, kepiki, atawaunruciquq ilangaringaluten unguvanarqelriamun itquvet, inglugtun unaterluten nangcivigmun kenermun nipsuilngurmun ayallerkami.

⁴⁴[Tuani paraluit tuqungaitut, kenrat-llu nipngaunani.]

⁴⁵Wall'u it'gavet picurlagceskatgen, kepiki, atawaunruciquq tussilluten unguvanarqelriamun itquvet, inglugtun it'garluten nangcivigmun egcimallerkami.

⁴⁶[Tuani paraluit tuqungaitut, kenrat-llu nipngaunani.]

⁴⁷Wall'u iivet picurlagceskaten, ikugluku egesgu, atawaunruciquq inglupiarluten Agayutem angayuqauvianun itquvet, inglugtun iiluten nangcivigmun egcimallerkami.

⁴⁸[Tuani paraluit tuqungaitut, kenrat-llu nipngaunani.]

⁴⁹Wani-wa tamarmeng kenermek taryiumaarkaugut.

⁵⁰Taryu assirtuq, tau͡gaam taryu taryurninairuskan, camek kemnarcarciqseciu? Elpecen̄i taryungqerci, uitanqegcillgutekluci-llu.”