Read Yupik Luke 1 Bible Online

Luke 1 - Yupik bible

Luke 1

¹Amlleret yuut wangkutni pillernek igallrung'e'rmeng,

²wangkutnun tunumallruciicetun, iimegteggun tangvallruameng qalarutkellruamegteggu-llu;

³wani-wa atawaunayukngamku, yuvrinqegcaararraarluki ciuqliatnek ayagluki tungliquciicetun igaqataramken Theophilus-aaq, qigcikekmaa,

⁴elicungcaumallerpet piciuciatnek nallunritesqelluten.

⁵Herod-aaq atanrullrani, agayulircetangqellruuq Zacharias-aamek, Abijah-m kinguvranek, nuliangqerrluni Aaron-aam kinguvranek, Elizabeth-aamek.

⁶Tamarmek-llu Agayutem takuani piciulutek, Atanrem alerquutai picirkiutai-llu maligtaqurrlainarluki.

⁷Tau͡gaam irniarunatek, Elizabeth-aaq qingayuilan, maa-i-llu ayagyuanrirlutek.

⁸Taum nalliini agayulirtem caliaranek pillrani Agayutem takuani pillerkiurami,

⁹agayulirtet pilauciicetun, Atanrem Agayuvianun itertuq agayuvigmi atutukiitnek aruviryarturluni.

¹⁰Yugugaat-llu elaqliantut piicagluteng aruviryartullrani.

¹¹Tuani-llu Atanrem an'gilaa alairtuq elliinun aruvirviim tallirpilirnerani nangengqaluni.

¹²Zacharias-aam-llu tangrramiu tatamuq, alingluni-llu.

¹³Tau͡gaam an'gilam qanrutaa, “Zacharias, alingevkenak, nulian Elizabeth qetunrangciquq pikarpenek, acirarkaugan-llu John-aamek.

¹⁴Angnirciquten-llu nunaniryugluten, amlleret-llu quyaciqut yuureskan.

¹⁵Atanrem takuani angciquq, wine-amek taangamek-llu merngaituq, Anernermek Tanqilriamek imiumaciquq yuurtellerminek ayagluni.

¹⁶Israel-aam-llu yui amlleret Atanermun Agayutiitnun tuigciiqai.

¹⁷Takuani-llu yuuciquq yuucingqerrluni piningqerrluni-llu Elijah-tun, ataita umyugait tuiggluki irniaritnun cumigtellerkaatnun, niicunrilnguut ellualrianun umyuallgutekliulluki, upciiqai-llu yuut, Ataneq upyulluku.”

¹⁸Zacharias-aam-llu an'gilaq qanrutaa, “Qaillun man'a nallunriciiqsia? Tang, wiinga angukara'urluurtellrianga, nulirqa-llu ayagyuanrirluni.”

¹⁹An'gilam-llu kiugaa, “Gabriel-aaruunga, Agayutem takuani nangengqalartua; wani-wa ayagcecimaunga qanrutesqelluten, tailluten-llu angniutekarpenek.

²⁰Tangerrluku-llu, elpet qanernanrirciquten qallatesciiganak-llu mat'um piciurtellerkaan engeliinun, tua-i ukveqenrilavki qanellrenka piciurtellerkalget.”

²¹Yuut-llu Zacharias-aaq utaqaat, paqnayugluteng iluqlirmi muluan.

²²Anngami-llu, qalarutesciigatai, ellaita-llu elpekaat camek tangellrucia tuani iluqlirmi, elliin-llu elucirararai qallatesciiganani-llu.

²³Caliani-llu pillerkiurani pelluata eneminun ayagtuq.

²⁴Makut erenret kinguatni nulirra Elizabeth qingartuq, iraluni-llu tallimani tangrruuksaunani, qanerluni,

²⁵“Waten Atanrem ikayuraanga kiaresngialutek'lalqa pellugtelluku.”

²⁶Iralut-llu arvinelgatni an'gilaq Gabriel-aaq Agayutem ayagcetaa Galilee-am nunain iliitnun Nazareth-aamun,

²⁷tuavet neviarcarmun Joseph-aam nulirkautiinun. Joseph-aaq-llu David-aam kinguveqaa. Neviarcar-llu atengqertuq, Mary.

²⁸An'gilam ullagaa qanrulluku-llu, “Waqaa, nakmikumalriami, Atanrem nayuraaten, arnani atawakumaciquten!”

²⁹Mat'umek niicami angelriamek tatamuq, umyuangcarluni-llu umyuaqutmi caucianek.

³⁰An'gilam-llu qanrutaa, “Alingevkenak, Mary, Agayutem nakmikaaten.

³¹Tangerrluku-llu, qingarciquten qetunrangluten-llu; acirarkaugan-llu Jesus-aamek.

³²Aterpauciquq, Quyinrulriim-llu Qetunraanek atengqerciquq, Atanrem-llu Agayutem cikirciqaa David-aam ciuliaran angayuqauvianek.

³³Atanruarkauguq-llu Jacob-aam kinguvrini akwarpak tayima, angayuqauvia-llu iquklisngaunani.”

³⁴Mary-m-llu an'gilaq kiugaa, “Qaillun-mi tuaten piciqsia wii uingunii?”

³⁵An'gilam kiugaa, “Anernerem Tanqilriim tusvikciqaaten, Quyinrulriim-llu pinian naligciqaaten, taumek-llu elpeni piurtarkaq tauna Tanqilria atengqerrarkauguq Agayutem Qetunraanek.

³⁶Tangerrluku-llu, tungelqun Elizabeth ayagyuanring'e'rmi qingartuq qetunrarkamek, maa-i-llu iraluin arvinlekaat, atengqellrung'e'rmi qingayuilngurmek.

³⁷Wani-wa Agayutmi ca caperrnarqenrituq.”

³⁸Mary-llu kiuguq, “Qanrucirpetun Atanrem pisqutii wangni piuli.” An'gilam-llu unitaa.

³⁹Taum-llu nalliini Mary tuaken ayagtuq ingrinun, Judah-m nunain iliitnun.

⁴⁰Zacharias-aam-llu eniinun itertuq Elizabeth-aaq-llu aryuqutmek piluku.

⁴¹Tua-i-llu Elizabeth Mary-m aryuqutiinek niicami, qingaa pekcillagtuq iluani, Anernerem-llu Tanqilriim imiraa.

⁴²Angnirluni-llu qastuluni qanertuq, “Atawaunruuten arnani, atawaunruluni-llu qingan engeliavni.

⁴³Qaillun piama Atanema aaniin ullagtanga?

⁴⁴Tangerrluku, aryuqutevnek niiyucimtun qingaqa pekcillagtuq engeliamni angnirluni.

⁴⁵Atawauguten-llu, ukvelriami, tua-i Atanrem qanellri piciurtarkaungata.”

⁴⁶Mary-llu qanertuq, “Tarnema Ataneq nanraraa,

⁴⁷anerneqa-llu angnirtuq Agayutmun Anirturtemnun,

⁴⁸pistem̄i-llu cakegtaunrilucia catkenrilaku. Tangerrluku-llu, wak'nirnek kinguvalriit atawauniciqaatnga,

⁴⁹pinilriim angelriamek pillruanga, atra-llu Tanqiuguq.

⁵⁰Naklekilaucia takaqestem̄ini kinguvalriit kinguvritnun tusngaciquq.

⁵¹Tallimikun pinimek nasvallruuq, ircaqumegteggun pivakellriit sekavtellrui.

⁵²Atanrulriit-llu atanruviillrui, cakegtaunrilnguut-llu nalugluki.

⁵³Kailriit-llu camircetai, tukuulriit-llu ayagcetai unangevkarpek'naki.

⁵⁴Israel-aaq pisten̄i kusguallrua, tua-i takumcukutni umyuaqluku.

⁵⁵Abraham-aamun kinguvrinun-llu akwarpak tayima ciuliamten̄un qanellruciatun.”

⁵⁶Mary-m-llu iraluni pingayuni nayuraa, nutaan-llu nunaminun uterrluni.

⁵⁷Elizabeth pinariani irniuq qetunrangluni.

⁵⁸Nunaqliin tungelqurrin-llu Atanrem takumcukutii angelria elliinun niicamegteggu angnillgutkaat.

⁵⁹Tua-i-llu erenret pingayunelgurcata mikelnguq nuugiqatallratni, tuani aciqataryaaqaat atiin atranek, Zacharias-aamek.

⁶⁰Tua-i-llu aanii qanertuq, “Tuaten pinrilli, tau͡gaam atengqerciquq John-aamek.”

⁶¹Qanrutaat-llu, “Tungelqurpenek atengqelriartaituq waten.”

⁶²Atii-llu eluciraraat camek atengqerresqumacianek.

⁶³Tua-i-llu igarkamek pisqelluni, igartuq waten, “John-aamek atengqertuq.” Tamarmeng-llu irriut.

⁶⁴Egmianun-llu qaneryaurtuq, alungutii uqiggenani qallalluni, Agayun-llu nanrarluku.

⁶⁵Tamakut-llu nunalgutkelriit qigcigyunga'artut, man'a-llu sekavtuq Judea-mi ingrini nunalegni tamaitni.

⁶⁶Tamatumek-llu niitellriit umyuangcautekaat, qanraqluteng, “Mikelnguq una cauqatarta?” Tua-i Atanrem ikayuumaa.

⁶⁷Atii-llu Zacharias Anernerem Tanqilriim imiumiini, qalaruciuq waten,

⁶⁸“Atawauguq Ataneq, Israel-aat Agayutiit, tua-i yun'i umyuaqngamiki, anirtuutekaatnek-llu pillruamiki.

⁶⁹Anirturistekamten̄ek-llu taivkarillruuq pistem̄i David-aam kinguvranek.

⁷⁰Prophet-aatgun ellualriatgun ak'allarteggun qanrutkellrucimitun,

⁷¹anirtuumasqelluta inglukestemten̄ek uumikestemta-llu unataitnek.

⁷²Qaqilluku takumcukun ciuliamten̄un akqutkumalria, akqutni-llu tanqilria umyuaqluku,

⁷³Abraham-aamun ciuliamten̄un ukvernarcallni;

⁷⁴tua-i anirturyugluta inglukestemta unataitnek, nutaan wangkuta camek civuuravkenata kevgiurarkaurrluku,

⁷⁵tanqigmi elluami-llu unguvallemten̄i, elliin ciuqerrani.

⁷⁶Wani-wa elpet, mikelnguuq, Quyinrulriim prophet-aaranek aprumaciquten, tua-i Atanrem ciungakun pekciiquten tumyararkai upluki.

⁷⁷Yui-llu anirtuutekaatnek elpengcarluki assiilnguillratgun.

⁷⁸Tua-i Agayutem naklegtalriim takumcukutiikun, tanqigmek pakmaken eruskakut,

⁷⁹tanqiginaluki imkut tan'germi tuqum-llu talinrani uitalriit, tass'uqnaluta-llu nepaitem tumyaraakun.”

⁸⁰Mikelnguq-llu tauna angliuq, yuucimikun piningqerrluni, yuilqumlluni-llu erneq imna engelkarrluku Israel-aanun elpekevkallni.